پەتروپاۆل قالاسىندا وتكەن «تاۋەلسىزدىكتىڭ جاس جۇلدىزدارى» اتتى فورۋم ەگەمەندىگىمىزدىڭ شيرەك عاسىرلىق مەرەيتويىنا ارنالىپ, وعان ايماق باسشىسى ەرىك سۇلتانوۆ قاتىستى.
ءوڭىردىڭ جاڭاشىل, بەلسەندى جاس وكىلدەرىنىڭ باسىن قوسقان ءىس-شارادا سويلەگەن سوزىندە ەرىك حامزا ۇلى جاس ۇرپاق بويىنا قازاقستاندىق ءپاتريوتيزمدى ۇيالاتۋ, سالاماتتى ءومىر سالتىنا ءتاربيەلەۋ, جۇمىسپەن قامتۋ مەملەكەتتىك ساياساتتىڭ باسىم باعىتى سانالاتىنىن, ال اعا بۋىننىڭ جاقسى داستۇرلەرىن جالعاستىرۋ, وتانعا قالتقىسىز قىزمەت ەتۋ ولار ءۇشىن باستى مىندەت بولىپ تابىلاتىنىن اتاپ كورسەتتى. وسكەلەڭ ۇرپاق مەملەكەتتىڭ قولداۋى مەن قامقورلىعىن ايرىقشا سەزىنىپ وتىر. ولار ەلباسىنىڭ «ەركىن ەلدە وسكەن ۇرپاقتىڭ رۋحى ءاردايىم بيىك بولۋى ءتيىس. جاستارى جالىن جۇرەكتى, ءورشىل, نامىستى, بيىك رۋحتى بولسا, ول ەلدىڭ ەڭسەسى دە بيىك بولادى» دەگەن اتالى ءسوزىن ەستەن شىعارمايدى. «جاسىل ەل» باعدارلاماسى ءجۇزەگە اسىرىلعالى وڭىردە 15 مىڭعا جۋىق ادام جۇمىسقا ورنالاسقان. 2146 جاس «جۇمىسپەن قامتۋدىڭ جول كارتاسى-2020» جوباسىنا قاتىسقان. ەلدى مەكەندەرگە جولدامامەن كەلگەن ءبىر مىڭعا جۋىق مامانعا 134 ميلليون تەڭگە وتەماقى, 540 قاتىسۋشىعا 1,3 ميلليارد تەڭگە نەسيە بەرىلگەن.
فورۋمدا ەتنومادەني بىرلەستىكتەرىنىڭ, ۇكىمەتتىك ەمەس ۇيىمداردىڭ وكىلدەرى, تاۋەلسىزدىك قۇرداستارى, «سەرپىن-2050», «ديپلوممەن – اۋىلعا!» باعدارلامالارىنا قاتىسۋشىلار ءوز ويلارىن ورتاعا سالىپ, اسەرلى اڭگىمەلەرمەن ءبولىستى. قوعامنىڭ ءارتۇرلى سالاسىندا جەمىستى ەڭبەك ەتىپ جۇرگەن ءبىر توپ ورەنگە قۇرمەت
گراموتالارى مەن العىس حاتتار تابىس ەتىلدى.
«جاس دارىن» اتالىمى بويىنشا پوگودين اتىنداعى ورىس دراما تەاترىنىڭ رەجيسسەرى تيمۋر كارىمجانوۆ ەڭ ءۇزدىك دەپ تانىلدى. ول اتالمىش ونەر وشاعىندا التى جىل جۇمىس ىستەيدى. وسى ارالىقتا كوپتەگەن قويىلىمدى ساحنالاپ, كورەرمەندەر ءىلتيپاتىنا بولەنگەن. «جاس باتىر» اتالىمى م.جۇماباەۆ اۋدانىنان كەلگەن يۆان گوربالعا بۇيىردى. وتقا ورانعان ۇيگە كىرىپ, ءۇش بالانى قۇتقارۋى قانداي ماراپاتقا بولسىن لايىق. «ەڭ ۇزدىك الەۋمەتتىك جوبا» اتالىمىنا «ۋلىبكا» قايىرىمدىلىق قورى يە بولدى.
پىكىرتالاس الاڭىندا جاستار ۇيىمدارى مەن قوزعالىستارىنىڭ قىزمەتى, «جاس كاسىپكەرلەر», «ءتيىمدى مەملەكەتتىك باسقارۋ» تاقىرىپتارى تالقىعا سالىنىپ, وزەكتى پروبلەمالار قوزعالدى.
تۇعىرلى تاۋەلسىزدىكتىڭ 25 جىلدىعىنا ارنالعان شارا وتان, ەل, جەر تۋرالى پاتريوتتىق اندەرگە ۇلاستى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى