ورتا سالماقتا سىنعا ءتۇسىپ جۇرگەن قازاقستاندىق بوكسشى گەننادي گولوۆكين كەلەسى جىلى كەم دەگەندە ءۇش جەكپە-جەك وتكىزۋدى جوسپارلاپ وتىر. بۇل تۋرالى بوكسشىنىڭ پروموۋتەرى توم لەففلەر BoxingNewsandViews.com-عا بەرگەن سۇحباتىندا ايتتى, دەپ حابارلايدى Baq.kz.
GGG كومانداسى جەلتوقسان ايىندا امەريكالىق دەنيەل دجەيكوبسكە قارسى جەكپە-جەك ۇيىمداستىرۋعا تىرىسقان ەدى. الايدا بۇل كەزدەسۋ ۋاقىت تاپشىلىعىنا بايلانىستى كەلەسى جىلعا شەگەرىلدى.
«ءبىز دجەيكوبسپەن كەلىسسوز جۇرگىزۋدى جالعاستىرىپ جاتىرمىز. 2017 جىلى GGG ءۇشىن ەڭ كەمى ءۇش جەكپە-جەك ۇيىمداستىرۋ جوسپارىمىزدا بار. سوڭعى ءۇش جىلدا ول ءوزىن ەڭ بەلسەندى الەم چەمپيونى رەتىندە كورسەتتى»,- دەيدى لەففلەر.
ايتا كەتسەك, بيىل وتانداسىمىز بار بولعانى ەكى جەكپە-جەك وتكىزدى. ءبىرىنشى كەزدەسۋدە امەريكالىق دومينيك ۋەيدپەن جۇدىرىقتاسىپ, قارسىلاسىن نوكاۋتقا جىبەرسە, ەكىنشىسىندە بريتانيالىق كەلل برۋكتى تىزە بۇكتىردى.