قازاقستان پارلامەنتى سەناتىنىڭ توراعاسى قاسىم-جومارت توقاەۆ بەلارۋستىك «ستوليچنوە تەلەۆيدەنيە» (ستۆ) تەلەارناسىنا سۇحباتىندا ەۋرازيالىق ىقپالداستىقتىڭ وزەكتى ماسەلەلەرى, دسۇ جانە ەقىۇ-مەن ىنتىماقتاستىق, سونداي-اق قازاقستان مەن بەلارۋس قاتىناستارى تۋرالى ايتتى, دەپ حابارلادى وسى پالاتانىڭ ءباسپاسوز قىزمەتى.
ق.توقاەۆتىڭ پىكىرىنشە, ەۋرازيالىق ەكونوميكالىق وداق قازىرگى كەزدەگى حالىقارالىق قاتىناستارداعى ەرەكشە گەوەكونوميكالىق فاكتورعا اينالدى. ىقپالداستىقتىڭ قيىندىقتارى تۋرالى ساۋالعا سەنات باسشىسى ىقپالداستىق ۇدەرىستەرى زور كۇش-جىگەردى جانە ءتيىستى بىلىكتىلىكتى تالاپ ەتەتىنىن اتاپ ءوتتى. مەملەكەت باسشىلارىنىڭ ساياسي كۇش-جىگەرى, ەڭ الدىمەن, ساۋدا ماسەلەلەرى بويىنشا ۋاعدالاستىقتاردا نەگىزگى ءرول اتقاراتىنى كۇمانسىز ەكەنى ايتىلدى.
جوعارعى پالاتانىڭ باسشىسى ەاەو-نىڭ ىسكە كىرىسۋىنەن بىردەن ناتيجە كۇتۋگە بولمايدى دەپ سانايدى. «بىراق, پرەزيدەنتتەر دە, پارلامەنتتەر دە, ارينە, ءبىزدىڭ ەلدەرىمىزدىڭ حالىقتارى دا ەكونوميكالىق جانە گۋمانيتارلىق سالالاردا وتە تىعىز ىقپالداستىقتى قالايدى. كۇردەلى گەوساياسي جاعدايدى ەسەپكە العاندا, بۇل – نەگىزگى ماسەلە», – دەپ اتاپ ءوتتى ق.توقاەۆ.
سەنات توراعاسى ەكىجاقتى ىنتىماقتاستىق ءۇشىن دە, ايماقتىق ەكونوميكالىق ىقپالداستىقتىڭ يگىلىگى ءۇشىن دە قازاقستان مەن بەلارۋس پرەزيدەنتتەرى نۇرسۇلتان نازارباەۆ پەن الەكساندر لۋكاشەنكونىڭ ءجۇيەلى كەزدەسۋلەرىنىڭ ماڭىزدى ءرولىن اتاپ ءوتتى.
«ەكى ەلدىڭ باسشىلارى جەكە بايلانىستاردى دا, ىسكەرلىك بايلانىستاردى دا قولداپ وتىرادى, ءبىر-بىرىنە زور قۇرمەتپەن قارايدى. ءبىزدىڭ مەملەكەتتەرىمىزدىڭ اراسىنداعى ىنتىماقتاستىقتى دامىتۋ ءۇشىن بۇل وتە جاقسى», – دەدى ق.توقاەۆ.
بەلارۋستىڭ دۇنيەجۇزىلىك ساۋدا ۇيىمىنا كىرۋىنىڭ كەلەشەگى تۋرالى ساۋالعا جاۋاپ بەرە كەلىپ, توراعا قازاقستاننىڭ بۇل ۇدەرىسكە بارىنشا ىقپال ەتۋگە ۇمتىلاتىنىن جەتكىزدى.
ق.توقاەۆ بەلارۋستەگى پارلامەنتتىك سايلاۋ قارساڭىندا داۋىس بەرۋگە مونيتورينگ ءجۇرگىزۋ ماسەلەلەرى بويىنشا ەقىۇ-مەن ءوزارا ءىس-قيمىل تۋرالى پىكىرىمەن دە ءبولىستى.
«مەن 2010 جىلى بەلارۋس پرەزيدەنتىن سايلاۋعا بايقاۋشى رەتىندە قاتىستىم, ونىڭ قالاي وتكەنى ماعان ۇنادى, سوندىقتان مەن ارنايى مالىمدەمە جاريالاپ, بەلارۋس حالقى ءوز تاڭداۋىن جاساعانى جانە ول تاڭداۋدى ءبىزدىڭ ءبارىمىز قۇرمەتتەۋىمىز كەرەكتىگىن ايتتىم. جالپى, بىزگە ەقىۇ-مەن ىنتىماقتاستىقتى ورىستەتۋ كەرەك. بۇل – امبەباپ ۇيىم. قازاقستانعا قاتىستى ايتقاندا, ءبىز ءۇشىن ول باسىمدىققا يە. ەقىۇ پارلامەنتتىك اسسامبلەياسى اياسىندا بەلسەندى جۇمىس ىستەپ كەلەمىز. ەقىۇ-داعى بەلارۋس دەلەگاتسياسىمەن تىعىز ءارى ناتيجەلى جۇمىس ىستەۋىمىز كەرەك دەپ سانايمىن», – دەدى ق.توقاەۆ.