قازاقستاندا بۇعان دەيىن قاناتقاقتى رەجىمدە جۇمىس ىستەپ كەلگەن ۇلتتىق دارىلىك فورمۋليار (ۇدف) رەسمي بەكىتىلىپ, ىسكە قوسىلدى. ءتيىستى بۇيرىققا دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆا قول قويعان.
وسىلايشا, وتانىمىز تمد ەلدەرىنىڭ اراسىندا مۇنداي اقپاراتتىق رەسۋرستى ىسكە قوسقان العاشقى رەسپۋبليكا بولىپ وتىر. ۇدف-نى جاساقتاۋ بارىسىندا فارموكوتەراپيا سالاسىنداعى وزىق الەمدىك تاجىريبە باسشىلىققا الىنعان ەكەن.
بۇل دارىلىك كومەك ازاماتتاردىڭ الەۋمەتتىك جاعدايى مەن تابىسىنا قاراماستان بارىنە بىردەي قولجەتىمدى بولماق. سەبەبى, مۇندا ءدارى-دارمەكتەردىڭ شەكتى باعالارى كورسەتىلگەن. فورمۋليار جۇيەلى تۇردە جاڭارتىلىپ وتىراتىندىقتان, مەديتسينالىق قىزمەتكەرلەرگە ءدارى-دارمەك تۇرلەرى, ولاردى قولدانۋ تاجىريبەسى تۋرالى جاڭا ماعلۇماتتار الىپ, فارماتسەۆتيكا سالاسىنداعى ءبىلىمىن جەتىلدىرىپ وتىرۋعا مۇمكىندىك بەرەدى.
ۇلتتىق فورمۋلياردى قالىڭ جۇرتشىلىق تا www.knf.kz سايتى ارقىلى ورىس جانە قازاق تىلدەرىندە ونلاين-رەجيمدە قولدانا الادى. ۇدف دۇنيەجۇزىلىك دەنساۋلىق ساقتاۋ ۇيىمى ماقۇلداعان جۇيە بويىنشا قۇرىلعان. پرەپارات تۋرالى ەڭ قاجەتتى اقپاراتتىڭ ءبارى ءبىر بەتتە جيناقتالعان. ال قاجەت بولعان جاعدايدا, سىلتەمەنى اشىپ, كەڭىرەك ماعلۇمات الۋعا بولادى. كەرى بايلانىس جۇيەسى ارقىلى سايتتى قولدانۋشىلار ءوز پىكىرلەرى مەن ۇسىنىستارىن قالدىرا الادى.
جوبا 2015 جىلدىڭ سوڭىندا ەلىمىزدىڭ تۇرعىندارىنا ۇسىنىلىپ وتىرعان دارىلەردىڭ ساپاسى, قاۋىپسىزدىگى مەن قولجەتىمدىلىگى ماسەلەلەرىن شەشۋ ماقساتىندا قولعا الىنعان بولاتىن. وعان مينيسترلىكتىڭ مەديتسينالىق جانە فارماتسەۆتيكالىق قىزمەتتى باقىلاۋ كوميتەتى ۇيىتقى بولعان. ۇدف-نى جاساقتاۋعا شەتەلدەردىڭ تاجىريبەلى فارماكولوگتارى تارتىلىپتى. قازاقستاندىق ۇلتتىق فورمۋلياردى ماماندارعا جانە قالىڭ كوپشىلىككە تانىستىرىپ, قولدانىس اياسىن كەڭەيتۋ ماقساتىندا دەنساۋلىق ساقتاۋدى دامىتۋدىڭ رەسپۋبليكالىق ورتالىعى ەلىمىزدىڭ ايماقتارىندا سەمينارلار وتكىزىپ, تانىستىرىپ وتىرۋدى قولعا الماق.
«ەگەمەن-اقپارات»