ءومىر جولى تاقتايداي تەگىس بولا بەرمەيتىنى بار. تاعدىر تالايىڭدى تاپ باسىپ بولجاۋ دا قيىن, الدىڭنان نە كۇتىپ تۇرعانىن كىم بىلگەن. اسىرەسە, جاستىق شاقتا ءبارى كوڭىلدەگىدەي بولاتىنىنا سەنىممەن ءومىر سۇرەتىنىڭ جاسىرىن ەمەس. «پاندۋس - وك» جشس ديرەكتورى شاحان جولداسباەۆتىڭ ارمانى بيىك, بولاشاعىنا ۇلكەن ۇمىتپەن قارايتىن. ول دا ەل قاتارلى مەكتەپ ءبىتىردى. قازاق كولىك جانە كوممۋنيكاتسيا اكادەمياسىنا ءتۇسىپ, كەيىن ق.جۇبانوۆ اتىنداعى اقتوبە مەملەكەتتىك ۋنيۆەرسيتەتىنە اۋىسىپ, ينجەنەر-مەحانيك ماماندىعىن الىپ شىقتى. «سپانجان» جشس-ىندە ماماندىعى بويىنشا ەڭبەك جولىن باستادى. اسكەرگە دە باردى. ودان كەلگەن سوڭ قورشاعان ورتانى قورعاۋ مينيسترلىگىندە ەڭبەك ەتتى. ءبىر سوزبەن ايتقاندا ارمانشىل جاستىڭ ايى وڭىنان تۋىپ, العى كۇندەرگە جوبا-جوسپارلارى دا جارقىن بولاتىن.
جولداستارىمەن بۋرابايعا دەمالۋعا بارا جاتىپ كولىك اپاتىنا ۇشىراعان شاحان باسىنا مۇنداي اۋىرتپالىق تۇسەدى دەپ استە دە ويلاعان ەمەس. جاقىن ماڭداعى ماكينكا اۋىلىنداعى اۋرۋحاناعا جەتكىزىلگەن ونىڭ جاعدايى اۋىر ەدى. ەلوردادان جەدەل جەتكەن دارىگەرلەر بۇل جەردە كۇردەلى وتا جاساۋدىڭ مۇمكىندىگى جوق ەكەنىن ايتىپ, رەانوموبيلمەن استاناعا اكەلىپ, ءبىر كۇننەن كەيىن وتا جاساپتى. ورىندىققا وتىرۋ مۇڭعا اينالدى, باسىن كوتەرۋگە زار بولدى. مۇنداي قيامەت-قايىمدى ەش ادامنىڭ باسىنا بەرمەسىن. اق حالاتتى اسىل جاندار مەن تۋعاندارىنىڭ ايالى الاقانى عانا ىلگەرى كۇنگە ءۇمىت ءجىبىن جالعادى. ءبىر جىل توسەككە تاڭىلعان جاس جىگىت سوندا دا ومىرگە دەگەن قۇشتارلىعىن جوعالتپادى. نوۆوسىبىردەگى وڭالتۋ ورتالىعىنا ەكى-ءۇش رەت باردى. ونداعى بىلىكتى دارىگەرلەر وتانىڭ وتە ءساتتى جاسالعانىن ايتىپ كوڭىلىن دەمەدى, سەنىمگە قانات ءبىتىردى.
