بارشانىڭ ورتاق قۋانىشى

قازىر كورشىلەس ەلدەر عانا ەمەس, جەر بەتىنىڭ بارلىق قۇرلى­عىنداعى مەملەكەتتەر, ياعني كۇللى الەم قازاقستاندى تانيدى, وعان تامسانادى, جەتىستىكتەرىنە تاڭىرقايدى. قازاقستان اتتى اتاۋمەن تاۋەلسىزدىگىمىزدىڭ تۇعىرىن بەكىتكەن, دامىتقان ەلباسىمىز نۇرسۇلتان نازارباەۆ ەسىمىنىڭ قاتار تۇرۋى تاريحي شىندىق, بۇلجىماس الەمدىك ادىلەتتىلىك دەپ بىلەمىن. تاۋەلسىزدىكتىڭ تورقالى تويىنىڭ قارساڭىندا, سونىمەن قاتار, تۇڭعىش پرەزي­دەنت كۇنىنە وراي ەلباسىنىڭ سۋرەت­تەرىمەن ەسكەرتكىش بانكنوتتى اينالىمعا شىعارۋ تۋرالى ۇلتتىق بانكتىڭ توراعاسى دانيار اقىشەۆتىڭ ۇسىنىسىن ءوز باسىم دۇرىس قابىلدادىم. ويتكەنى, ەلدىڭ ەڭسەسىن تىكتەپ, ەتەگىن جاۋىپ, الىس-جاقىنمەن اراسىن رەتتەپ, ىشكى-سىرتقى قاۋىپتىڭ ءبارىنىڭ الدىن الىپ, ەكونوميكالىق احۋالىمىزدى تۇزەپ, قىسقاسى, مەملەكەتتىڭ بارلىق جۇگىن ارقالاپ كەلە جاتقان تۇعىرى بيىك تۇلعاعا قۇرمەت, قازاقستاندىقتاردىڭ ريزاشىلىعى دەپ ءبىلدىم. بۇل رەتتە سىر ەلى دە مۇنداي باستامادان سىرت قالماي, قۋانىشقا ورتاق. ويتكەنى, «سىر – الاشتىڭ اناسى» دەپ ءبىزدىڭ ولكەنى جوعارى باعالاعان پرەزيدەنتتىڭ ەرەكشە قامقورلىعىن ەڭبەكتەگەن نارەستەدەن, ەڭكەيگەن كارىگە دەيىن سەزىنۋدەمىز. ونىڭ ۇستىنە, قازاقستان تاريحىندا ءحى عاسىردىڭ العاشقى شيرەگىندە تاراز بەن يسپيدجاب قالالارىندا عانا تەڭگە سارايلارى بولعاندىعى ايتىلسا, سوڭعى ارحەولوگيالىق زەرتتەۋلەر سىر بويىنداعى جەنت, جانكەنت, سىعاناق, بارشىنكەنت جانە وزگەنت شاھارلارىندا دا اتالمىش سارايلاردىڭ بولعاندىعىن عىلىمي تۇرعىدا دالەلدەدى. دەمەك, بۇل – تاۋەلسىزدىگىمىزدىڭ شيرەك عاسىرلىق تويىنىڭ قارساڭىندا ۇلتتىق ۆاليۋتامىزدىڭ ومىرگە كەلۋى تاريحىندا قاسيەتتى سىر ەلىنىڭ ەرەكشە ورنىن كورسەتسە كەرەك. قازاقتىڭ ءتول تاريحىن بىلاي قويعاندا, قازىردە ەل ومىرىنە ەرەكشە ۇلەس قوسقان تۇلعالاردىڭ بەينەسىن قاعاز اقشاعا ورنالاستىرۋ جات ءۇردىس ەمەس. نەلسون مان­دەلا, مۇستافا كەمال اتاتۇرىك, لي كۋان يۋ, ۋينستون چەرچيلل سياقتى الەمدىك دەڭگەيدەگى كوشباسشىلار ءوز ەلدەرىنىڭ قازىرگى زامانعى كۋپيۋرلارىندا بەينەلەنگەن. ال قازاقستانعا ونىڭ قۋاتتى مەملەكەت بولىپ قالىپتاسىپ دامۋىنا ولشەۋسىز ۇلەس قوسقان ەلباسىمىزدىڭ ەڭبەگى جوعارىدا اتالعان كوشباسشىلاردان نەسى كەم؟! ون مىڭ تەڭگەلىك ەسكەرتكىش كۋپيۋرادا ساقتار داۋىرىنەن بۇگىنگە دەيىنگى ۇلتتىق تاريحىمىز جيناقتالىپ, قازىرگى قازاقستان كارتاسىنىڭ ەل حالقىنىڭ ورتاق ءۇنى رەتىندە كورسەتىلۋى, قازاق ەلى مونۋمەنتىندەگى سامۇرىق قۇستىڭ وتكەن كۇنمەن بۇگىننىڭ ساباقتاستىعىنا مەڭزەپ تۇرعاندىعى – تاريحىمىزدى ءتۇسىنىپ, كۇشىمىزدىڭ بىرلىكتە ەكەنىن سەزىنىپ, ەلباسىمىزبەن بولاشاق بيىكتەرىنە شاقىرعانداي اسەر ەتتى. تۇڭعىش پرەزيدەنت كۇنىنە وراي مەملە­كەت باسشىسى بەينەلەنگەن ەسكەرتكىش كۋپيۋرانىڭ اينالىسقا شىعۋىن قولداي وتىرىپ, بارشا قازاقستاندىقتاردى مۇحاممەد پايعامبارىمىزدىڭ: «پاتشالار مەن دانالار – اللانىڭ جەردەگى كولەڭكەلەرى. كىمدە كىم ولاردى سىيلاسا, ول ادامدى اللا تاعالادا قۇرمەتتەيدى» دەگەن سوزىمەن اياقتاعىم كەلەدى. سوندىقتان بۇل ءۇردىستى ەل مەن ەلباسىنىڭ ءبىر-بىرىنە دەگەن ەرەكشە قۇرمەتى دەپ قابىلداۋ كەرەك.

