سۋ تاپشىلىعى قازىردىڭ وزىندە الەم جۇرتشىلىعىن تۇيىققا تىرەي باستادى. ول ازداي عالىمدار جىل وتكەن سايىن احۋال ۋشىعا تۇسەتىنىن ايتىپ وتىر. جاعدايدان حاباردار سۋ رەسۋرستارى جانە يرريگاتسيا مينيسترلىگى مەملەكەت باسشىسىنىڭ تاپسىرمالارىن ورىنداۋ ءۇشىن مۇددەلى مەملەكەتتىك ورگاندارمەن بىرلەسىپ, سۋ رەسۋرستارىن باسقارۋ جۇيەسىن دامىتۋدىڭ 2024-2030 جىلدارعا ارنالعان تۇجىرىمداماسىن بەكىتكەن ەدى, دەپ جازادى Egemen.kz.
تۇجىرىمداماعا سايكەس, ەلىمىزدە 42 جاڭا سۋ قويماسى سالىنادى. سول سەكىلدى 37 سۋ قويماسى جانە 110 قۇرىلىسجاي رەكونسترۋكتسيادان ءوتىپ, 14,5 مىڭ شاقىرىم كانال جاڭعىرتىلۋى ءتيىس. وسىعان قوسا, 557 گيدروتەحنيكالىق قۇرىلىستى كوپفاكتورلى زەرتتەپ-قاراۋدى وتكىزۋ جوسپارلانعان. سۋ رەسۋرستارى جانە يرريگاتسيا مينيسترلىگى 2025 جىلى 147 ينفراقۇرىلىمدىق جوباعا (ونىڭ ىشىندە 53 جوبا بىلتىر اياقتالىپتى) كىرىسكەن. ونىڭ ىشىندە 677 شاقىرىم يرريگاتسيالىق جۇيەلەردى جاڭعىرتۋ, 4 سۋ قويماسىن رەكونسترۋكتسيالاۋ, 15 توپتىق سۋ قۇبىرىن سالۋ, جوندەۋ, 3 قۇرىلىسجايدى رەكونسترۋكتسيالاۋ جۇمىستارى بار.
2026 جىلى ءۇش وبلىستا جاڭا سۋ قويمالارى بوي كوتەرەدى
سالاداعى وزگە دە جۇمىستاردىڭ رەتىن سۋ رەسۋرستارى جانە يرريگاتسيا ۆيتسە-ءمينيسترى ەربولات يبرايحانوۆ ءباسپاسوز ءماسليحاتىندا باياندادى.
«بۇگىندە تۇركىستان وبلىسىندا جالپى سىيىمدىلىعى 69,1 ملن م3 قۇرايتىن 2 سۋ قويماسىنىڭ قۇرىلىسى باستالعان. ونداعى قۇرىلىس-مونتاج جۇمىستارىن بيىل اياقتاۋ كوزدەلگەن. سونداي-اق 5 سۋ قويماسىن سالۋ بويىنشا جوبالار ازىرلەنىپ جاتىر. ناقتىلاساق, اباي وبلىسىندا – قاراكول جانە قارعىبا, باتىس قازاقستان وبلىسىندا – كىشى وزەن, قاراعاندى وبلىسىندا – سادوۆوە, جەتىسۋ وبلىسىندا – پاكاتيلوۆسك سۋ قويمالارى سالىنادى. بۇدان بولەك, 5 سۋ قويماسى بويىنشا جوبالار ازىرلەنىپ قويدى. ولار اقمولا وبلىسىنداعى – ەسىل كونتررەتتەگىشى, جامبىل وبلىسى – قالعۇتى, اقمولا, باتىس قازاقستان وبلىسىندا – ۇلكەن وزەن, قىزىلوردا وبلىسىنداعى – قاراوزەك سۋ قويماسى. جۇمىس قارقىنى بيىل دا باسەڭدەمەيدى. بۇگىندە 8 سۋ قويماسى بويىنشا جوبالاردى ازىرلەۋ جوسپارلاندى. ونىڭ ىشىندە اباي وبلىسىندا – كەلدىمۇرات, كىشى-بۋكون, كوكتەرەك جانە بازار, شىعىس قازاقستان وبلىسىندا – كەندىرلىك, قارابۇتا, اليباستر سۋ قويمالارى بار», دەدى ە. يبرايحانوۆ.
بۇگىندە سۋ قويمالارىن رەكونسترۋكتسيالاۋ بويىنشا 5 جوبا ازىرلەنگەن. جامبىل وبلىسىندا – تەرىس-اششىبۇلاق, قاراقوڭىز جانە ىنتالى, شىعىس قازاقستان وبلىسىندا – قاندىسۋ جانە ۇيدەنە سۋ قويمالارى جوندەۋدەن وتەدى. ال 7 وبلىستاعى 13 سۋ قويماسىن رەكونسترۋكتسيالاۋ بويىنشا جوبالاردى ازىرلەۋ ءالى جالعاسىپ جاتقان كورىنەدى. ول ازداي بيىل باتىس قازاقستان, قىزىلوردا, قوستاناي, تۇركىستان جانە سولتۇستىك قازاقستان وبلىستارىندا 8 سۋ قويماسىن رەكونسترۋكتسيالاۋ جوبالارىن ازىرلەۋ جوسپاردا بار ەكەن. قىسقاسى, سۋ رەسۋرستارىن باسقارۋ جۇيەسىن دامىتۋدىڭ 2030 جىلعا دەيىنگى تۇجىرىمداماسى مەرزىمىنەن كەشىكپەي ورىندالسا, جاعداي ءبىرشاما وڭالاتىنى انىق.
ەلىمىزدىڭ سۋ قويمالارى تاسقىن سۋعا دايىن با؟