باكۋدە شاحماتتان دۇنيەجۇزىلىك وليمپيادا باستالدى
قازىرگى كۇندەرى شاحماتتان ازەربايجاننىڭ استاناسى – باكۋ قالاسىندا 42-ءشى دۇنيەجۇزىلىك وليمپيادا ءوتىپ جاتىر. وعان الەمنىڭ 176 ەلىنەن 2 245 شاحماتشى قاتىسۋدا. بۇل سىنعا ءبىزدىڭ ەلىمىزدەن 5 ەر ادامنان جانە 5 قىزدان جاساقتالعان كوماندا اتتانعان-تىن. ولاردى جاتتىقتىرۋشىلار پاۆەل كوتسۋر مەن سەرىكباي تەمىرعاليەۆ باستاپ باردى.
قازىر وليمپيادانىڭ 3 تۋرىنىڭ ويىندارى ءوتتى. قازاقستاننىڭ ەرلەر جانە قىزدار قۇراماسى وسى ماتچتاردىڭ ءبارىن جەڭىسپەن اياقتادى. ەرلەر كومانداسى ءبىرىنشى ماۆريتانيا قۇراماسىن 4:0 ەسەبىمەن ۇتتى. قىزدار كومانداسى گوندۋراسپەن كەزدەسىپ, 3:1 ەسەبىمەن جەڭىسكە جەتتى. ودان كەيىن جانسايا ءابدىمالىك باستاعان قىزدارىمىز بولگاريا شاحماتشىلارىنان باسىم ءتۇستى. ەرلەر قۇرامى 2-تۋردا جاڭا زەلانديانى جەڭىپ, 3-تۋردا حورۆاتيامەن 2:2 ەسەبىمەن تەڭ ءتۇستى.
ەندى قازاقستاننىڭ ەرلەر كومانداسى ەستونيامەن, ال قىزدار ليتۆامەن كەزدەسەدى. قازىر ءۇش تۋردىڭ ناتيجەسى بويىنشا ەلىمىز 176 مەملەكەتتىڭ اراسىندا 13-ورىندا كەلەدى. ال جانسايا ءابدىمالىك جەكە ەسەپتە يتاليا جانە برازيليا شاحماتشىلارىمەن بىرگە 1-ورىنعا شىقتى.
جالپى, بيىلعى وليمپيادادا ەرلەر جانە قىزدار كومانداسىنىڭ جۇلدەلى ورىندى جەڭىپ الۋعا تولىق مۇمكىندىگى بار. وسى ماقساتتا قۇراما كومانداعا سوڭعى كەزدەرى جاقسى ناتيجە كورسەتىپ جۇرگەن شاحماتشىلار الىنعان. كوماندا ساپىندا قازىر مىنا شاحماتشىلار شارشى تاقتا دوداسىنا قاتىسىپ جاتىر. قىزدار قۇرامىندا حالىقارالىق گروسسمەيستەرلەر مەن شەبەرلەر جانسايا ابدىمالىك, ەلەنا انكۋدينوۆا, گۇلميرا داۋلەتوۆا, فيدە شەبەرلەرى شولپان جىلقايداروۆا جانە ايسەزىم مۇحيت, ەرلەر كومانداسىندا حالىقارالىق گروسسمەيستەرلەر رينات جۇماباەۆ, مۇرتاس قاجىعاليەۆ, ءانۋار ەسماعامبەتوۆ جانە پەتر كوستەنكو بار. سونىمەن بىرگە, كومانداعا بالالار اراسىنداعى قازاقستان چەمپيونى ازامات وتەۋعاليەۆ تە قوسىلدى.
داستان كەنجالين,
«ەگەمەن قازاقستان»