وقىرمان ...قۋانىشىن بولىسەدى
تاجىكستاندا «شىمكەنت» شاعىن اۋدانى بوي كوتەردى
بيىل بۇرىنعى وداقتاس رەسپۋبليكالاردىڭ, قازىرگى ەگەمەن ەلدەردىڭ بارلىعىندا دەرلىك مەرەيتويلى جىل. وسى ورايدا قازاقستاننىڭ تاجىكستانداعى ەلشىلىگى وڭتۇستىك قازاقستان وبلىسىنىڭ اكىمدىگىمەن بىرلەسىپ, دۋشانبە جانە حودجەنت قالالارىندا بىرقاتار رەسمي, مادەني جانە سالتاناتتى ءىس-شارالار وتكىزدى. سونىڭ ءبىرى – تامىز ايىنىڭ سوڭىندا تاجىكستانداعى ءبىزدىڭ ەلشىلىك وسى ەلدىڭ سوعدي وبلىسى, حودجەنت قالاسىنىڭ باسشىلىعىمەن كەلىسسوزدەر وتكىزىپ, بيزنەس وكىلدەرىنىڭ ىسكەرلىك كەزدەسۋلەرىن ۇيىمداستىردى. تاجىك اعايىندار ءبىزدىڭ ەلىمىزگە دەگەن دوستىعى مەن قۇرمەتىنىڭ بەلگىسى رەتىندە حودجەنت قالاسىندا جاڭادان بوي كوتەرگەن شاعىن اۋدان بولىگىنە «شىمكەنت» اتاۋىن بەرىپ, ونىڭ اشىلۋ ءراسىمى شىن نيەتتى كوتەرىڭكى كوڭىل كۇيدە وتكىزىلدى. وسىلايشا, شىمكەنت-حودجەنت قالالارىنىڭ باۋىرلاستىق مارتەبەسى بۇرىنعىدان دا بەكي تۇسكەندىگىنىڭ كۋاسى بولدىق. حودجەنتتەگى بەرەكەلى كەزدەسۋلەر اياقتالعان سوڭ دۋشانبەدە س.ايني اتىنداعى مەملەكەتتىك وپەرا جانە بالەت تەاترىندا وقو ونەر شەبەرلەرىنىڭ سالتاناتتى كونتسەرتى جوعارى دەڭگەيدە ءوتىپ, جەرگىلىكتى حالىقتىڭ قوشەمەتىنە بولەندى. مۇحتار كارىباي, دۋشانبە ...قولداۋ كۇتەدى
ەسەنجانوۆ ەسىمى لايىقتى
ەلىمىزدە وسكەلەڭ ۇرپاققا ۇلگى-ونەگە بولار تۇلعالار جەتكىلىكتى. سولاردىڭ ءبىرى – حامزا ەسەنجانوۆ دەسەك, قاتەلەسپەيتىن شىعارمىز. ونىڭ «اقجايىق» تريلوگياسى ادەبيەتسۇيەر قاۋىمعا جاقسى تانىس. جايىق جۇرتشىلىعى كورنەكتى جازۋشىنىڭ تۋعانىنا ءجۇز جىل تولۋ مەرەكەسىن وسىدان جەتى-سەگىز جىل بۇرىن لايىقتى تۇردە اتاپ ءوتتى. سول كەزدە وبلىس ورتالىعىنداعى بالالار مەن جاسوسپىرىمدەر كىتاپحاناسىنا اتالعان جازۋشىنىڭ ەسىمىن بەرۋ جونىندە ۇسىنىس-تىلەكتەر ايتىلعان بولاتىن. حالىقتىڭ بۇل تىلەگى قوعامدىق ۇيىمدارعا جەتكىزىلدى. وبالى نە كەرەك, جەرگىلىكتى باسقارۋ ورگاندارى دا بۇعان تۇسىنىستىكپەن قارادى. وسىلايشا 2014 جىلى رەسپۋبليكالىق ونوماستيكالىق كوميسسيا باتىس قازاقستان وبلىستىق بالالار مەن جاسوسپىرىمدەر كىتاپحاناسىنا حامزا ەسەنجانوۆتىڭ ەسىمىن بەرۋ جونىندە ءتيىستى شەشىم دە شىعارعان ەدى. الايدا, كەيىنگى جىلدارى ونوماستيكا سالاسىندا بولعان موراتوريلەرگە بايلانىستى ماسەلەنىڭ تۇبەگەيلى شەشىمىن تابۋى تەجەلىپ تۇر. بۇگىنگى تاڭدا موراتوري الىنعانى بەلگىلى. سوندىقتان وسى ماسەلەنىڭ زاڭدى-قۇقىقتىق مارتەبەسىن نەگىزدەۋدە ۇكىمەت تاراپىنان قولداۋ كۇتەمىز. التىنبەك ءابدىلمانوۆ, باتىس قازاقستان وبلىستىق «قازاق ءتىلى» قوعامىنىڭ توراعاسى ورال ...ءسۇيسىنىس بىلدىرەدى
بويتۇمار بولار ۇلاعاتتى ءسوز