– ەكى جىلدان كەيىن قولارباعا وتىرۋعا مۇمكىندىگىم كەلگەن سوڭ بارىپ, قىتايدا ەمدەلسەم قايتەدى دەگەن وي كەلدى. قاسىم مەن قاباعىما قارايتىن قارىنداسىم گۇلشاحان «اقتوبە قالالىق سال اۋرۋلارىنا شالدىققان ازاماتتاردى قولداۋ ورتالىعى» قوعامدىق بىرلەستىگىنىڭ ءتورايىمى قۇرالاي بايمەنوۆاعا جولىعىپ, اقىل-كەڭەس الۋعا قول جەتكىزدىم. شىنى كەرەك, ول كىسى بىرلەستىكتە جۇمىس ىستەۋگە ۇسىنىس بەردى. مەن دەنساۋلىعىما قاراي الماي قالامىن با دەپ, ءبىراز ۋاقىت باس تارتتىم. ەكىنشى ءبىر كەلگەنىمدە: «سەن قىسىلما, كۋرستاستارىڭ دا, جولداستارىڭ دا سەنىڭ ءحالىڭدى بىلەدى. جۇمىس ىستەسەڭ كوڭىلىڭ بولىنەدى, قولارباعا تاڭىلىپ قالعانىڭا تومەنشىكتەپ, جاسىمايسىڭ», دەدى. ءسويتىپ كومپيۋتەرمەن جۇمىس ىستەپ, «يۋتۋب» سايت-ارناسىن اشتىم. جوبالار جاساۋمەن اينالىستىم. «قالا – مەنىڭ كوزىممەن» دەگەن شاعىن بەينەروليكتەردى شىعارىپ ءجۇردىم. ءبىز قالاداعى مەكەمەلەر مەن ۇيىمدارداعى پاندۋس ماسەلەسىنە ارنالعان شاراعا قاتىستىق. سوندا قۇرىلىس سالاسىنىڭ جاۋاپتى مامانى ءبىزدىڭ اتاپ كورسەتكەن كەمشىلىكتەرىمىزدى مويىنداماي, ءبارى ساراپتامادان وتكەن دەپ بوي بەرمەدى. مەنىڭ ويىما «نە سترويتە دليا ناس, بەز ناس» دەگەن يدەيا كەلدى. ءسويتىپ عيماراتتارعا پاندۋس ورناتۋمەن اينالىسۋعا بەل بۋدىم, – دەيدى ول.
ارينە, بۇل شارۋانى باستاپ كەتۋ وعان وڭايعا تۇسكەن جوق. وسىنداي كەزدە تانىسى گۇلنار ەدىگەەۆانىڭ ۇسىنىسىمەن قولارباعا تاڭىلعان جاس جىگىت وسىدان ەكى جىل بۇرىن «اتامەكەن-ستارتاپ» بيزنەس جوبالار بايقاۋىنا قاتىسىپ, «التىن قىران» حالىقارالىق كورپوراتيۆتىك قايىرىمدىلىق قورى ۇسىنعان 2 ميلليون تەڭگە قايتارىمدى گرانتقا يە بولادى. بايقاۋعا قاتىسقان 300-گە جۋىق كوماندانىڭ ىشىنەن تاڭدالعانداردىڭ قاتارىندا بولعانى كوڭىلگە سەنىم ۇيالاتتى. ونىڭ قاسىندا قۇرىلىس سالاسىندا ەڭبەك ەتەتىن قارىنداسى گۇلشاحان دا ءجۇردى. ءوز ءىسىن باستاۋعا مۇمكىندىك العانىنا قۋاندى. «پاندۋس-وك» جشس- ءىن تىركەتتى. شاحاننىڭ مۇنداي جوباسىن جۇزەگە اسىرۋعا وبلىستىق كاسىپكەرلەر پالاتاسى دا قولداۋ كورسەتكەن. پاندۋس قۇرىلىستارىمەن اينالىسۋعا رۇقسات بەرەتىن ءۇشىنشى ساناتتى ليتسەنزيا الۋعا, بۋحگالتەرلىك ەسەپ جۇرگىزۋ, كەلىسىمشارتتار جاساسۋ ماسەلەسىندە دە كومەك قولدارىن سوزعان.
– پاندۋستاردىڭ ىڭعايلىلىعىن مۇگەدەك جاندار عانا تاپ باسىپ تانيدى. عيماراتتارعا بىزبەن كەڭەسپەي, پاندۋس سالماعان دۇرىس. ءبىز «نە سترويتە دليا ناس, بەز ناس!» ۇرانىن ۇستانامىز. ەگەر قالادا پايدالانۋعا بەرىلىپ جاتقان عيماراتتارداعى پاندۋستار مۇگەدەكتەردىڭ قوعامدىق ۇيىمدارى مۇشەلەرىنىڭ قاتىسۋىمەن جۇزەگە اسىرىلسا, بۇگىندە مۇنداي ماسەلە ورىن الماس ەدى. وبلىستا پاندۋس ماسەلەسى تۇپكىلىكتى شەشىلدى دەپ ايتا المايمىن. ماسەلەن, قازىر اقتوبە قالالىق اكىمدىگىندە, قالاداعى كوپتەگەن اۋرۋحانا عيماراتتارى الدىندا پاندۋس جوق. ءالى زەرتتەۋ كەرەك, بۇل باعىتتا كوپ جۇمىس ىستەۋ قاجەت. سەبەبى قازىر قالا عيماراتتارىندا پاندۋستار تالاپقا ساي سالىنبايدى. پاندۋستاردىڭ كولبەۋلىگى تىم تىك بولىپ كەلەدى. ءتىپتى كوتەرىلىپ كەلە جاتقاندا ۇستايتىن ۇستاعىشى دا بولمايدى. ءسويتىپ, ءوزى قولارباعا تاڭىلعان جانداردىڭ قيمىل-قوزعالىسىنا قيىندىق تۋادى. ايتەۋىر, ءتيىستى ورىنداردان ءسوز ەستىمەسەك بولدى دەپ كوزالداۋشىلىققا بارادى, – دەيدى شاحان.
