...قولداۋ كورسەتەدى
ولار ماڭگى جادىمىزدا
قازاقستان رەسپۋبليكاسىنىڭ پرەزيدەنتى ن.ءا. نازارباەۆتىڭ ۆاشينگتون قالاسىندا وتكەن يادرولىق قاۋىپسىزدىك جونىندەگى IV سامميتتە جاريالاعان «الەم. ءححى عاسىر» مانيفەسىن ىلگەرىلەتۋدى قامتاماسىز ەتۋ ماقساتىندا قازاقستان حالقى اسسامبلەياسى «اق ورامال» رەسپۋبليكالىق اكتسياسىن وتكىزۋ باستاماسىمەن شەتپەدەگى قىدىرباي ءجۇسىپوۆ اتىنداعى ورتالىق پاركتە اۋداندىق جاستار ورتالىعىنىڭ ۇيىمداستىرۋىمەن «اق ورامال» رەسپۋبليكالىق اكتسياسى وتكىزىلدى. شاراعا جاستار ورتالىعى ماماندارى مەن «جاسىل ەل» ەڭبەك جاساقشىلارى, بەلسەندى ستۋدەنتتەر قاتىستىرىلدى. «اق ورامالدىڭ» قازاق تاريحىندا فيلوسوفيالىق ماعىناسى تەرەڭ. بىرىنشىدەن, اق ءتۇس – تازالىقتىڭ بەلگىسى, ادامنىڭ ويى مەن جان دۇنيەسىنىڭ پاكتىگىن بىلدىرەدى. بۇل ادامزات ءومىرىنىڭ نەگىزى – انانىڭ اق ءسۇتىنىڭ ءتۇسى. بۇل – ابىرويدىڭ, ىزگىلىكتىڭ, اماناتقا ادالدىقتىڭ بەلگىسى.
اكتسيانىڭ ماقساتى – اۋىلدىڭ بارشا ازاماتتارىن «اق ورامال» اكتسياسىن وتكىزۋگە قاتىستىرۋ ارقىلى ولاردىڭ ەتنوستىق شىعۋ تەگىنە, الەۋمەتتىك, ءدىني ەرەكشەلىكتەرىنە قاراماستان «الەم. ءححى عاسىر» مانيفەسى يدەياسىنا ءۇن قوسۋ.
ءلاززات الحامقىزى,
اۋداندىق جاستار ورتالىعىنىڭ مامانى
ماڭعىستاۋ وبلىسى,
ماڭعىستاۋ اۋدانى
...جاقسىلىعىن ايتادى
مۇگەدەكتەرگە ارنالعان پانسيونات
قوعامدا مۇگەدەك جانداردىڭ تاعدىرىنا بەيجاي قاراي المايتىن, ولارعا كورسەتەر قامقورلىقتىڭ ءتۇرلى جولىن قاراستىرىپ جاتقان ازاماتتار بار. وتكەن جىلى جاستارعا ارنالعان بيزنەس جوسپارعا جوباسىن ۇسىنىپ «Startup «Bolashak» بايقاۋىندا 8 ملن تەڭگەنى جەڭىپ العان ەلدوس بايالىشباەۆ بۇگىندە ءوز كاسىبىن اشىپ, قارجىسىن يگەرۋدە.
«اسار» پانسيوناتى ەلىمىزدىڭ ەمدىك قاسيەتى بار شيپالى الاكول جاعالاۋىندا ورىن تەپكەن. 30 ادامعا ارنالىپ جاسالعان پانسيونات ءتۇرلى اۋرۋلاردى ەمدەۋگە, جۇيكە جۇيەسىن قالىپقا كەلتىرۋگە, مۇگەدەك جانداردىڭ اياقتان تۇرىپ, ءجۇرىپ كەتۋىنە ارنالىپ جاسالىپ وتىر.
جوبا جەتەكشىسى ە.بايالىشباەۆتىڭ ءوزى جول اپاتىنان زارداپ شەگىپ ارباعا تاڭىلعان. تالدىقورعان ءوڭىرىنىڭ تۋماسى ەلدوس بايالىشباەۆ العاشىندا ءوزى قاتارلاس جانداردىڭ اياقتان تىك تۇرۋىنا جاعداي جاساۋ ءۇشىن «اسار» فيتنەس كلۋبىن قولعا السا, ەندى «اسار» پانسيوناتى سونىڭ جەمىسى.
«مەنىڭ جوبام 200 جوبانىڭ ىشىنەن سۇرىپتالىپ ۇزدىك بولىپ تانىلدى. مۇمكىندىگى شەكتەۋلى ادامدارعا وڭالتۋ ورتالىعىن اشقىم كەلدى. بار ارمانىم – مۇگەدەك جانداردى اياقتان تىك تۇرعىزۋ ءۇشىن وسى ورتالىقتاردى كەڭەيتۋ. سىرتتان كەلەتىن ەمدەلۋشىلەرگە جاتاقحانا, دارىگەرلەر مەن پسيحولوگتاردىڭ سانىن ارتتىرۋ, ءجۇزۋ الاڭىن, جىلقىمەن سەرۋەندەۋ سياقتى جوبالاردى قولعا العىم كەلەدى. ءبىزدىڭ جاڭا جوبامىزعا ارحيتەكتورلار كومەكتەستى, اكىم دە كەلىسىپ, اۋداننان ءبىر جارىم سوتىق جەر بولۋگە كەلىسىمىن بەردى», – دەيدى ە.بايالىشباەۆ. ەكى جىل ىشىندە كلۋبتا 220 ادام وڭالتۋ پروتسەسىنەن وتكىزىلسە, ونىڭ 35-ءى اياعىنا تىك تۇرعان. وسىلايشا, «اسار» پانسيوناتى اتالعان باستامانىڭ كەلەسى ساتىسى بولماق.
