تاياۋدا باتىس قازاقستان وبلىسىنىڭ ورتالىعىندا كەزەكتى سەنبىلىك ءوتتى. وسى شارا بارىسىندا بايىرعى ورالدىڭ جاسىل جەلەگىنە 250-دەن استام جاڭا «تۇرعىن» قوسىلدى. ولاردىڭ اراسىندا جالپاق جاپىراقتى دا, قىلقان جاپىراقتى دا اعاش ءتۇرى بارشىلىق. ءۇشبۋ سەنبىلىككە وزگە ورالدىقتارعا قوسا, وبلىستىق ەتنومادەني بىرلەستىكتەرىنىڭ وكىلدەرى دە بىلەك سىبانىپ, بەلسەندى اتسالىستى.
ماسەلەن, ءبىزدىڭ وبلىستى مەكەندەگەن ازەربايجانداردىڭ «بىرلىك» مادەني-اعارتۋ قوعامىنىڭ ءتوراعاسى نادجاف مامەدوۆ پەن قازاقستان حالقى اسسامبلەياسىنىڭ مۇشەسى, وبلىستىق ءماسليحاتتىڭ دەپۋتاتى, ورال وڭىرىندەگى ارميانداردىڭ «مازيس» ەتنومادەني بىرلەستىگىنىڭ توراعاسى اۆەتيك اميرحانيان (وڭ جاقتا) ەكەۋى تىزە قوسىپ, شىرشا كوشەتىن وتىرعىزدى.
ارمەنيا مەن ازەربايجان كوپ جىلدان بەرى جەر ماسەلەسىنە قاتىستى قىرعي قاباق جاعدايدا ەكەندىگى ءمالىم. ال مىنا فوتوكادردا قاسيەتتى قازاق جەرىن قۇتتى مەكەن سانايتىن ارميان مەن ازەربايجاننىڭ بىرلەسىپ كوشەت ەككەندىگى بەينەلەنگەن. ەندەشە, وتانىمىزدىڭ ۇلى مارتەبەلى تاۋەلسىزدىگىنىڭ 25 جىلدىق مەرەيتويىنا وراي كۇنى كەشە وتىرعىزىلعان شوجە-شىرشا دوستىقتىڭ شىنارىنا اينالسىن دەپ تىلەيىك!
باۋىرجان عۇبايدۋللين,
جۋرناليست
ورال