«پاندۋس-وك» جاۋاپكەرشىلىگى شەكتەۋلى سەرىكتەستىگىنىڭ ديرەكتورى شاحان جولداسباەۆتىڭ ايتۋىنشا, قازىر اقتوبەدەگى 130-عا جۋىق مەملەكەتتىك مەكەمەدە نە پاندۋس جوق, بولماسا تالاپقا ساي كەلمەيدى. ول پاندۋستىڭ جوبالارىن ۇسىنىپ, تەندەرلەرگە قاتىسادى. مۇمكىندىگى شەكتەۋلى جاندارعا قاجەتتى باسقا جوبالاردى جۇزەگە اسىرۋدى قولعا الۋدا. بۇگىندە شاحاندى اۋدانداعى تاعدىرلاستارىنىڭ جايى دا الاڭداتادى. پاندۋس ماسەلەسىمەن ول حرومتاۋ, مارتوك اۋداندارىندا بولىپ, ونداعى مەملەكەتتىك مەكەمە باسشىلارىمەن كەزدەسىپتى. ءوز جوباسىن تانىستىرعان..
قازىر ول باسقاراتىن سەرىكتەستىكتە 4 ادام ەڭبەك ەتەدى. وسى ەكى جىلدىڭ ىشىندە 8 عيماراتقا پاندۋس ورناتىپتى. بيىل دا تەندەرگە قاتىسۋدا, جۇمىس بولاتىن شىعار دەپ ۇمىتتەنەدى. پاندۋس ورناتۋعا قاجەتتى قۇرال-جابدىقتارى جەتكىلىكتى. قالالىق اكىمدىك عيماراتىنا پاندۋس ورناتامىز با دەپ ۇمىتتەنىپ وتىر.
ءبىز ونى جىگەرى جاسىماعان جىگىت دەپ بەكەر ايتىپ وتىرعانىمىز جوق ول 2011 جىلدان بەرى سۋدا ءجۇزۋ سپورتىنان مۇمكىندىگى شەكتەۋلى جاندار اراسىنداعى ەل بىرىنشىلىكتەرىنە ۇدايى قاتىسىپ كەلەدى. ءبىر جىلدان كەيىن ەل بىرىنشىلىگىندە ءۇشىنشى ورىن يەلەندى. 2015 جىلى سۋدا ءجۇزۋ سپورتىنان ءۇش قاشىقتىقتا سىنعا ءتۇسىپ, ءۇش بىردەي التىن مەدالعا يە بولدى, سۋعا جۇزۋدەن سپورت شەبەرى. ول 2015 جىلى «وبلىستىڭ جىل ادامى» اتاندى.
زايىبى ءلاززات قارشىعاقىزى دا وسى قوعامدىق بىرلەستىكتە ەڭبەك ەتەدى. اياۋلى اناسى بيباتپانىڭ, قارىنداستارى گۇلشاحان جانە شاحيرانىڭ بۇلار دەگەندە جانى بولەك. سوندىقتان دا بولار ءوزىن قوعامنىڭ تولىققاندى مۇشەسىندەي سەزىنىپ, جاڭا جوبالاردى جۇزەگە اسىرۋعا تالابى زور. قوعامدىق جۇمىستاردىڭ دا بەل ورتاسىندا جۇرەدى.تىنىمسىز ەڭبەك پەن ۇنەمى ىزدەنىس ونى جاڭا يدەيالارعا جەتەلەيتىنىن سەزىنگەن سايىن ومىرگە دەگەن قۇشتارلىعى ارتا تۇسەدى. بۇل جىگەرلى جىگىتتىڭ ومىرلىك ۇستانىمى, العا جەتەلەگەن اق قانات ارمانى دەۋ ورىندى.
ساتىبالدى ءساۋىرباي,
«ەگەمەن قازاقستان»
اقتوبە وبلىسى