استانادا قازاقستان رەسپۋبليكاسىنىڭ مەملەكەتتىك حاتشىسى – سىرتقى ىستەر ءمينيسترى قانات ساۋداباەۆ بۇۇ باس حاتشىسىنىڭ ارنايى وكىلى, بۇۇ-نىڭ ورتالىق ازياداعى ايماقتىق بىتىمگەرلىك ديپلوماتيا ورتالىعىنىڭ باسشىسى ميروسلاۆ ەنچانى قابىلدادى, دەپ حابارلادى قر ءسىم-ءىنىڭ ءباسپاسوز قىزمەتى.
كەزدەسۋ بارىسىندا ورتالىق ازياداعى سۋ-ەنەرگەتيكالىق رەسۋرستاردى باسقارۋ, زاڭسىز كوشى-قون, ەسىرتكى ترافيگى جانە ترانسشەكارالىق قىلمىس, ەكسترەميزم مەن تەرروريزمگە قارسى كۇرەستى قامتيتىن ىنتىماقتاستىق ماسەلەلەرىنىڭ كەڭ شەڭبەرى, سونداي-اق اۋعان پروبلەماسىمەن قوسا, ايماقتاعى احۋال تالقىلاندى.
اۋعان ماسەلەسىن قوزعاي وتىرىپ, ق. ساۋداباەۆ تەرروريزم, زاڭسىز ەسىرتكى ترافيگى مەن ءدىني ەكسترەميزمگە تەگەۋرىندى قارسى كۇرەسۋدىڭ كوكەيكەستىلىگىنە توقتالدى جانە استانانىڭ اتالعان ەلدى الەۋمەتتىك-ەكونوميكالىق جاڭعىرتۋعا جان-جاقتى كومەك بەرۋدى ودان ءارى جالعاستىرۋ نيەتىن قۋاتتادى.
قىرعىزستانداعى اعىمداعى جاعدايدى اڭگىمە ەتە وتىرىپ, قازاقستان سىرتقى ساياسات ۆەدومستۆوسىنىڭ باسشىسى ەلباسىنىڭ باستاماسى بويىنشا دوستاس ەلگە مەملەكەتارالىق كومەك كورسەتۋ جونىندەگى باعدارلاما ازىرلەنىپ جاتقاندىعىن مالىمدەدى.
بۇۇ مەن قازاقستان اراسىنداعى جاھاندىق جانە ايماقتىق دەڭگەيدەگى ىنتىماقتاستىقتىڭ ۇدەمەلى دامۋ سيپاتىنا توقتالا وتىرىپ, م. ەنچا پرەزيدەنت ن. نازارباەۆتىڭ ۇسىنىسىمەن تاياۋدا قازاقستان وكىلى ق. توقاەۆتىڭ بۇۇ باس حاتشىسىنىڭ ورىنباسارى – بۇۇ-نىڭ جەنەۆاداعى ءبولىمىنىڭ باس ديرەكتورى جوعارى لاۋازىمىنا تاعايىندالۋى ىنتىماقتاستىقتىڭ ءبىر ايعاعى ەكەندىگىن اتاپ ءوتتى.