قر تاۋەلسىزدىگىنىڭ 25 جىلدىعىن مەرەكەلەۋ قارساڭىندا ماريبور قالاسىندا (سلوۆەنيا) قازاقستان رەسپۋبليكاسىنىڭ قۇرمەتتى كونسۋلدىعى اشىلدى.
شاراعا سلوۆەنيا سىرتقى ساياسات ۆەدومستۆوسىنىڭ وكىلدەرى, ماريبور قالاسىنىڭ باسشىلىعى, ىسكەري جانە مادەني ورتا, كونسۋلدىق كورپۋس پەن باق وكىلدەرى قاتىستى. بۇل تۋرالى primeminister.kz حابارلادى.
اۆستريا مەن سلوۆەنياداعى قازاقستان ەلشىسى قايرات سارىباي قۇرمەتتى كونسۋل گورازد شيفرەرگە كونسۋلدىق پاتەنت تاپسىرىپ, ونىڭ ەكى ەل اراسىنداعى بايلانىستىڭ نىعايۋىنا ەلەۋلى ۇلەس قوساتىنىنا سەنىم ءبىلدىردى. قازاقستاندىق ديپلومات ەكىجاقتى قاتىناستاردىڭ كەلەشەگى تۋرالى ايتا وتىرىپ, قازاقستاننىڭ سلوۆەنيامەن ءتۇرلى سالالاردا ءوزارا ىنتىماقتاستىقتى ودان ءارى دامىتۋعا قىزىعۋشىلىق ءبىلدىرىپ وتىرعانىن مالىمدەدى.
سلوۆەنيا سىرتقى ىستەر مينيسترلىگىنىڭ شىعىس ەۋروپا, وڭتۇستىك كاۆكاز جانە ورتالىق ازيا دەپارتامەنتىنىڭ باسشىسى اندرەيا پۋكارت مارتينەتس ماريبور قالاسىنداعى قازاقستاننىڭ قۇرمەتتى كونسۋلدىعىنىڭ اشىلۋىن جىلى قارسى الىپ, ءوز ەلىنىڭ قازاقستانمەن سەرىكتەستىك بايلانىستى تەرەڭدەتۋگە مۇددەلى ەكەنىن جەتكىزدى.
تانىمال زاڭگەر ءارى قوعام قايراتكەرى گ. شيفرەر ەكى ەل اراسىنداعى دوستىق بايلانىستى نىعايتۋ ءۇشىن بارلىق كۇش-جىگەرىن جۇمساۋعا دايىن ەكەنىن اتاپ ءوتتى.
قر ءسىم-ءنىڭ حابارلاۋىنشا, قۇرمەتتى كونسۋلدىقتىڭ اشىلۋى اياسىندا ماريبور قالاسى ۋنيۆەرسيتەتىنىڭ كىتاپحاناسىندا قازاقستاندىق سۋرەتشىلەردىڭ ونەر تۋىندىلارى كورمەسى جانە ەۋروپا ەلدەرى كونسەرۆاتوريالارىندا ءدارىس الىپ جاتقان قازاقستاننىڭ جاس مۋزىكانتتارىنىڭ ونەر كورسەتۋ شاراسى ءوتتى.
ايتا كەتۋ كەرەك, سلوۆەنيانىڭ ەكىنشى ءىرى قالاسى بولىپ تابىلاتىن ماريبور وسى ەلدىڭ ءىرى ەكونوميكالىق جانە مادەني ورتالىقتارىنىڭ ءبىرى بولىپ سانالادى.