پارلامەنت سەناتىنىڭ توراعاسى قاسىم-جومارت توقاەۆ ءيزرايلدىڭ قازاقستانداعى ەلشىسى ميحاەل برودسكيدى ونىڭ ءوتىنىشى بويىنشا قابىلدادى. توراعا يزرايل پرەمەر-ءمينيسترى بينيامين نەتانياحۋدىڭ جەلتوقساندا قازاقستانعا جوسپارلانعان العاشقى رەسمي ساپارىنىڭ ماڭىزدى سيپاتىن اتاپ ءوتتى.
.ق.توقاەۆتىڭ پىكىرىنشە, الداعى جوعارى دەڭگەيدەگى كەلىسسوزدەر ەكىجاقتى ىنتىماقتاستىقتى ءمۇلدە جاڭا دەڭگەيگە كوتەرەتىن بولادى. سەنات باسشىسى پارلامەنتارالىق بايلانىستاردى ودان ءارى نىعايتۋ جايىن دا ايتتى.
يزرايل ەلشىسى ب.نەتانياحۋ ساپارى اياسىندا بىرقاتار ەكىجاقتى كەلىسىمدەرگە قول قويۋعا ازىرلىك تۋرالى حاباردار ەتتى. سونداي-اق, شيمون پەرەس تۋرالى قازاقستاندىق جانە يزرايلدىك بۇقارالىق اقپارات قۇرالدارىندا جاريالانعان ەستەلىك ماقالاسى ءۇشىن سەنات توراعاسىنا م.برودسكي العىس ايتتى.
سول كۇنى ق.توقاەۆ جاپونيا ەلشىسى يتيرو كاۆاباتومەن دە كەزدەستى. جۇزدەسۋشىلەر پرەزيدەنت نۇرسۇلتان نازارباەۆتىڭ قاراشانىڭ باسىنداعى جاپونياعا رەسمي ساپارى زور تابىسپەن وتكەنىن اتاپ ءوتتى. ق.توقاەۆ توكيوداعى كەلىسسوزدەر ەكىجاقتى ىنتىماقتاستىق سالاسىندا ناقتى ناتيجەلەرگە جەتكىزدى دەپ سانايدى. ديپلوماتتىڭ ايتۋىنشا, قازاقستان پرەزيدەنتىنىڭ جاپونيا پارلامەنتىندەگى جارقىن دا مازمۇندى ءسوزىن قوس پالاتانىڭ دەپۋتاتتارى ەرەكشە جوعارى باعالادى.
كەزدەسۋ بارىسىندا جاھاندىق قارۋسىزدانۋ جانە يادرولىق قارۋدى تاراتپاۋ سالاسىنداعى ەكى مەملەكەت ىنتىماقتاستىعىنىڭ كەلەشەگى تالقىلاندى.