كەلەسى جىلى الماتى جولدارىندا 1000-نان استام ۆيدەوكامەرا ورناتىلادى. بۇل تۋرالى الماتى قالاسىنىڭ اكىمى باۋىرجان بايبەك, مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى توراعاسىنىڭ ورىنباسارى اليك ىشپەكباەۆ, اكىمدىك, ورتالىق مەمورگانداردىڭ اۋماقتىق دەپارتامەنتتەرى جانە «نۇر وتان» پارتياسى وكىلدەرى قاتىسقان سىبايلاس جەمقورلىققا قارسى ءىس-ارەكەت ماسەلەلەرى بويىنشا وتكەن ماجىلىستە ايتىلدى.
وسىلايشا, سىبايلاس جەمقورلىققا جول بەرمەۋ, جولداردا پوليتسەيلەرمەن بايلانىستى بولدىرماۋ ءۇشىن 2017 جىلى قالا كوشەلەرىنە مىڭنان استام بەينەكامەرا ورناتىلادى.
«جەمقورلىق تاقىرىبى مەملەكەتتى عانا ەمەس, قوعامدى دا الاڭداتۋدا. بۇل كۇللى ەلدىڭ پروبلەماسى. الەمدە 123-ءشى ورىندامىز. بۇل جەمقورلىق دەڭگەيى ەلدە جوعارى دەگەندى بىلدىرەدى. سىبايلاس جەمقورلىققا قارسى ساياساتتىڭ ارقاسىندا 2014-2016 جىلدارى 17 ساتىعا كوتەرىلدىك. سوڭعى 1 جىل 9 ايدا 660 لاۋازىمدى تۇلعاعا ايىپپۇل سالىندى. وسىلايشا, وتكەن جىلى بيۋدجەتكە 3,5 ملرد. تەڭگە كەلىپ ءتۇستى. اگەنتتىك توراعاسىنىڭ ورىنباسارى اتاپ وتكەندەي, كورسەتىلگەن مەرزىمدە ايىپپۇل تولەمەيتىن قىزمەتشىلەر باس بوستاندىعىنان ايىرۋ تۇرىندە جازاعا تارتىلادى. وسى كەزەڭدە 924 مەملەكەتتىك قىزمەتشىنىڭ مۇلكى تاركىلەندى, 1210 - ءومىر بويى مەملەكەتتىك قىزمەتتە جۇمىس ىستەۋ قۇقىعىنان ايىرىلدى», - دەدى ەلدەگى سىبايلاس جەمقورلىق قۇقىق بۇزۋشىلىق ستاتيستيكاسىن جاريالاعان ا. ىشپەكپاەۆ.