قىزىلوردادا گاندبولدان ايەلدەر اراسىندا كلۋبتار ليگاسىنىڭ 1-ءشى ازيا چەمپيوناتى وتەدى. اتالمىش شارانى ازيا مەملەكەتتەرىنىڭ اراسىندا العاش بولىپ قىزىلوردا وبلىسى ۇيىمداستىرماق. بۇل تۋرالى قر گاندبول فەدەراتسياسىنىڭ اتقارۋشى ديرەكتورى رانۆير ابدۋراشيتوۆ باق وكىلدەرىنە ارنالعان ءباسپاسوز-كونفەرەنتسياسىندا باياندادى.
«گاندبولدان ايەلدەر اراسىنداعى كلۋبتار ليگاسىنىڭ العاش رەت ءبىزدىڭ ەلىمىزدە وتكىزىلۋى تەك قازاقستان ءۇشىن عانا ەمەس, سونىمەن قاتار ازيا مەملەكەتتەرى ءۇشىن دە ۇلكەن جاڭالىق بولىپ وتىر. بۇگىنگى كۇنى بۇل سايىسقا كاتار, يران, وزبەكستان جانە قازاقستاننان جالپى سانى 6 كوماندا قاتىسادى. ءوز كەزەگىندە جارىسقا قاتىسۋشى كوماندالاردىڭ بارلىعى دا جەڭىس جولىندا لايىقتى باسەكە كورسەتەدى دەپ سەنەمىز. جالپى بۇل سايىستىڭ ازيا مەملەكەتتەرى اراسىندا العاش بوپ قىزىلوردا وبلىسىندا وتكىزىلۋى - ءبىزدىڭ ەلىمىزدەگى گاندبول سپورتىنىڭ دامۋ قارقىنىنىڭ جوعارعى دارەجەدە ەكەندىگىن بايقاتادى», - دەدى قر گاندبول فەدەراتسياسىنىڭ اتقارۋشى ديرەكتورى رانۆير ابدۋراشيتوۆ.
26 قازان - 1 قاراشا ارالىعىندا وتەتىن سايىستا ەل نامىسىن «الماتى», «ىلە» جانە قىزىلوردالىق «قايسار» كوماندالارى قورعايتىن بولادى.