بۇگىن الماتىداعى تەرگەۋ اباقتىسىندا رۋسلان كۇلەكباەۆتىڭ ىسىنە قاتىستى سوت تىڭداۋى ءوتىپ جاتىر, دەپ حابارلايدى "ەگەمەن-اقپارات" قازاقپاراتقا سىلتەمە جاساپ.
الماتى قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنا ر.كۇلەكباەۆقا قاتىستى قىلمىستىق ءىستى اتالعان سوت سۋدياسى ەرلان بولاتوۆ جۇرگىزىپ جاتىر. كۇلەكباەۆ بىرنەشە قانقۇيلى توناۋ جانە قاراقشىلىق ارەكەتتەرگە قاتىستى بولىپ وتىر. تەرگەۋ توبى 57 سوت ساراپتاماسى مەن زەرتتەۋلەر جۇرگىزدى جانە بولعان وقيعانىڭ بارلىق جايتتەرىن انىقتاۋ ماقساتىندا 200-دەن استام كۋاگەرلەر مەن وقيعانى كورگەن ادامداردى تەرگەدى. 2016 جىلدىڭ 12 قازانىندا 61 تومنان تۇراتىن قىلمىستىق ءىستىڭ ماتەريالدارىن زەرتتەۋ ناتيجەسى بويىنشا, سوتقا كۇلەكباەۆ پەن وزگە دە ازاماتتار جولداندى. ر.كۇلەكباەۆقا ناتيجەسى 8 قۇقىق قورعاۋ جانە ارنايى ورگانداردىڭ قىزمەتكەرلەرىنىڭ جانە 2 بەيبىت تۇرعىننىڭ ولىمىنە الىپ كەلگەن تەرروريستىك اكت جاسادى دەگەن ايىپ تاعىلدى. سونىمەن قاتار ول 3 بەيىبىت تۇرعىندى ولتىرمەك بولدى دەپ ايىپتالىپ وتىر.
ناقتىراق ايتقاندا, ايىپتالۋشىعا قاتىستى قر قىلمىستىق كودەكسىنىڭ (قر قك) 255-بابى 4-تارماعى (لاڭكەستىك اكت), 99-بابى 2-تارماعى (ەكى نەمەسە ودان دا كوپ ادامدى ءولتىرۋ), 24-بابىنىڭ 3-تارماعى ء(ولتىرۋ ءۇشىن شابۋىل جاساۋ), 192-باپ 4-تارماق (توپ ادامعا قاراقشىلىق شابۋىل), 287-باپ 4-تارماق (زاڭسىز قارۋ تاسىمالداۋ), 288-باپ 2-تارماق (قارۋدى زاڭسىز جاساۋ), 291-باپ 4-تارماق (قارۋ ۇرلاۋ), 200-باپ 4-تارماق (كولىك ۇرلاۋ), 126-باپ 2-تارماق (ادامدى زاڭسىز باس بوستاندىعىنان ايىرۋ) بويىنشا قىلمىستىق ءىس قوزعالعان.
سونداي-اق ر.كۇلەكباەۆپەن بىرگە سوتقا اتىس قارۋىن زاڭسىز ساقتاپ, وزىمەن بىرگە الىپ ءجۇرىپ, دايىنداپ, ر.كۇلەكباەۆپەن بىرگە م. اتتى كاسىپكەردىڭ ۇيىنە قاراقشىلىق شابۋىل ۇيىمداستىرعان ر.ليۋ, ج.ساپاربەكوۆ, د.اسەمبەك ۇلى, ە.قۇسايىنوۆ, ن.ءابدىمومىن دا سوتقا بەرىلدى.
ايىپتالۋشى ن.ابدىمومىنعا رۇقساتسىز قالادان كەتۋىنە تىيىم سالىنعان. ر.ليۋعا قاتىستى قر قك 188-بابىنىڭ 4-تارماعى, 288-بابىنىڭ 1-تارماعى, 287-بابىنىڭ 4-تارماعىنا قاتىستى قىلمىستىق ءىس قوزعالدى. ج. ساپاربەكوۆتىڭ ۇستىنەن قر قك 192-بابى 4-تارماعى; 287-باپ 4-تارماق بويىنشا قىلمىستىق ءىس قوزعالدى. ە. قۇسايىنوۆقا قاتىستى قر قك 192-بابىنىڭ 4-تارماعى بويىنشا, د. اسەمبەك ۇلىنا قاتىستى قر قك 192-بابىنىڭ 4-تارماعى, ن. ابدىمومىنعا قاتىستى قر قك 287-بابىنىڭ 4-تارماعى بويىنشا قىلمىستىق ءىس قوزعالدى.