قازباي قۇدايبەرگەنوۆ,

قورقىت اتا اتىنداعى قىزىلوردا مەملەكەتتىك ۋنيۆەرسيتەتىنىڭ پروفەسسورى

حالقىنا قالتقىسىز قىزمەتتىڭ وتەۋىندەي

بۇدان 25 جىل بۇرىن ەلىمىز قانداي ەدى, ءوزىمىز قانداي ەدىك؟ احۋالىمىز بۇگىنگىدەي مە ەدى؟ الەمنىڭ قاي ەلىمەن بايلانىسىمىز بار ەدى؟ مەملەكەتتىك رامىزدەرىمىز, ءتىپتى ۇلتتىق ۆاليۋتامىز بولىپ پا ەدى؟ جوق, مۇنىڭ بىردە-بىرەۋى بولعان ەمەس. ويتكەنى, ءبىز وزگەسىن ايتپاعاندا, مەملەكەت رەتىندە ۇلتتىق ەكونوميكامىزدى وركەندەتۋ, وتاندىق ونىمدەرىمىزدى ءوندىرۋ سەكىلدى مۇمكىندىككە قول جەتكىزە المادىق. سەبەبى, بۇعان كسرو دەگەننىڭ وتارشىل باسشىلارى ىرىق بەرمەدى. ال قازىر شە؟ تاۋەلسىزدىك العالى بەرى قازاق ەلىن الەمگە تانىتۋ, مەملەكەت رەتىندە قالىپتاستىرۋدىڭ ءبىر ساتتە ىسكە اسىرۋ سونشالىقتى وڭاي بولماعانىن بىلەمىز. ءيا, قازىر بىزدە ءبارى بار. بارشا قازاقستاندىق ازاماتتىڭ پاتريوتتىق سەزىمىن وياتاتىن ءانۇرانىمىز بار. كوكتە قالىقتاعان قىران بەينەلەنگەن كوك بايراعىمىزدى جەلبىرەتتىك. ۇلتتىق بانكنوتىمىزدى اينالىمعا شىعاردىق. شەكارامىزدى شەگەندەپ الدىق. الەمنىڭ بار ەلىمەن ساۋدا-ەكونوميكالىق, ىسكەرلىك, ارىپتەستىك بايلانىس ورناتتىق. ۇلتتىق ەكونوميكامىزدىڭ ءار سالاسى قارقىندى وركەندەدى. وتاندىق ونىمدەرىمىز دە مول, ءتىپتى, تمد ەلدەرىندە ءالى دە شىعارىلا قويماعان شەتەلدىك كولىكتەرگە دەيىن قازاقستاندا قۇراستىرىلادى. بىلىمگە, عىلىمعا ۇمتىلعان وتانشىل جاستارىمىز «بولاشاق» باعدارلاماسىمەن شەتەلدەردىڭ ەڭ تاڭداۋلى ۋنيۆەرسيتەتتەرىندە جوعارى ءبىلىم الدى. وسىنىڭ ءبارىنىڭ باستاۋىندا تاۋەلسىزدىكتىڭ ەلەڭ-الاڭىندا ەل باسقارۋ تىزگىنىن قولىنا العان تۇڭعىش پرەزيدەنتىمىز نۇرسۇلتان نازارباەۆتىڭ تۇرعانى داۋ تۋدىرمايدى. ەندى, مىنە, تاۋەلسىزدىك العان سول ءبىر قيىن-قىستاۋ كەزەڭدە ەلىنىڭ ەرتەڭى, حالقىنىڭ كەمەل كەلەشەگى ءۇشىن ەمىرەنىپ ەڭبەك ەتكەن نۇرسۇلتان ءابىش ۇلىنىڭ پورترەتى بەينەلەنگەن جاڭا بانكنوت –10 مىڭ تەڭگەنىڭ جاڭا ۇلگىسى اينالىمعا