ەلىمىزدىڭ ەكونوميكالىق وسىمىنە وڭىرلەردىڭ ۇلەسى انىقتالدى. وڭىرلىك بولىنىستە ونەركاسىپ ونىمدەرى شىعارىلىمى 9 وڭىردە ءوسىپ, 7 وڭىردە تومەندەگەن. بۇل تۋرالى بۇگىن ۇكىمەت وتىرىسىندا ۇلتتىق ەكونوميكا ءمينيسترى ق.بيشىمباەۆ ايتتى دەپ حابارلايدى egemen.kz.
كوشباسشى ۇشتىككە 5,2%-دىق وسۋمەن قاراعاندى وبلىسى, 4,9%-دىق وسۋمەن وڭتۇستىك قازاقستان وبلىسى, 4,5%-دىق وسۋمەن اقمولا وبلىسى كىردى. ەڭ كوپ تومەندەۋ قىزىلوردا وبلىسىندا (10,0%), ماڭعىستاۋ وبلىسىندا (3,6%), اقتوبە جانە باتىس قازاقستان وبلىستارىندا (2,5%) بايقالىپ وتىر. 2016 جىلعى قاڭتار-قىركۇيەكتە وڭدەۋ ونەركاسىبىنىڭ ءوسۋى 0,6% بولدى. وڭدەۋ بولىنىسىندە مەتاللۋرگيا ونىمدەرىن ءوندىرۋ 7,8%-عا, اعاش بۇيىمدارى – 8,7%-عا, تاماق ونىمدەرى – 3,5%-عا, ءدارى-دارمەك پرەپاراتتارى – 2,1%-عا, رەزەڭكە جانە پلاستماسسا – 1,8%-عا, سونداي-اق مۇناي وڭدەۋ – 0,4%-عا ءوستى.
وڭدەۋ ونەركاسىبىندەگى وسۋگە ماشينا جاساۋ سالاسىندا ءوندىرىستىڭ تومەندەۋى (18,6%) تەجەۋشى ىقپال ەتۋدە.
دينارا بىتىكوۆا