ءتىل جونىندە نەبىر اسىل سوزدەر بار. ۇلى تۇلعالارىمىز اباي, ماعجان, مۇحتار اۋەزوۆتەن تارتىپ, ءوز زامانىندا ارداقتى ازاماتتارىمىزدىڭ ۇلت ءتىلىنىڭ قادىر-قاسيەتىن وسيەت ەتىپ جازىپ كەتكەنىن ارداق تۇتامىز. ال مىنا ۇلتى باسقا اسىلى وسمان اپايىمىز قازاق ءتىلىنىڭ قادىرىن تايعا تاڭبا باسقانداي ەتىپ ايتا ءبىلىپتى. «قازاق دەگەن جان-جاعىنا قامقورشى بولىپ جۇرەتىن حالىق قوي, ول كەزىندە ارتتا قالعاندى العا جەتەلەپ, جالاڭاش قالعاندى كيىندىردى, اش قالعاننىڭ قارنىن تويدىردى, ەندى بۇگىن ءبىز نەگە سول قازاقتىڭ ءتىلىنىڭ دامۋى ءۇشىن سەن, مەن دەپ بولىنبەي تۇگەل قاۋىم بولىپ جۇمىلمايمىز؟ وسىعان قانشالىقتى اقىل كەرەگىن تۇسىنبەيمىن. قازاقتىڭ نانى ءتاتتى دە, ءتىلى جامان با؟! ولاي ەمەس, قازاقتىڭ نانىن جەگەن ادام, ءتىلىن دە ۇيرەنسىن!»... بۇدان ارتىق ۇلاعاتتىڭ كەرەگى جوق. مەن سياقتى ءومىر تابالدىرىعىن ەندى اتتاماق ۇرپاق بۇل قاناتتى ءسوزدى بويتۇمار ەتىپ تاعىپ الساق ارتىقتىق ەتپەيدى. زامانبەك مۇحامەتحانوۆ, د.باباەۆ اتىنداعى 115-مەكتەپتىڭ 11 سىنىپ وقۋشىسى الماتى ...جاڭالىعىن جەتكىزەدى
جىبەك ءجىپ يىرەتىن تسەح اشىلدى
شىمكەنتتىك جەكە كاسىپكەر ورازكۇل بۇكىروۆا جىبەك قۇرتىن ءوسىرۋدى قولعا الىپ, وسىلايشا ءۇزىلىپ قالعان ءۇردىستى قايتا جانداندىرماق. كەزىندە سايرام اۋدانىندا تابىسى كوپ وسى كاسىپپەن ءبىراز ازاماتتار اينالىسىپ, ونى وندىرەتىن ورتالىق بولماعان سوڭ ءىس اياقسىز قالعان ەدى. جىبەك ءجىپ يىرەتىن تسەحى بار ايەل ەندى بۇل باستامانى سوڭىنا دەيىن جەتكىزەم دەپ وتىر. ءتىپتى, ماتا جانە كىلەم توقۋدى قولعا الماق. ءساتىن سالسا, جىبەك ماتادان تىگىلگەن ءساندى وتاندىق ءونىمدى كيەتىن كۇن دە الىس ەمەس. قولىنان ءىس كەلەتىن كاسىپكەر الدىمەن جىبەك قۇرتتارى جاپىراعىن جەيتىن تۇت اعاشىن كوپتەپ ەگىپ, ارنايى پلانتاتسيا جاساپتى. قازىردىڭ وزىندە 21 گەكتار جەرگە تۇقىمباق ازىرلەپ ۇلگەرگەن. كوشەتتى كەيىن سول جەردەن الىپ كوبەيتە بەرمەك, ءارى وبلىستىڭ اۋا رايى دا قۇرتتىڭ بۇل ءتۇرىن وسىرۋگە وتە قولايلى. «جىبەك دۇنيە جۇزىندە وتە قادىرلەنەدى, ونى بىلەسىزدەر. جىبەكتەن جاسالعان ماتالار, جىبەكتەن جاسالعان بۇيىمدار كوپ جەردە قولدانىلادى. جىبەك تالشىق قورعانىستا, مەديتسينا سالاسىندا پايدالانىلادى», – دەيدى كاسىپكەر ورازكۇل بۇكىروۆا. امان بولسىنوۆ شىمكەنت ...تىلەگىن جەتكىزەدى
«قامقور» ورتالىعى اشىلدى
ەلباسى ارناۋلى الەۋمەتتىك قىزمەتتەردىڭ بالامالى ۇلگىسىمەن جۇمىس ىستەۋدى تاپسىرعان بولاتىن. كۇنى بۇگىنگە دەيىن وسى باعىتتا ارناۋلى قىزمەت كورسەتۋگە جەكە سەكتورلاردى تارتۋ جۇمىسى جۇرۋدە. وسى ورايدا 3 قازان كۇنى اۋدان ورتالىعىندا اۋداندىق جۇمىسپەن قامتۋ جانە الەۋمەتتىك باعدارلامالار ءبولىمىنىڭ ۇيىمداستىرۋىمەن «قازتالوۆ» قوعامدىق ۇيىمىمەن كەلىسىمشارتقا وتىرىپ, مۇمكىندىگى شەكتەۋلى بالالار مەن 18 جاستان اسقان پسيح-نەۆرولوگيالىق اۋرۋى بار مۇگەدەكتەرگە قىزمەت كورسەتەتىن «قامقور» ورتالىعى اشىلدى. ورتالىقتا 18 جاسقا دەيىن جانە 18 جاستان اسقان ادامدارعا ارنالعان ەكى كابينەت جۇمىس جاسايدى. ورتالىق قىزمەت الۋشىلارعا كۇندىزگى جارتىلاي ستاتسيونارلىق تۇردە 4 ساعاتتىق قىزمەت ءتۇرى كورسەتىلەدى. ارنايى ماماندار مەن الەۋمەتتىك قىزمەتكەرلەر جۇمىس جاسايتىن ورتالىقتا جۇمىس كەستەسىنە ساي ارناۋلى 8 ءتۇرلى الەۋمەتتىك قىزمەت كورسەتۋ جولعا قويىلعان. قايرات جاقىپ باتىس قازاقستان وبلىسى, قازتالوۆ اۋدانى