شىعارىلعالى وتىر. مۇنى شىن مانىندە قازاقستان تاۋەلسىزدىگىنىڭ 25 جىلدىق مەرەيتويى قارساڭىنداعى تاماشا تارتۋ رەتىندە قابىلداپ وتىرمىن. ويتكەنى, مۇنداي قادام وتانداستارىمىزدىڭ ۇلتتىق بانكنوتىمىزعا دەگەن قۇرمەتىن ارتتىرا تۇسەدى. بۇل – ءبىر. ەكىنشىدەن, الەمنىڭ كوپتەگەن ەلدەرىندە مەملەكەت باسشىلارىنىڭ, تانىمال تۇلعالارىنىڭ پورترەتى بەينەلەنگەن بانكنوتتار بار. ءدال وسىنداي بانكنوتتاردى اقش, سينگاپۋر, ۇلىبريتانيا, تۇركيا, كانادا, مالايزيا, ءۇندىستان, چەحيا جانە باسقا دا كوپتەگەن ەلدەردىڭ اينالىمعا ەنگىزگەنىن مىسالعا كەلتىرۋگە بولادى. ۇشىنشىدەن, ەلباسى – ءبىزدىڭ تاۋەلسىز قازاقستانىمىزدىڭ دەربەس مەملەكەت رەتىندە قالىپتاسۋى مەن وركەندەۋىنىڭ باستاۋىندا تۇرعان دارا تۇلعا, تورتىن­شىدەن, ەلىمىزدىڭ الەمدىك وركەنيەت كوشىنە دەندەي ەنۋىنە بار كۇش-قۋاتىن جۇمساعان, بارشا ادامزاتتىڭ يادرولىق قارۋسىز الەمدە ءومىر ءسۇرۋىن كوزدەگەن كوشباسشى رەتىندە قالتقىسىز ەڭبەك ءسىڭىرىپ كەلەدى. بەسىنشىدەن, مەملەكەتتىك رامىزدەرىمىزدىڭ قابىلدانۋىنا دا, ۇلتتىق بانكنوتىمىزدىڭ اينالىسقا ەنگىزىلۋىنە دە تىكەلەي ۇيىتقى بولدى. التىنشىدان, ۇلتتىق ەكونوميكامىزدىڭ بارلىق سالاسى تۇتاستاي دامۋىندا دا, استاناداي ەلوردامىزدىڭ ەڭسە تىكتەۋىندە دە ولشەۋسىز ۇلەسى بار. بۇل كۇندە قازاقستاندى جاھان جۇرتى تانيدى. الەم قازاقستاندى ىنتىماق پەن دوستىقتىڭ, بىرلىك پەن بەرەكەنىڭ بەيبىت وتانى رەتىندە باعالايدى. ءبىز مۇنىڭ بارىنە ەلباسىنىڭ ەرەن ەڭبەگىنىڭ ارقاسىندا قول جەتكىزدىك. ال ەلباسىنىڭ وزىمەن الەمدەگى دامىعان ەڭ وزىق, ەڭ وركەنيەتتى ەلدەردىڭ باسشىلارى مەن ساراپشىلارى اقىلداسىپ, كەڭەسىپ, ورنىقتى پىكىرىمەن ساناسىپ وتىرادى. مۇنىڭ ءوزى نۇرسۇلتان نازارباەۆتىڭ الەمدىك ساياساتتاعى كوشباسشىلىق, ساياساتكەرلىك تۇلعاسىن بيىكتەتە تۇسەدى. مىنە, وسىنىڭ ءبارى نۇرسۇلتان نازارباەۆتاي ەلى ءۇشىن ەرەن ەڭبەگى سىڭگەن دارا تۇلعانىڭ پورترەتىن ۇلتتىق بانكنوتتا بەينەلەۋگە تولىق نەگىز قالايدى.

