پاۆلودار وبلىس ورتالىعىنداعى اسكەري-تەحنيكالىق مەكتەپتە 2017 جىلى 1 اقپاننان باستاپ تۇڭعىش رەت اسكەري ماماندىقتار تەگىن وقىتىلادى, دەپ حابارلايدى egemen.kz pavlodarnews.kz سايتىنا سىلتەمە جاساپ.
اسكەري-تەحنيكالىق مەكتەپتىڭ ديرەكتورى وماربەك ايتجانوۆتىڭ ايتۋىنشا, ءتورت ايلىق وقۋعا اسكەر جاسىنداعى ازاماتتار عانا قابىلدانادى. ولارعا قويىلاتىن باستى تالاپ - دەنساۋلىعى مىقتى, فيزيكالىق تۇرعىدان ساۋ بولۋى عانا.
«بولاشاقتا اسكەري قىزمەتكەر اتانعىسى كەلگەن جاستارعا ەسىگىمىز اشىق. جىلىنا 90 ادامدى قابىلداپ, اۆتوەلەكترمەحانيك, اسپاز, تىگىنشى, جۇرگىزۋشى سەكىلدى جۇمىسشى ماماندىقتارىن دايىندايمىز. تۇلەكتەر ەمتيحان كەزىندە بەرىلگەن تاپسىرمالاردى ويداعىداي ورىنداپ شىققان جاعدايدا عانا وسىندا وقىعانىن كۋالاندىراتىن قۇجات بەرىلەدى. كەيىن ولار ءبىر جىلدىق اسكەري مىندەتىن وتەۋگە جىبەرلەدى. ويتكەنى, قورعانىس سالاسىندا جۇمىس ىستەيتىن ادامدارعا بۇل مىندەتتى. سودان كەيىن ولار قر قورعانىس ىستەرى جونىندەگى مينيسترلىككە قاراستى كەز-كەلگەن مەكەمەگە ءوز ماماندىعى بويىنشا قىزمەتكە ورنالاسا الادى. وسىلايشا, ەلىمىزدىڭ قورعانىس كۇشتەرىنە قاجەتتى اسكەري-تەحنيكالىق ماماندىقتارعا دەگەن سۇرانىستى ورىندايتىن بولامىز. وقۋعا نيەت ءبىلدىرىپ, قۇجات تاپسىرعان ازاماتتار الدىن الا ىرىكتەۋدەن وتەدى», - دەيدى وماربەك ايتجانوۆ.