كولەڭكەسى قويۋ سايالى اعاشتاي ءتۇرلى ۇلتتىڭ بالاسىنا مەيىرىمىن توگىپ, پانا بولىپ وتىرعان تولەگەنوۆتەر وتباسى بۇگىندە وبلىسقا تانىمال. وتباسى وتكەن جىلى وبلىستىق «مەرەيلى وتباسى» بايقاۋىنىڭ جەڭىمپازى اتانعان بولاتىن. جاقىندا وتاناسى گۇلجاۋھار تولەگەنوۆا وبلىس ورتالىعىنداعى ى.التىنسارين مەموريالدىق مۋزەيىندە جاستارمەن كەزدەستى. ساباقتا, جۇمىستا بولعاندىقتان, وتباسىنىڭ بالالارى مەن وتاعاسى كەلە الماعاندىعىنان حاباردار ەتتى.
گۇلجاۋھاردىڭ جاستارمەن اڭگىمەسى قالىپقا سالعانداي كەزدەسۋدەن گورى, سىرلاسۋ كەشىنە اينالىپ كەتكەندەي بولدى. بۇگىندە ءوزىنىڭ جالعىز ۇلىنىڭ سىرتىندا ءتۇرلى ۇلتتىڭ سەگىز بالاسىنا پانا بولىپ وتىرعان گۇلجاۋھار مەن نۇرلاننىڭ ءىسى ەرىككەننىڭ ەرمەگى نەمەسە ارزان اتاق الۋ, پايدا كورۋ سەكىلدى پىسىقتىقتان تۋعان جوق. بيىك ادامگەرشىلىك, مەيىرىمدىلىك, ساۋاپتى ويلايتىن ادالدىق نۇرلان مەن گۇلجاۋھاردى وسىنداي قادامعا الىپ كەلدى. ءوز اتا-اناسىنىڭ مەيىرىمىنە جارىماي, قاراۋسىز قالعان بالالاردىڭ جاعدايىن جاساۋ, ولاردى تاربيەلەۋ وڭاي شارۋا ەمەس.
– وتباسى مۇشەلەرى, اسىرەسە ايەل-انا ءتوزىمدى بولعاندا عانا شاڭىراق شايقالمايدى, بوساعا بەرىك بولادى, وتباسىنىڭ بەرەكەسى ورتايمايدى. قازىر جاستار ۇيلەنگەن سوڭ كوپ ۇزاماي اجىراسىپ جاتادى. ولار كوبىنە كوزقاراستارىنىڭ جاراسپاعاندىعىن ايتادى. جاستار ءبىرىن-ءبىرى ءوزىنىڭ كوڭىلىندەگىدەي ەتىپ تاربيەلەپ العىسى كەلەدى. ۇيلەنگەنگە دەيىن قالىپتاسىپ قالعان كىسىنى ەشكىم دە قايتا ءتاربيەلەي المايدى, تەك ونىمەن ساناسۋ, ءتۇسىنىسۋ جانە ءتوزۋ كەرەك. تاربيە از ۋاقىتتىڭ جەمىسى ەمەس, ول ۇزاق ۇدەرىس بولۋى ءتيىس. ءمۇسىنشىنىڭ ەڭبەگى سەكىلدى بىرتە-بىرتە جونعاندا عانا تاربيەنىڭ تۇپكى ناتيجەسى كورىنەدى, – دەيدى گ.تولەگەنوۆا.
نۇرلان مەن گۇلجاۋھاردىڭ تاربيەسىندەگى سوفيا, ءمادينا, داريا, الينا, ليۋبا مەن الان, شىڭعىس, رينات – مەكتەپ وقۋشىلارى. وزدەرى تۇراتىن قوستاناي اۋدانىنىڭ ءالجان اۋىلىنداعى قازاق مەتەبىندە وقيدى. ساباقتىڭ سىرتىندا بالالاردىڭ سۇيىكتى ءىسى بار. ءبىرى سپورتپەن اينالىسادى, ەكىنشىسى سۋرەت سالادى. ءۇيدىڭ شارۋاسىنان دا سىرت قالمايدى. گۇلجاۋھار جاستارمەن اڭگىمەسىندە قاي ۇلتتىڭ بولسىن حالىقتىق پەداگوگيكاسىن جوعارى قوياتىنىن ايتتى.
