2 ناۋرىزدان باستاپ تۇرعىن ءۇي كەزەگىندە تۇرعان ازاماتتارعا باسپانا ءبولۋ جانە جەڭىلدەتىلگەن تۇرعىن ءۇي نەسيەسىن بەرۋ ءتارتىبى وزگەرەدى. وسى كۇننەن باستاپ «وتباسى بانك» پاتەرلەردى تەك دەرەكتەردى مىندەتتى تۇردە تۇگەندەۋدەن وتكەن ازاماتتارعا عانا ۇسىنباق, دەپ جازادى Egemen.kz.
قارجى ينستيتۋتىنىڭ حابارلاۋىنشا, تۇگەندەۋ ءراسىمى كەزەكتە تۇرعان ازامات تۋرالى مالىمەتتەردىڭ وزەكتىلىگىن تەكسەرۋگە باعىتتالعان. اتاپ ايتقاندا, وتباسى قۇرامى, ساناتى جانە تۇرعىن ءۇيىنىڭ بار-جوعى قايتا قارالادى. ول ءۇشىن ازاماتتار پروتسەدۋرانى ارنايى پورتال ارقىلى ءوتىپ, دەربەس دەرەكتەردى وڭدەۋگە كەلىسىم بەرۋى قاجەت.
ەگەر كەزەكتە تۇرعان ازامات تۇگەندەۋدەن وتپەسە, ول تۇرعىن ۇيگە مۇقتاجدار تىزىمىنەن شىعارىلمايدى. الايدا دەرەكتەر تەكسەرىلگەنگە دەيىن بانك وعان جالدامالى پاتەر ۇسىنا المايدى جانە جىلدىق 2 نەمەسە 5 پايىزدىق مولشەرلەمەمەن جەڭىلدەتىلگەن نەسيە بەرىلمەيدى.
«وتباسى بانك» سالىمشىلارىنا مەملەكەتتىك سىيلىقاقى 1 ناۋرىزدا اۋدارىلادى
بۇعان دەيىن ۋاقىتشا ءتارتىپ قولدانىلعان. العاشقى كەزەڭدە جاڭا جۇيەنى جىلدام ىسكە قوسۋ ءۇشىن بانك پاتەرلەردى تۇگەندەۋسىز ءبولىپ, تەك سودان كەيىن كەزەكتە تۇرعان ازاماتتاردىڭ مالىمەتىن تەكسەرگەن. بۇل كەي جاعدايدا قيىندىق تۋعىزعان.
«كەيدە تۇگەندەۋ بارىسىندا كەزەكتە تۇرعان ادامنىڭ بۇرىن باسپانا ساتىپ العانى انىقتالدى, ياعني ول ەندى تۇرعىن ۇيگە مۇقتاج ەمەس بولىپ شىقتى. تاعى ءبىر جاعدايدا وتباسى قۇرامىندا وزگەرىس بولىپ, بالا سانى ارتقانىمەن, وعان شاعىن پاتەر بولىنگەن جايتتار كەزدەستى. مۇنداي جاعدايدا بارلىق پروتسەستى قايتا باستاۋعا تۋرا كەلدى, ال بۇل قوسىمشا ۋاقىتتى تالاپ ەتتى», دەپ ءتۇسىندىردى بانك وكىلدەرى.
تۇرعىن ءۇي كەزەگى قالاي جۇمىس ىستەيدى؟
وتباسى بانك تۇرعىن ءۇيدى ۇلتتىق دامۋ ينستيتۋتى مارتەبەسىندە ءبولىپ وتىر. بۇگىندە وبلىس اكىمدىكتەرى بانككە 13 393 پاتەر تاپسىرعان. ونىڭ 8 846-سى جالدامالى تۇرعىن ۇيگە, 4 547-ءسى نەسيەلىك باسپاناعا ارنالعان. پاتەر ءبولۋ باستالعالى بەرى 4 216 وتباسى قونىس تويىن تويلاعان. 24 اقپانداعى مالىمەتكە سايكەس, 257 مىڭ ازامات دەرەكتەردى تۇگەندەۋ راسىمىنەن وتكەن.
وتباسى بانك استاناداعى جاڭا دەرەكتەر ورتالىعىنا كوشتى
جاڭا ءتارتىپ تۇرعىن ءۇيدى ءادىل بولۋگە جانە كەزەكتە تۇرعانداردىڭ ناقتى جاعدايىن ەسكەرۋگە مۇمكىندىك بەرمەك.