ەلوردادا 8-10 قىركۇيەك ارالىعىندا ەل تاۋەلسىزدىگىنىڭ 25 جىلدىعىنا وراي «استانا جۇلدىزى» اتتى ۇلتتىق ويىندار جارىسى وتەدى. جارىسقا استانا مەن الماتى قالالارىنان باسقا, ەلىمىزدىڭ 14 وبلىسىنان ۇمىتكەرلەر قاتىسادى. قازاق حالقىنىڭ ۇلتتىق ءداستۇرىن پاش ەتكەن سپورت دوداسى وزا شاۋىپ بايگە العان تۇلپارلاردى انىقتايتىن بولادى. اتاپ ايتساق, جۇيرىكتەر بايگەسى, قىز قۋ, تەڭگە الۋ, كوكپار مەن اۋدارىسپاق سىندى ويىندار ويناتىلىپ, قۇرالايدى كوزگە اتقان مەرگەندەردىڭ شەبەرلىگى سىنالادى.
حالىق ءسۇيسىنىپ تاماشالايتىن ۇلتتىق ويىنداردان باسقا اقشاڭقان كيىز ۇيلەر تىگىلىپ, قازاقتىڭ ۇلتتىق سالت-ءداستۇرى ناسيحاتتالادى. تەمىر ءيىپ, اعاشتان ءتۇيىن تۇيگەن قولونەر شەبەرلەرنىڭ تۋىندىلارى كوپشىلىك نازارىنا ۇسىنىلادى. سونىمەن قاتار, قىران باپتاپ تۇلكى العان قۇسبەگىلىك ونەر دە كورسەتىلىپ, توعىزقۇمالاق پەن اسىق اتۋ ويىندارىنان سايىس وتەدى.
ايمان مۇقىشەۆا