ءالي ابىشەۆ,

اتىراۋ مۇناي جانە گاز ۋنيۆەرسيتەتىنىڭ رەكتورى, ەكونوميكا عىلىمدارىنىڭ دوكتورى, پروفەسسور. اتىراۋ

تەڭگە – تاۋەلسىزدىگىمىزدىڭ  ءبىر سيمۆولى

ءاربىر ەلدىڭ ۇلتتىق ۆاليۋتاسىندا سول ەلگە ەڭ ۇلكەن ەڭبەك سىڭىرگەن, ەلدىڭ داڭقىن اسىرعان بەلگىلى ادامدارىنىڭ بەينەلەرى سالىنادى. وسى ۋاقىتقا دەيىن تەڭگەدە ابىلاي مەن ابىلقايىر حانداردىڭ, شوقان ءۋاليحانوۆتىڭ, ابايدىڭ, ت.ب. سۋرەتتەرى سالىنعان ەدى. بۇل كىسىلەر – قازاق حالقىن الەمگە تانىتقان بەلگىلى ادامدار. قازاقستاننىڭ تاۋەلسىزدىك الۋىنا جانە ونىڭ ىرگەسىنىڭ نىعايىپ, قاناتىنىڭ قاتايۋىنا, الەمدىك قوعامداستىقتاعى باسقا ەلدەرمەن تەرەزەسى تەڭ بولىپ, قاتار تۇرۋىنا ەڭ ۇلكەن ەڭبەك سىڭىرگەن ادام – پرەزيدەنت نۇرسۇلتان ءابىش ۇلى نازارباەۆ. سوندىقتان ونىڭ بەينەسىنىڭ تەڭگە بانكنوتىنا سالىنۋى دۇرىس دەپ سانايمىن. ءتىپتى, بۇرىننان بەرى سالىنعان بولسا دا ارتىق بولماس ەدى, بىراق «ەشتەن – كەش جاقسى» دەگەن ەمەس پە. تەڭگە – قازاقستان تاۋەلسىزدىگى سيمۆولدارىنىڭ ءبىرى. سول سيمۆولدا پرەزيدەنت ن.نازارباەۆتىڭ بەينەلەنۋى تاۋەلسىزدىكتى ورناتۋعا سىڭىرگەن زور ەڭبەگىن كورسەتەدى. بۇگىنگى جانە كەلەشەك ۇرپاق وسى ارقىلى تاۋەلسىزدىككە ەڭ ۇلكەن ەڭبەك سىڭىرگەن ادامنىڭ كىم ەكەنىن بىلەتىن بولادى. مۇنداي تاجىريبە الەمنىڭ بارلىق ەلدەرىندە بار. ۇلتتىق ۆاليۋتاسىنا بەينەلەنگەن ادامدارىنان سول ەلگە ەڭبەك سىڭىرگەن ادامداردىڭ كىم ەكەنى بىلىنەدى. ەندى شەتەلدىكتەر دە قازاقستان تاۋەلسىزدىگىنە ەڭ ۇلكەن ەڭبەك سىڭىرگەن ادامنىڭ كىم ەكەنىن ءبىلىپ جۇرەدى.

