قىتاي اۋماعىنا قازاقستاننىڭ 9 وڭىرىنەن ەت ونىمدەرىن ەكسپورتتاۋعا قويىلعان شەكتەۋ الىنىپ تاستالدى, دەپ حابارلايدى egemen.kz 24.kz-كە سىلتەمە جاساپ.
بۇعان وسى ايماقتاردىڭ اۋسىل دەرتىنەن تازا بولۋى سەبەپ. جالپى 2013 جىلدان بەرى ەلىمىزدىڭ بارلىق وڭىرىنەن قىتاي ەلىنە ەت جانە ەت ونىمدەرىن تاسىمالداۋعا تىيىم سالىنعان ەدى. ەندى وتاندىق شارۋالار تاۋارلارىن كورشى ەلگە شىعارا الادى. وڭىرلەردە ارنايى تەكسەرىس جۇرگىزگەن قىتايلىق ماماندار ەتتىڭ ساپاسىنا جوعارى باعا بەرگەن. قازىر قازاقستان قىتايعا 60 مىڭ توننا سيىر جانە 300 مىڭ توننا قوي ەتىن ەكسپورتتاۋعا دايىن. قر اشم ۆەتەرينارلىق قاداعالاۋ جانە باقىلاۋ كوميتەتى توراعاسىنىڭ ورىنباسارى ولجاس اۋساباەۆ "قازىرگى تاڭدا قىتايدان جالپى جىلدىق ەسەبىندە الاتىن بولساق, 6 ملن 800 مىڭ توننا ەت ونىمدەرى يمپورتتالىپ, وزدەرىنىڭ ەت ءوندىرۋ قابىلەتى 5 ملن 800 مىڭ توننا بولىپ سانالادى. ەسەپتەسەك, 1 ملن تونناسى دەفيتسيت بولىپ تۇر. سول ءۇشىن دە ولار قازىر شەت مەملەكەتتەردەن ەت ونىمدەرىن يمپورتتاۋعا ءماجبۇر بولىپ وتىر", - دەدى. قىتايمەن الىس-بەرىس جاندانىپ جاتقاندا رەسەيدەن ەلىمىزگە اۋىلشارۋاشىلىق ونىمدەرىن ەنگىزۋگە ۋاقىتشا تىيىم سالىندى. اۋسىل دەرتىنىڭ ۋشىعۋىنا بايلانىستى كورشى ەلدەن قوي, سيىر, دوڭىز ەتىنە جانە ءسۇت ونىمدەرىن جەتكىزۋگە شەكتەۋ قويىلدى.