جامبىل كۇرەس مەكتەبىنىڭ تاربيەشىسى مەيىرجان ءاشىروۆ ستۋدەنتتەر اراسىندا 65 كەلى سالماق دارەجەسىندەگى الەم چەمپيونى اتاندى.
بۇل كۇندەرى تۇركيالىق چورۋم قالاسىندا ستۋدەنتتەر اراسىندا ەركىن, گرەك-ريم جانە ايەلدەر اراسىنداعى كۇرەس بويىنشا جارىستار ءوتىپ جاتىر. ەركىن كۇرەس بويىنشا قازاقستان قۇراماسىنا كىرگەندەر: تيمۋر ايتقۇلوۆ (61 كگ), مەيىرجان ءاشىروۆ (65 كگ), ازات ساقاەۆ (70 كگ), بولات ساقاەۆ (74 كگ), ادىلەت داۆلۋمباەۆ (86 كگ) جانە باقداۋلەت المەنتاي (97 كگ).
گرەك-ريم كۇرەسى بويىنشا ەل نامىسىن ەرنۇر فيداحمەتوۆ (59 كگ), دەمەۋ جادىراەۆ (71 كگ) جانە انتون ساۆەنكو (130 كگ) قورعايدى. جارىستىڭ ءبىرىنشى كۇنى 57, 65, 74, 97 كگ سالماق دارەجەسىندە سپورتشىلار ەركىن كۇرەس بويىنشا سىنعا ءتۇستى. بۇل كۇنى ەل نامىسىن قورعاعان ەكى پالۋاننىڭ ءبىرى مەيىرجان ءاشىروۆ فينالعا شىقتى. شەشۋشى سىندا مەيىرجان مولداۆيا وكىلىمەن كەزدەسىپ, ماتچتى 10-7 ەسەبىمەن ءوز پايداسىنا اياقتادى. بۇگىن چورۋمدا 61, 70, 86 جانە 125 كگ سالماق دارەجەسىندەگى سپورتشىلار سىنعا تۇسەدى.