شاكىر حاحازوۆ,

پارلامەنت ءماجىلىسىنىڭ دەپۋتاتى  

ەلدىڭ كوشىن سۇيرەگەن ەڭبەككە لايىقتى باعا

الەمدىك تاجىريبەدە بۇرىننان بار مۇنداي جاڭالىققا توسىرقاپ قاراۋدىڭ قاجەتى جوق. مۇنىڭ اۋەلگى مىسالى – امەريكا دوللارى, دوللاردا پرەزيدەنتتەر بەينەلەنگەنى الەمنىڭ ءاربىر ازاماتىنا بەلگىلى. ۇلىبريتانيا مەن جاپونيانىڭ ۇلتتىق ۆاليۋتاسىن الىپ قاراساڭىز, كورولدەر مەن يمپەراتورلاردىڭ بەينەسىمەن ايشىقتالعان. قىتاي حالىق رەسپۋبليكاسى دا مەملەكەتتىڭ نەگىزىن قالاعان ۇلى تۇلعالارىن ۇلتتىق اقشاسىنا تاڭبالادى. تۇرىك حالقى دا وزدەرىن وركەنيەت بيىگىنە الىپ شىققان اتاتۇرىكتىڭ ەڭبەگىنە ريزاشىلىق بەلگىسى رەتىندە ليراسىنا كەسكىندەۋدى لايىق كوردى. پرەزيدەنتىمىز تاۋەلسىزدىگىمىزدىڭ نەگىزىن قالاپ, الدىڭعى قاتارلى ەلدەر قاتارىنا قوسۋعا جانىن سالىپ, تەر توگىپ كەلە جاتقان تاريحي تۇلعا بولعاندىقتان, ەلدىگىمىزدىڭ باستى نىشانى – تەڭگەمىزگە بەينەسىن بەدەرلەپ جاتساق, بۇل ەلدىڭ كوشىن ورگە سۇيرەگەن ەڭبەگىنە كورسەتكەن قۇرمەتىمىز بولماق. – جالپى, تەڭگە دەگەن ءتىرى اعزا سياقتى دۇنيە. جاتىقتاۋ ەتىپ جەتكىزسەك, كىندىگى ەكونوميكاعا بايلانىپ قانا قويماي, سول ەكونوميكانىڭ ءون بويىندا اينالىپ تۇرعان قانى دەسەك تە بولادى. الەمدىك دەڭگەيدە دە, كورشى ەلدەردە دە, قازاقستاننىڭ ومىرىندە دە ەكونوميكاعا بايلانىستى ءارتۇرلى جاعداي تۋىنداپ جاتىر. ەكونوميكالىق ۇدەرىستەردەگى ءاربىر وزگەرىس تەڭگەنىڭ قۋاتىنا, قۇنىنا ءسوزسىز اسەر ەتەدى. سوعان قاراماستان, تەڭگەمىز ۆاليۋتا رەتىندە تولىق قالىپتاستى دەپ نىق سەنىممەن ايتا الامىز.

كامال بۇرحانوۆ,

ساياساتتانۋ عىلىمدارىنىڭ دوكتورى, پروفەسسور الماتى

ەلباسىنا دەگەن ەرەكشە قۇرمەتتىڭ بەلگىسى

كەز كەلگەن مەملەكەتتە ۇلتتىق ۆاليۋتا ەگەمەندىكتىڭ نىشانى, سونىمەن بىرگە, ەكونوميكالىق ساياساتتىڭ وزەكتى تەتىكتەرىنىڭ ءبىرى. وسى اپتادا ەلباسىنىڭ بەينەسى بەدەرلەنگەن جاڭا بانكنوت پەن تاۋەلسىزدىكتىڭ 25 جىلدىعىنا ارنالعان ەستەلىك مونەتا ەل نازارىنا ۇسىنىلدى. بۇل وتە قۇپتارلىق دۇنيە بولدى. ويتكەنى, ۇلتتىق ۆاليۋتامىز ەلباسى ن. نازارباەۆتىڭ ەرەن ەڭبەگى مەن كورەگەن ساياساتىنىڭ ناتيجەسىندە دۇنيە كەلدى. جالپى, تەڭگەنىڭ ەنگىزىلۋى – ەل ەكونوميكاسى ءۇشىن وتە قيىن كەزەڭدە جۇزەگە اسىرىلدى. سوناۋ توقسانىنشى جىلداردىڭ باسىندا قازاقستان ءوزىنىڭ ۇلتتىق ۆاليۋتاسىن شىعارىپ, دەربەس اقشا-نەسيە ساياساتىن جۇرگىزەدى دەگەنگە كوپ ەلدەر كۇمانمەن قاراعان ەدى. وعان سەبەپتەر دە بار بولاتىن. كەڭەس وداعى قۇرامىنداعى باسقا دا رەسپۋبليكالار ءتارىزدى قازاقستان دا  جەكە مەملەكەت رەتىندە قالىپتاسۋى بويىنشا كۇردەلى جاعدايدا ءوتتى. جالپى, ۇلتتىق بانكنوتتاردا سول ەلدىڭ نەگىزىن قالاعان دارا تۇلعالاردىڭ, تۇڭعىش پرەزيدەنتتەر مەن كورنەكتى مەملەكەت قايراتكەرلەرىنىڭ بەينەلەنۋى – الەمدىك تاجىريبەدە كەڭىنەن تارالعان ءۇردىس. اسىرەسە, بۇل مەملەكەتتەردىڭ قالىپتاسۋى مەن دامۋ تاريحىندا ماڭىزدى ءرول اتقارعان باسشىلارعا ەرەكشە قاتىستى. ياعني, حالقىمىز ەلباسىنىڭ ەلىمىزگە سىڭىرگەن ۇلى ەڭبەگىنە لايىقتى قۇرمەت كورسەتتى دەپ ويلايمىن.

