15 ناۋرىزدا ەلىمىزدە جاڭا كونستيتۋتسيا جوباسىنا قاتىستى رەفەرەندۋم وتەدى. وسىعان بايلانىستى ءتۇرلى سالا وكىلدەرى, ونىڭ ىشىندە شىعارماشىلىق يەلەرى مەن ونەر ادامدارى دا پىكىر ءبىلدىرىپ, ءۇن قوستى. سولاردىڭ ءبىرى – قازاقستاننىڭ ەڭبەك سىڭىرگەن قايراتكەرى, جازۋشى روزا مۇقانوۆا. قالامگەردىڭ ايتۋىنشا, رەفەرەندۋم – قازاقستان حالقى ءۇشىن, قازاق مەملەكەتى ءۇشىن تاريحي بەلەس, دەپ حابارلايدى Egemen.kz.
«بۇرىن قامتىلماعان, كەڭىرەك ايتىلماعان دۇنيەلەر جاڭا كونستيتۋتسيادا كورىنىس تاۋىپ, حالىق پەن بيلىكتىڭ اراسىنداعى ادەپتى, تىڭداۋدى, ادىلدىكتى كورسەتەتىن بىردەن ءبىر زاڭدى قۇرالعا اينالىپ وتىر. وسى جاعىنان كەلگەندە, مەن قالامگەر رەتىندە دە ءوز قۇقىعىمدى زەرتتەدىم. سونىڭ ىشىندە تسەنزۋراعا تىيىم سالىناتىنى كوكەيگە وتە قونىمدى بولدى», دەيدى روزا مۇقانوۆا.
سونىمەن قاتار ول شىعارماشىلىق ەركىندىك, زياتكەرلىك مەنشىكتى قورعاۋ ماسەلەلەرىنە ايرىقشا نازار اۋداردى.
«زياركەرلىك مەنشىكتى قورعاۋ دەگەن بۇرىنعى زاڭداردىڭ اياسىندا تەك ءبىر ينەرتسيامەن عانا كەلە جاتتى. شىن مانىندە, شىعارماشىلىق تۇلعالاردىڭ, ول كومپوزيتور بولسىن, جازۋشى, سۋرەتشى, كەسكىندەمەشى بولسىن, ولاردىڭ زياتكەرلىك قۇقىعى قورعالماعان ەدى. ونى قورعاۋ ءۇشىن قاي زاڭعا سۇيەنۋىمىز كەرەك, قايدا بارۋىمىز كەرەك, كىمگە دالەلدەۋىمىز كەرەك دەگەنگە كەلگەندە قيىندىقتارعا, كەدەرگىلەرگە كەزدەستىك. ەندى بۇل ماسەلەلەردىڭ زاڭ اياسىندا رەتتەلەتىنىنە ەرەكشە كوڭىلىم تولىپ وتىر. سوندىقتان 15 ناۋرىز – تاريحي كۇن. وسى رەتتە مەن جاڭا كونستيتۋتسيا جوباسىن ءادىل زاڭ رەتىندە قولداۋ ءۇشىن داۋىس بەرۋگە بارامىن. سەبەبى, بۇل قازاقستان حالقىنىڭ قۇقىعىن قورعايتىن ادىلەتتى, دامىعان, وركەنيەتتى ەلدەردىڭ قاتارىنداعى ابىرويلى باعىت بولدى دەپ ويلايمىن», دەدى جازۋشى.
روزا مۇقانوۆا جاڭا كونستيتۋتسيا جوباسىن بۇگىنگى كۇنگە دەيىن مەملەكەت باسشىسىنىڭ باستاماسىمەن قولعا الىنعان رەفورمالاردىڭ زاڭ اياسىندا قولدانىلىپ, بەكىتىلۋى دەپ باعالادى.
ء«بىز قازىرگى تاڭدا كوپتەگەن رەفورمالارعا كۋا بولىپ وتىرمىز. حالىقتىڭ بەلسەندىلىگى كۇن وتكەن سايىن ارتىپ كەلەدى. حالىق بەلسەندىلىگىنىڭ ارتۋى ونىڭ رەفورماعا سەنۋى, بولاشاققا سەنۋى, مەملەكەتتىڭ بولاشاعىنا سەنۋى دەپ ويلايمىن», دەدى قازاقستاننىڭ ەڭبەك سىڭىرگەن قايراتكەرى.
ءانشى تامارا اسار دا جاڭا كونستيتۋتسيا جوباسى ەل بولاشاعىنا باعىتتالعان ماڭىزدى قادام دەپ باعالادى.
«مادەنيەت حالىقتى بىرىكتىرەتىن كۇش. قوعام ءاردايىم دامىپ, جاڭارىپ وتىرادى. سوندىقتان 15 ناۋرىزدا وتەتىن رەفەرەندۋمعا قاتىسىپ, داۋىس بەرۋگە شاقىرامىن», دەدى ول.
رەفەرەندۋم جانە جاڭا كونستيتۋتسيا: حالىق كوپ جينالاتىن ورىنداردا اقپاراتتىق جۇمىس جانداندى
«جاستار» تەاترىنىڭ اكتەرى, قازاقستاننىڭ ەڭبەك سىڭىرگەن قايراتكەرى داۋرەن سەرعازين ءار ازاماتتىڭ تاڭداۋى ەل بولاشاعى ءۇشىن ماڭىزدى ەكەنىنە توقتالا كەلە, الداعى رەفەرەندۋمعا قاتىساتىنىن جەتكىزدى.
ء«ار ونەر ادامى ءۇشىن ەركىن شىعارماشىلىقتا بولۋ, ءوز ويىن ەركىن جەتكىزە الۋ, ءوز يدەيالارىن ەركىن تۇردە جۇزەگە اسىرۋ وتە ماڭىزدى. سەبەبى, ونەر ەركىندىكتە داميدى. جاڭا كونستيتۋتسيا جوباسىندا شىعارماشىلىققا ايرىقشا ءمان بەرىلگەن. جالپى, كەز كەلگەن سالاعا, ونىڭ ىشىندە مادەنيەت پەن ونەر سالاسىنا جاڭا قادامدار, جاڭاشىلدىقتار وتە قاجەت. سەبەبى, جاڭا تىنىسپەن مادەنيەت پەن ونەر داميدى. ال بۇل سالالاردىڭ دامۋى ەلىمىزدىڭ رۋحاني بايۋىنا ىقپالىن تيىزەدى. 15 ناۋرىزدا وتەتىن رەفەرەندۋم بارشامىز ءۇشىن جاڭا جانە ماڭىزدى قادام دەپ ويلايمىن», دەدى اكتەر.
ۇلتتىق ارحيۆ قىزمەتكەرلەرىنە جاڭا كونستيتۋتسيا جوباسى ءتۇسىندىرىلدى