الماتى قالاسى توتەنشە جاعدايلار دەپارتامەنتىنىڭ احۋالدىق زالىندا ون بالانى قۇتقارعان اۆتوبۋس جۇرگىزۋشىسىنىڭ قۇرمەتىنە سالتاناتتى شارا وتكىزىلدى. ماراپاتتاۋ راسىمىنە ونىڭ ارىپتەستەرى, «Green Bus» جشس الماتى قالاسى №1 كوممۋنالدىق اۆتوبۋس پاركىنىڭ قىزمەتكەرلەرى قاتىستى.
ادام ءومىرىن قۇتقارۋ كەزىندە كورسەتكەن ەرلىگى مەن باتىلدىعى ءۇشىن ازامات ساعىنوۆتى ءىىم توتەنشە جاعدايلار كوميتەتىنىڭ الماتى قالاسى بويىنشا توتەنشە جاعدايلار دەپارتامەنتىنىڭ باستىعى سەرىك اۋباكىروۆ العىس حاتپەن ماراپاتتادى.
«بۇل – ادامداردى قۇتقارۋ ءۇشىن قولدان كەلگەننىڭ ءبارىن جاسايتىن ناعىز قازاقستاندىق ازاماتتىڭ ءىس-ارەكەتى», دەپ اتاپ ءوتتى سەرىك عابدوللا ۇلى.
ايتا كەتسەك, 2016 جىلعى 6 قازاندا ساعات 15.00 شاماسىندا دوستىق داڭعىلىندا №29 باعىتتاعى اۆتوبۋس ورتەنگەن ەدى. سوندا جۇرگىزۋشى ازامات ساعىنوۆ بالالاردى جالىن قۇشاعىنان قۇتقارىپ, ءورتتى سوندىرگەن.
ميرا بايبەك,
«ەگەمەن قازاقستان»
الماتى