سەيسەنبى كۇنى يالتادا «ەۆرازيسكي موست» فەستيۆالىنىڭ سالتاناتتى جابىلۋ شاراسى ءوتتى. وندا قازاقستاندىق رەجيسسەر اقان ساتاەۆتىڭ «اناعا اپارار جول» ءفيلمى گران-ءپريدى جەڭىپ الدى. بايقاۋعا رەسەي, ۋكراينا, بەلارۋس, يتاليا, گەرمانيا, سەربيا, قازاقستان, قىتاي, وڭتۇستىك كورەيا, بەلگيا, ءۇندىستان, ارمەنيا سياقتى ەلدەردىڭ كينوشىلارى قاتىستى.
فەستيۆالدە ۇزدىك ايەل ءرولى جۇلدەسى وسى فيلمدە باستى ءرولدى سومداعان التىناي نوگەربەككە بەرىلگەن بولاتىن.
«اناعا اپارار جول» فيلمىندە انا ماحابباتىنىڭ كۇشى باياندالادى. باستى كەيىپكەر ءىلياس ء(ادىل احمەتوۆ) پەن ونىڭ اناسى (التىناي نوگەربەك) اراسىنداعى ۇلى سەزىم ولاردىڭ باسىنا تۋعان بارلىق قيىندىققا توتەپ بەرىپ, سوڭىندا انا مەن بالانىڭ قاۋىشۋىنا كومەكتەسەدى.
فيلم 1930 جىلدان باستاپ بۇگىنگى كۇنگە دەيىنگى ارالىقتى قامتيدى. مۇندا حالىقتىڭ باسىنان وتكەن قيىن-قىستاۋ كەزەڭدەر (ۇجىمداستىرۋ, جۇت, سوعىس جىلدارى) باستى كەيىپكەرلەردىڭ تۇرمىس-تىرشىلىگى ارقىلى بەرىلىپ وتىرادى. باستى رولدەردى ادىل احمەتوۆ, التىناي نوگەربەك, ارۋجان جازىلبەكوۆا, بولات ءابدىلمانوۆ, بەرىك ايتجانوۆ, ازامات ساتىبالدى, ەركەبۇلان دايىروۆ, اسىلبەك بورانباي سومداعان. كارتيناعا جالپى سانى 2 مىڭنان استام ادام قاتىستى. ءتۇسىرۋ جۇمىستارى قازاقستان, بەلارۋس جانە ءازىربايجاندا جۇرگىزىلدى. ءفيلمنىڭ ستسەناري اۆتورى – تيمۋر جاقسىلىقوۆ, كومپوزيتورى – رينات عايسين.
ايگەرىم توقسانبەك