ەلباسى الماتى قالاسىنىڭ اكىمى باۋىرجان بايبەكتى قابىلدادى. كەزدەسۋدە باۋىرجان بايبەك مەملەكەت باسشىسىنا 2017 جىلى الماتىدا وتەتىن 28-ءشى دۇنيەجۇزىلىك قىسقى ۋنيۆەرسياداعا دايىندىق بارىسى تۋرالى باياندادى, دەپ حابارلايدى اقوردانىڭ ءباسپاسوز قىزمەتى.
الماتى قالاسىنىڭ اكىمى ۋنيۆەرسيادانى وتكىزۋگە دايىندىقتىڭ كەستەگە سايكەس ءجۇرىپ جاتقانىن ايتتى. سونداي-اق, ب.بايبەك قازاقستان پرەزيدەنتىنە الداعى ۋنيۆەرسياداعا الەمنىڭ 57 ەلىنىڭ وكىلدەرى قاتىسۋعا نيەت بىلدىرگەنىن مالىمدەدى. اكىمنىڭ ايتۋىنشا, حالىقارالىق ستۋدەنتتىك سپورت فەدەراتسياسى ۋنيۆەرسيادا-2017 ستۋدەنتتىك ويىندار تاريحىنداعى ەڭ ءىرى جارىس بولۋعا ءتيىس دەپ بولجاپ وتىر.
بۇدان بولەك, ب. بايبەك نۇرسۇلتان نازارباەۆتى الماتى قالاسىنىڭ الەۋمەتتىك-ەكونوميكالىق دامۋى بارىسىنان حاباردار ەتتى. بيىلعى 9 ايدىڭ قورىتىندىسى بويىنشا, قالانىڭ وڭىرلىك جالپى ءونىم كولەمى 2,8%-عا ارتقان, شاعىن جانە ورتا بيزنەستى نەسيەلەۋ 35%-عا ءوسىپ, 20 مىڭنان استام جاڭا جۇمىس ورنى اشىلعان, سونداي-اق قالانىڭ شاعىن جانە ورتا بيزنەس سۋبەكتىلەرى ءونىمىنىڭ كولەمى 30%-عا ارتقان.
كەزدەسۋ قورىتىندىسى بويىنشا ەلباسى بىرقاتار ناقتى تاپسىرما بەردى.