كەشە پارلامەنت ءماجىلىسىنىڭ توراعاسى نۇرلان نىعماتۋليننىڭ توراعالىعىمەن پالاتانىڭ جالپى وتىرىسى ءوتىپ, وندا بىرنەشە ماڭىزدى زاڭ جوباسى بويىنشا جۇمىس باستالاتىنى جونىندە قاۋلىلار قابىلداندى.
بۇل زاڭ جوبالارىنىڭ ءبارى دە قارجى جانە بيۋدجەت كوميتەتىنىڭ قورجىنىنا تۇسكەن ەكەن. اتاپ ايتار بولساق ولار: «ۇلتتىق قوردان 2016-2018 جىلدارعا بولىنەتىن كەپىلدەندىرىلگەن ترانسفەرت تۋرالى», «2016-2018 جىلدارعا ارنالعان رەسپۋبليكالىق بيۋدجەت تۋرالى», «ۇلتتىق قوردان 2017-2019 جىلدارعا بولىنەتىن كەپىلدەندىرىلگەن ترانسفەرت تۋرالى», «2017-2019 جىلدارعا ارنالعان رەسپۋبليكالىق بيۋدجەت تۋرالى» زاڭدارعا وزگەرىستەر مەن تولىقتىرۋلار ەنگىزۋ تۋرالى زاڭ جوبالارى ەكەن. اتالعان زاڭ جوبالارىنىڭ ءبارى, سونداي-اق رەسپۋبليكالىق جانە وبلىستىق بيۋدجەتتەر, رەسپۋبليكالىق ماڭىزى بار قالا, ەلوردا بيۋدجەتتەرى اراسىنداعى 2017-2019 جىلدارعا ارنالعان جالپى سيپاتتاعى ترانسفەرتتەردىڭ كولەمى تۋرالى, «كوللەكتورلىق قىزمەت تۋرالى» جانە وعان ىلەسپە زاڭ جوبالارىمەن جۇمىستى جالعاستىرۋ تۋرالى قورىتىندى ازىرلەۋ مەرزىمدەرى بەلگىلەندى.
بۇلار تۋرالى قارجى جانە بيۋدجەت كوميتەتىنىڭ ءتورايىمى گۇلجان قاراعۇسوۆا بايانداپ, قورىتىندى ازىرلەۋ مەرزىمىن جالپى وتىرىس قابىلداعان قاۋلىمەن بەكىتتىرىپ الدى. گ.قاراعۇسوۆانىڭ ايتۋىنا قاراعاندا, ولاردىڭ ءبارى دە ەلباسى ن.نازارباەۆتىڭ تاپسىرماسىمەن ازىرلەنگەن ەل ەكونوميكاسىنىڭ دامۋىنا يگى ىقپالىن تيگىزۋگە ءتيىستى ماڭىزدى قۇجاتتار.
وسى كۇنگى جالپى وتىرىستا پالاتا قازاقستان مەن سەربيا اراسىنداعى «تابىس پەن كاپيتالعا سالىناتىن سالىقتارعا قاتىستى قوسارلانعان سالىق سالۋدى بولدىرماۋ جانە سالىق سالۋدان جالتارۋعا جول بەرمەۋ تۋرالى ۇكىمەتارالىق كونۆەنتسيانى جانە وعان قوسىمشا جاسالعان حاتتامانى راتيفيكاتسيالاۋ تۋرالى» زاڭ جوباسىن دا ماقۇلدادى. بۇل زاڭ جوباسى تۋرالى قارجى ءمينيسترى باقىت سۇلتانوۆ باياندادى.
ونىڭ ايتۋىنا قاراعاندا, كونۆەنتسيا ۋاعدالاسۋشى مەملەكەتتەردىڭ رەزيدەنتتەرى بولىپ تابىلاتىن زاڭدى جانە جەكە تۇلعالاردىڭ تابىستارىنا قوسارلانعان سالىق سالۋدى بولدىرماۋعا مۇمكىندىك بەرەدى. سالىق تولەۋشىگە ءبىر رەت قانا سالىق تولەۋ ءراسىمى بەكىتىلەدى. ال ارىپتەس مەملەكەت تولەنگەن سالىقتى وزىندە ەسەپكە الادى. بۇل ەكى جاققا دا ينۆەستيتسيالار قۇيۋ ءۇشىن قولايلى جاعداي تۋعىزاتىندىعىمەن ءتيىمدى. بۇل ەكى مەملەكەتتىڭ قۇزىرەتتى ورگاندارى اراسىندا سالىق تولەۋ ماسەلەلەرى بويىنشا اقپارات الماسۋلار ارقىلى سالىقتان جالتارۋدى بولدىرماۋ ماسەلەلەرىن شەشۋگە كومەكتەسەدى.
سونىمەن قاتار, كونۆەنتسيانىڭ جەكەلەگەن باپتارى ۋاعدالاسۋشى مەملەكەتتەردە قىزمەت ىستەيتىن ونەر ادامدارىنىڭ جانە سپورتشىلاردىڭ, مەملەكەتتىك قىزمەتشىلەردىڭ, ستۋدەنتتەردىڭ, وقىتۋشىلاردىڭ جانە زەرتتەۋشى مامانداردىڭ تابىستارى مەن وزگە دە تولەمدەرىنە سالىق سالۋدىڭ ناقتى ءتارتىبىن كورسەتەدى, دەدى مينيستر.
دەپۋتاتتار ماسەلەنى ناقتىلاۋ ماقساتىندا بىرنەشە سۇراق قويعاننان كەيىن, زاڭ جوباسى تۇتاستاي ماقۇلداندى.
جاقسىباي سامرات,
«ەگەمەن قازاقستان»