ايدايبەك حالىمبەتوۆ,

ۇلتتىق بانكتىڭ جامبىل وبلىستىق فيليالىنىڭ ديرەكتورى جامبىل وبلىسى  

اقشا ەمەس, قۇندىلىق رەتىندە ساقتاماقپىن

بۇل, ءسوز جوق, قۇپتاۋعا دا, قولداۋعا دا ابدەن تۇراتىنداي وڭ قادام. بيىلعى ۇلتتىق ۆاليۋتا كۇنى تاۋەلسىزدىگىمىزدىڭ 25 جىلدىق تورقالى تويىمەن تۇسپا-تۇس كەلىپ وتىر. بۇل ەكى ۇعىمداردىڭ اراسىندا تىعىز ۇندەستىك بار. ويتكەنى, تاۋەلسىزدىكتىڭ ەڭ باستى بەلگىلەرىنىڭ ءبىرى – وعان قول جەتكىزگەن مەملەكەتتىڭ ءتول ۆاليۋتاسىنىڭ بولۋى بولىپ تابىلادى. ەلىمىز ءۇشىن ۇلكەن سىن بولعان ەگەمەندىكتىڭ ەلەڭ-الاڭى مەن كۇردەلى كەزەڭىندە ءتول تەڭگەمىزدى شىعارۋ وڭاي بولا قويماعانىن ءبىز جاقسى بىلەمىز. بۇل ۇزاق اڭگىمە. ونىڭ ءبارىنىڭ جاي-جاپسارى مەن بۇگە-شەگەسىنە توقتالماي-اق قويايىن. تەك بۇل ارادا ءبىر عانا اقيقاتتى اتتاپ وتۋگە, ايتپاي كەتۋگە بولمايتىن ءبىر عانا جايت بار. بۇل – مەملەكەتتىلىكتىڭ باستى ءبىر نىشانى ىسپەتتەس ۇلتتىق ۆاليۋتامىزدىڭ شىعارىلىپ, اينالىمعا ەنگىزىلۋىنىڭ تۇڭعىش پرەزيدەنتىمىز نۇرسۇلتان نازارباەۆتىڭ ەسىمىمەن تىعىز بايلانىستى ەكەندىگى. ۇلتتىق ۆاليۋتامىزدىڭ اتاۋىن تەڭگە دەپ قويعان دا ەلباسىمىزدىڭ ءوزى ەكەنىن تاعى ءبىر قايتالاپ ايتىپ قويعانىمىزدىڭ ارتىقشىلىعى بولا قويماس. بۇل – بۇرىننان تىلدىك قورىمىزدا بار حالقىمىزدىڭ ءتول ءسوزى. ونىڭ قايتادان جاڭعىرتىلىپ, ۇلتتىق ۆاليۋتامىزدى تۇتىنىپ جۇرگەن بارشا قازاقستاندىقتاردىڭ ساناسىنا ءسىڭىرىلۋى تەك ەلباسىنىڭ ەڭبەگىنىڭ ارقاسىندا مۇمكىن بولدى. وسى تۇرعىدان قاراستىرعاندا, ەلباسىمىزدىڭ پورترەتى تاۋەلسىزدىكتىڭ 25 جىلدىعىنا ارنالعان 10 مىڭ تەڭگەلىك بانكنوتتا كورىنىس تابۋىن ادىلەتتىلىك, تاريحي ءارى زاماناۋي قاجەتتىلىك دەپ بىلەمىن.

بوريس ءىزباساروۆ,

ۇلتتىق بانك جۇيەسىنىڭ ارداگەرى باتىس قازاقستان وبلىسى