وڭىرلەردە سۋ تاسقىنىنا قارسى دايىندىق كۇشەيتىلدى

اباي وبلىسى اۋماعىندا سۋ باسۋ قاۋپى بار ۋچاسكەلەر مەن گيدروتەحنيكالىق قۇرىلىستارعا اەروۆيزۋالدى تەكسەرۋ جۇرگىزىلدى. وبلىس اكىمىنىڭ ورىنباسارى سەرىك تولەنبەرگەنوۆ جەتەكشىلىك ەتكەن جۇمىس توبى توتەنشە جاعدايلار دەپارتامەنتى, ەرتىس باسسەيندىك سۋ ينسپەكتسياسى جانە «قازگيدرومەت» وكىلدەرىمەن بىرلەسىپ ەرتىس پەن وبا وزەندەرىنىڭ ارنالارىن, قار قورىن جانە سۋ شارۋاشىلىعى نىساندارىنىڭ جاي-كۇيىن باعالادى. تەكسەرۋ ناتيجەسىندە گيدرولوگيالىق احۋال تۇراقتى ەكەنى, ءشۇلبى گەس شتاتتىق رەجيمدە جۇمىس ىستەپ تۇرعانى انىقتالدى. سونىمەن بىرگە سۋ تاسقىنى كەزەڭىندە بارلىق قىزمەتتىڭ ۇيلەسىمدى ارەكەت ەتۋى ءۇشىن قوسىمشا الدىن الۋ شارالارى بەلگىلەندى.

پرەزيدەنت سۋ تاسقىنى مەن قۇرعاقشىلىق قاۋپىنە الدىن الا دايىندالۋدى تاپسىردى

اقمولا وبلىسىندا 15 اقپان مەن 15 ناۋرىز ارالىعىندا ءوتىپ جاتقان سۋ تاسقىنىنا قارسى ءىس-شارالار ايلىعى اياسىندا كوكشەتاۋ قالاسىندا سەنبىلىك ۇيىمداستىرىلدى. وعان تجد قىزمەتكەرلەرى, مالىك عابدۋللين اتىنداعى ازاماتتىق قورعاۋ اكادەمياسىنىڭ كۋرسانتتارى جانە ۆولونتەرلەر قاتىستى. ولار زەينەتكەرلەر مەن مۇمكىندىگى شەكتەۋلى ازاماتتار تۇراتىن ۇيلەردىڭ اۋلالارىن قاردان تازالاپ, ينەرتتى ماتەريال سالىنعان قاپتاردى دايىنداۋعا كومەكتەستى. جالپى 60 زەينەتكەرگە, 30 كوپبالالى وتباسىعا جانە 57 جالعىز تۇراتىن ازاماتقا قولداۋ كورسەتىلدى. 403 اۋلا تازارتىلىپ, 1138 ادام قامتىلدى, قاۋىپسىزدىك بويىنشا 583 ۇسىنىم تاراتىلدى. قىس باستالعالى جەرگىلىكتى اتقارۋشى ورگاندار 979 مىڭ تەكشە مەتر قار شىعارىپ, 225 400 قاپ ينەرتتى ماتەريال دايىنداعان.

وڭىرلەر ىقتيمال سۋ تاسقىنىنا دايىن با؟

شىعىس قازاقستان وبلىسىندا سۋ قويمالارىن تۇراقتى باقىلاۋ جالعاسىپ جاتىر. وڭىردە 258 مىڭ تەكشە مەتردەن استام قار شىعارىلدى. سۋ تاسقىنى قاۋپىنە جەدەل ارەكەت ەتۋ ءۇشىن 3677 ادامنان تۇراتىن جەكە قۇرام, 234 موتوپومپا, 75 ءجۇزۋ قۇرالى جانە 500-دەن استام تەحنيكا ازىرلىككە كەلتىرىلدى. بۇدان بولەك, 58,7 مىڭ قاپ, 9957 توننا ينەرتتى ماتەريال جانە 386 توننا جانار-جاعارماي قورى دايىندالدى. وڭىرلىك تجد تۇرعىنداردى كوكتەمگى كەزەڭگە الدىن الا قامدانۋعا, اۋلا مەن ارىقتاردى قار مەن مۇزدان تازارتۋعا شاقىرادى.

جەتىسۋ وبلىسىندا سۋ تاسقىنىنىڭ الدىن الۋ ماقساتىندا ينجەنەرلىك جۇمىستار كەشەندى تۇردە جۇرگىزىلىپ جاتىر. 2025 جىلعا جوسپارلانعان 26 جوبانىڭ 24-ءى ورىندالدى. ناتيجەسىندە 3 شاقىرىم قورعانىش بوگەت سالىندى جانە جوندەلدى, 14,8 شاقىرىم سۋ اعىزۋ ارنالارى قازىلدى, 11 شاقىرىم وزەن ارنالارى تازارتىلدى, 13 شاقىرىم اۋماقتا ارنانى تەرەڭدەتۋ مەن جاعالاۋدى بەكىتۋ جۇمىستارى اتقارىلدى. وڭىردەگى گيدرولوگيالىق جاعداي تۇراقتى, سۋ دەڭگەيى ورتاشا كوپجىلدىق كورسەتكىشتەرگە ساي, مۇز كەپتەلىستەرى تىركەلمەگەن. قاۋىپتىڭ الدىن الۋ ءۇشىن 2965 ادام, 534 تەحنيكا, 193 موتوپومپا جانە 27 ءجۇزۋ قۇرالى دايىن تۇر. سونىمەن قاتار 130 مىڭ قاپ, 5,5 مىڭ توننا ينەرتتى ماتەريال, 82 توننا جانار-جاعارماي جانە 235 ەۆاكۋاتسيالىق پۋنكت ازىرلەندى.

يندونەزيادا سۋ تاسقىنىنان 13 ادام كوز جۇمدى

جالپى وڭىرلەردە قابىلدانىپ جاتقان بۇل شارالار كوكتەمگى سۋ تاسقىنى كەزەڭىندە تۇرعىنداردىڭ قاۋىپسىزدىگىن قامتاماسىز ەتىپ, گيدرولوگيالىق احۋالدى تۇراقتى ۇستاۋعا باعىتتالعان.