ۇيالى بايلانىس وپەراتورى «قىزىل جارتى ايمەن» بىرىگىپ كومەكتەسەدى
بۇل باستامانىڭ ناتيجەسى بولاشاقتىڭ ەنشىسىندە. قازىرگە «كسەll» كومپانياسى «قازاقستان رەسپۋبليكاسىنىڭ «قىزىل جارتى اي قوعامى» قوعامدىق قورىمەن بىرلەسىپ, تابيعي اپاتتار كەزىندە زارداپ شەككەندەرگە گۋمانيتارلىق كومەك كورسەتۋگە ارنالعان SMS جاردەم جيناۋ ءۇشىن 9777 قىسقا ءنومىرىن ىسكە قوستى.
بۇل جوبا قازاقستاندىقتارعا الەمدەگى ەڭ ءىرى گۋمانيتارلىق قوزعالىستىڭ ءبىر بولىگىنە اينالۋعا, سونداي-اق تابيعي جانە تەحنوگەندىك اپاتتار اۋماعىنداعى وتانداستارىنا كومەك كورسەتۋگە ءمۇمكىندىك بەرەدى. جاردەم كورسەتۋ ءۇشىن Kcell نەمەسە Activ ابونەنتتەرىنە كەز كەلگەن ءماتىنى بار, ياعني بوس ەمەس حابارلامانى 9777 نومىرىنە جىبەرۋ كەرەك. ءبىر SMS قۇنى 200 تەڭگەنى قۇرايدى.
مۇنداي جاردەم ءتۇرى تابيعي اپات اۋماعىنداعى قازاقستاندىقتارعا كومەك كورسەتۋ ءۇشىن دە, «قىزىل جارتى اي» باقىلاۋىنداعى گۋمانيتارلىق كومەك قويماسىن قالىپتاستىرۋ ءۇشىن دە قابىلدانادى.
«زارداپ شەككەندەرگە كومەك قولىن سوزعىسى كەلەتىن ادامدار بىزگە تۇراقتى تۇردە حابارلاسىپ تۇرادى. اسىرەسە, مۇنداي جاعداي قاراعاندى وبلىسىنداعى سۋ تاسقىنى نەمەسە وتكەن جىلعى الماتىداعى سەل كەزىندە انىق بايقالدى. ەندى مۇنداي جاردەمدى وڭاي جولمەن كورسەتۋگە بولادى. گۋمانيتارلىق كومەك كورسەتۋ ماقساتىندا قاراجات جيناۋعا ارنالعان ارنايى ءنومىر جۇمىسىن ۇزبەيدى, ياعني ءار قازاقستاندىق وزىنە ىڭعايلى ۋاقىتتا وتانداستارىنا قول-ۇشىن سوزا الادى. بۇل – ەلىمىز ءۇشىن وتە ماڭىزدى جوبا», – دەپ اتاپ ءوتتى «قازاقستان قىزىل جارتى اي» قوعامدىق قورىنىڭ ديرەكتورى ەلەنا كيم.
ساۋاپتى جوبانىڭ باستالۋىنا بايلانىستى شارا اياسىندا ءباسپاسوز ءماسليحاتى ءوتىپ, جۋرناليستەر مەن شاقىرىلعان قوناقتار ءۇشىن ارنايى شەبەرلىك-ساباقتارى ۇيىمداستىرىلدى. «قىزىل جارتى اي» قىزمەتكەرلەرى ءزىلزالا بولعاندا, سۋ تاسقىنى مەن سەل نەمەسە ءورت كەزىندە امان قالۋ, العاشقى مەديتسينالىق جاردەم كورسەتۋ تۋرالى نەگىزگى ەرەجەلەردى ءتۇسىندىرىپ, كورسەتىپ بەرەدى.
ايناش ەسالي,
«ەگەمەن قازاقستان»
الماتى