– مەن ءبىر ۇيدەگى توعىز بالانىڭ ءبىرىمىن. بالا كەزىمىزدە اكەمىز ىلعي جۇمىستا بولاتىن. انامىز بالالارىنا اكەسىن تاۋداي ەتىپ كورسەتتى, سىرتىنان ماقتاپ, «اكەلەرىڭ كەلە جاتىر, ءۇيدى سىپىرىپ قويىڭدار, ءشايى دايىن بولسىن» دەپ وتىراتىن. اكەمىزدىڭ ءسوزى بىزگە زاڭ بولىپ ەستىلەتىن. انامىز قىزدارىن كەشكى ويىن-ساۋىققا جىبەرمەيتىن, اكەمىز ۇناتپايتىنىن ايتاتىن. ۇيدە اكە بالا ءۇشىن ۇستىن, يدەال بولۋى ءتيىس. اكەنى سىيلاعاندا عانا بالا سانالى, ءتارتىپتى بولىپ وسەدى, – دەپ سىر شەرتتى گ.تولەگەنوۆا. ول ءوزى دە قازىر بالالارىنا وتاعاسى نۇرلاندى وسىلاي كورسەتە بىلەدى ەكەن.
– نۇرلان ءبىزدىڭ وتباسىمىزدىڭ اسىراۋشىسى, كوبىنە جۇمىستا جۇرەدى. مەن دە قولىمداعى قىزداردى تۇندە قىدىرۋعا جىبەرمەيمىن, «پاپالارىڭ ۇناتپايدى, رەنجىپ قالادى» دەگەن سوزدەردى ءجيى قۇلاقتارىنا قۇيىپ وتىرامىن, – دەيدى وتاناسى. سونىمەن قاتار, ونىڭ اعايىننىڭ تاتۋلىعى تۋرالى ويلارى دا جاستارعا ومىردەگى باعىت, تاعىلىم بولارلىقتاي ەدى.
– مەن بالالاردى الماس بۇرىن ەكى جىلداي ويلانىپ ءجۇردىم. ەنەم بۇل قادامىما قالاي قارايدى دەگەن ويعا شىرمالدىم. ول كىسىمەن وسى ۋاقىتقا دەيىن قاتتى سوزگە كەلىپ كورگەن ەمەسپىن. سول كىسىنىڭ قارسىلىعى جوق ەكەنىن, قولدايتىنىن بىلگەن سوڭ عانا نۇرلان ەكەۋمىز تاۋەكەلگە باردىق, – دەيدى گۇلجاۋھار.
جاستار مەن كوپبالالى انانىڭ كەزدەسۋى بەلگىلەنگەن ۋاقىتتان ۇزاققا سوزىلدى. ءارى ۇلكەن وتباسىنىڭ وتاناسى, ءبىر اۋلەتتىڭ ۇلگىلى كەلىنى, پەداگوگ گ.تولەگەنوۆانىڭ سىرعا بەرگىسىز اڭگىمەسىن جاستار ىنتىعا تىڭدادى, وزدەرى دە ەركىن ساۋالدار قويدى. ول كەشتەن كەيىن بالالاردىڭ الدى ساباقتان قايتاتىنىن ايتىپ, ۇيىنە اسىعىپ تا وتىرعانىن ايتتى. قازاق مەكتەبىندە وقيتىن بالالاردىڭ بارلىعى دا ساباقتان كەلە اناسىن ءبىر يىسكەمەي تاماققا وتىرمايدى. قازاق ءتىلىنىڭ نارىنە سۋسىنداپ كەلە جاتقان بالانىڭ قايسىسىنىڭ دا ەركەلەي سويلەگەنى انا مەيىرىمىن ەسەلەي تۇسكەندەي بولادى.
ءنازيرا جارىمبەتوۆا,
«ەگەمەن قازاقستان»
قوستاناي