كەندى التايدان ۋنيۆەرسياداعا 42 سپورتشى قاتىسادى
كيكبوكستان الەمنىڭ 5 دۇركىن چەمپيونى, ەلىمىز بىرىنشىلىگىندە سان مارتە توپ جارىپ, حالىقارالىق جارىستاردا قازاق ەلىنىڭ تۋىن جەلبىرەتكەن اتاقتى سپورتشى, بۇدان بۇرىن دا وبلىستىق سپورت جانە تۋريزم باسقارماسىن باسقارعان, سوڭعى ەكى-ءۇش ايدان بەرى لاۋازىمدى قىزمەت تىزگىنىن قايتا ۇستاعان اسقار موجانوۆپەن قىسقى ۋنيۆەرسيادا جونىندە پىكىر الماسقان ەدىك.
– اسقار بايجىگىت ۇلى, ۋنيۆەرسياداعا قىسقى سپورتپەن شۇعىلداناتىن جەرلەستەرىمىز قانشا جولداماعا يە بولدى؟ كىمدەردەن ءۇمىت كۇتەسىز؟
– دۇنيەجۇزىلىك ۋنيۆەرسيادانىڭ ەلىمىزدە ءوتۋى الەم جۇرتشىلىعىن تاڭداي قاقتىرارلىق ەلەۋلى وقيعا. دارەجەسى ءجونىنەن وليمپيا ويىندارىنان كەيىن ەكىنشى ورىندا تۇرعان ۋنيۆەرسياداعا الەمنىڭ 60-قا تارتا ەلىنىڭ سايىپقىراندارى قاتىسادى, ونى 80 مەملەكەتتىڭ 1 ميللياردقا جۋىق كورەرمەنى تاماشالايدى. قازاق ەلى تاۋەلسىزدىك العان شيرەك عاسىردا اۋىر اتلەتيكا مەن بوكستان الەم چەمپيوناتتارىن, ازيا بىرىنشىلىكتەرىن, قازاق كۇرەسىنەن «قازاق بارىسى» سەكىلدى باسقا ءدۇبىرلى حالىقارالىق سايىستاردى وتكىزدى. ونىڭ ۇستىنە, استانادا ەكسپو-2017 كورمەسى ءوتپەك. ءبىر جىلدا عالامات ەكى وقيعانىڭ قاتار ءوتۋى شىنىندا دا عاجاپ جاڭالىق.
قىسقى سپورت تۇرلەرى كەندى التايدا ەرەكشە دامىعان. شاڭعى, بياتلون, تاۋ شاڭعىسى, شايبالى حوككەي سياقتى قىسقى سپورت تۇرلەرىنەن جەرلەستەرىمىز ءجۇلدەلى ورىنداردى يەلەنىپ ءجۇر. شىعىس قازاقستان وبلىسىنىڭ ستۋدەنتتەرى بۇگىنگە دەيىن 6 ۋنيۆەرسياداعا قاتىسىپ, 6 التىن, 4 كۇمىس, 6 قولا مەدالدى قانجىعالاعان. الماتىداعى XXVIII ۋنيۆەرسيادادان ەكى التىن, ءبىر كۇمىس مەدالدى الۋدى ماقسات تۇتىپ وتىرمىز.
– التىن مەدالدان ۇمىتكەرلەر قاتارىندا كىمدى ايتار ەدىڭىز؟
– الدىن الا تون پىشكەن ءجون بولماس. كەيدە قولدا تۇرعان التىننىڭ ءبىر مەزەتتە ۋىستان سىرعىپ كەتەتىنى دە بار. ليلليحامەر وليمپياداسىندا جەرلەسىمىز شەشكەلدىڭ سورەگە بىرنەشە مەتر قالعاندا ءسۇرىنىپ, ءتورتىنشى ورىندى قاناعات تۇتقانىن قالاي ۇمىتايىق. نەمەسە اتاقتى شاڭعىشىمىز ا.پولتورانيننىڭ الەم چەمپيوناتىندا قۇلاپ قالىپ, بەسىنشى ورىندى مىسە تۇتقانى دا ەستە. دەمەك, تاكتيكالىق ءادىس پەن شەبەرلىكتى قاتار مەڭگەرگەندە عانا دىتتەگەن مەجەگە جەتە الاسىز.
الماتىداعى ۋنيۆەرسياداعا كەندى التايدان 42 ساڭلاق قاتىسىپ, سپورتتىڭ 9 ءتۇرى بويىنشا باقتارىن سىنايدى. اتاپ ايتقاندا, شاڭعى سپورتىنان – 5, بياتلوننان – 5, تاۋ شاڭعىسىنان – 4, تۇعىردان شاڭعىمەن سەكىرۋدەن – 3, فريستايلدىڭ موگۋل جانە اكروباتيكا تۇرلەرىنەن –7, كونكي سپورتىنان –1, شايبالى حوككەيدەن – 11, سنوۋبورد, شاڭعى قوسسايىسىنان – 2 ستۋدەنت. ال ەلىمىز بويىنشا ۋنيۆەرسيادادا بارلىعى 195 (ونىڭ 103-ءى ەر, 92-ءسى ايەل) سپورتشى قاتىسادى دەپ كۇتىلۋدە. دەمەك, قازاقستان قۇراماسىنىڭ ءتورتتەن ءبىرىن ءبىزدىڭ جەرلەستەرىمىز قۇراپ وتىر.
فريستايلدان الەم چەمپيوناتىنىڭ قولا جۇلدەگەرى, الەم كۋبوگىنىڭ جەڭىمپازى يۋليا گالىشەۆا بۇدان بۇرىن دا دۇنيەجۇزىلىك ۋنيۆەرسيادادا التىن القانى جەڭىپ العان. بۇل جولى دا يۋليادان تەك التىن كۇتەمىز. دميتري رەيحەرد, پاۆەل كولماكوۆ, بياتلونشى گالينا ۆيشنەۆسكايا ءبىر التىن, ءبىر كۇمىس السا, تاماشا بولار ەدى. فريستايلدىڭ اكروباتيكا ءتۇرىنەن اقجول زامانبەكوۆ, شاڭعىدان اسەت دۇيسەنوۆ, يۆان ليۋفت, مارينا ماتروسوۆا, انجەليكا تاراسوۆا, كونكيدەن ەلۆيرا حاليكوۆا سياقتى تالانتتى جاستارىمىز نامىستى قولدان بەرمەس دەگەن ويدامىز. قالاي دەگەندە دە, ەلدىگىمىز بەن ءبىرلىگىمىز سىنعا تۇسەر ساتتە جەرلەستەرىمىز جەڭىس تۇعىرىنىڭ بيىك ساتىسىنان كورىنەدى دەپ سەنەمىز.
– ۋنيۆەرسيادا ەستافەتاسى بىزدە قاشان وتەدى؟
– شىعىس قازاقستاندا ەستافەتا 26 قاڭتاردا ءوتىپ, وعان 60-تان استام جوعارى جانە ورتا ارناۋلى وقۋ ورىندارىنىڭ وقۋدا ۇزدىك جاستارى قاتىسپاقشى.
– اڭگىمەڭىزگە راحمەت.
اڭگىمەلەسكەن
وڭداسىن ەلۋباي,
جۋرناليست
وسكەمەن