ايمان مۇقىشەۆا
الماتى وبلىسى
...ريزاشىلىق بىلدىرەدى
اۋىلىمىز اجارلى, تىرلىگىمىز بازارلى
ياسناياپوليانالىقتار وزدەرى تۇراتىن ەلدى مەكەندى اركەز ماقتان ەتەدى. ونىڭ بايىرعى قارت تۇرعىندارىنىڭ ءبىرى رەتىندە مەنىڭ دە ومىردەن تۇيگەندەرىم كوپ. ارعى-بەرگى شەجىرەنى اقتاراتىن بولسام, وتكەن عاسىردىڭ وتىزىنشى جىلدارىنداعى سۇرقيا ساياساتتى اينالىپ ءوتۋ مۇمكىن ەمەس. ۋكراينادان كۇشتەپ جەر اۋدارىلعان پولياكتار قازاقستاندى قونىس ەتۋگە ءماجبۇر بولدى. تاعدىردىڭ تاۋقىمەتىمەن قازاقتار سەكىلدى پەيىلى كەڭ, جۇرەگى جومارت حالىققا جولىعىپ, سودان بەرى قۋانىشىمىزدى دا, قايعىمىزدى دا بىرگە ءبولىسىپ كەلەمىز. اۋىلدا ءبىر جارىم مىڭداي ادام تۇرسا, ولاردىڭ 80 پايىزى – پولياكتار. بىراق ەشۋاقىتتا ۇلتقا, دىنگە بولىنگەن ەمەسپىز. تاتۋ-ءتاتتى بىرلىكتىڭ ارقاسىندا اۋىلىمىز اجارلانىپ, تىرلىگىمىز بازارلانىپ, ءورىسىمىز مالعا, قامبامىز دانگە تولى.
«ەلۋ جىلدا – ەل جاڭا, ءجۇز جىلدا – قازان» دەپ تەككە ايتپاسا كەرەك. اسىرەسە, تاۋەلسىزدىك العاننان بەرگى تۇستا اۋىلىمىز گۇلدەنىپ, نەبىر مادەني نىساندارمەن تولىقتى. بارلىق الەۋمەتتىك وبەكتىلەر جۇمىس ىستەپ تۇر. اناتولي رافالسكيدىڭ باسقارۋىنداعى شارۋاشىلىق ءوز قاراجاتىنا جۋىردا سپورتتىق-ساۋىقتىرۋ كەشەنىن سالىپ بەردى. پولياكتاردىڭ, قازاقتاردىڭ, ورىستاردىڭ كەشەگى, بۇگىنگى سان الۋان تىرشىلىگىنەن سىر شەرتەتىن جەرگىلىكتى مۇراجاي جۇمىس ىستەيدى.
ءبىزدىڭ بۇگىنگى ومىرىمىزگە قىزىعا قارايتىندار كوپ. جاستارىمىز دا وتانشىل, قالادان گورى دالانىڭ ەركىندىگىن جاندارىنا جاقىن تۇتادى.
كازيمير پوليانسكي,
اۋىلدىڭ قارت تۇرعىنى
سولتۇستىك قازاقستان وبلىسى,
تايىنشا اۋدانى,
ياسنايا پوليانا اۋىلى
...ۇلگى ەتەدى
ساۋاپتى ءىس اتقارىلدى
سارىوزەننىڭ جاعاسىندا بەسپىشەن دەگەن اۋىل بار. اۋىلداستارىمىز شەتتەرىنەن اقكوڭىل, قوناقجاي, ەڭبەكقور. اۋدان ورتالىعىنا جاقىن تۇرسا دا ءتۇرلى مەكەمەلەردىڭ تابالدىرىعىن توزدىرىپ, الاقان جايىپ كومەك سۇراپ جۇرمەيدى. مال ءوسىرىپ, ءوز قاجەتتىلىكتەرىن وزدەرى قامتاماسىز ەتىپ وتىر.
تاياۋدا بەسپىشەندىكتەر ءۇشىن تاعى دا ءبىر ساۋابى مول, باسقالارعا ۇلگى بولاتىنداي يماندى ءىس اتقارىلىپ, اۋىلدىڭ ماڭايىنداعى زيرات قورشالدى. بۇل ساۋابى مول ىسكە وسى اۋىلدىڭ تۇرعىنى بولعان مارقۇم سيسەنعالي بيجانوۆ اتامىزدىڭ سوڭىندا قالعان قىزدارى باقىت پەن بايان وزدەرىنىڭ مول ۇلەستەرىن قوستى. ءارى ەكەۋى قىز دا بولسا ەر-ازاماتتىڭ جۇگىن ارقالاي ءبىلدى.
ال قورىمدى قورشاۋ جۇمىستارىن ولاردىڭ تىكەلەي ۇيىمداستىرۋىمەن اۋىل تۇرعىندارى اتقاردى. سونىمەن بىرگە, بۇعان بۇگىنگى كۇنى باسقا جەرگە قونىس اۋدارعان بۇرىنعى بەسپىشەندىكتەر دە قولۇشىن بەردى.
تابىلدى حافيزوۆ,
ەڭبەك ارداگەرى
باتىس قازاقستان وبلىسى,
كازتالوۆ اۋدانى