جازيرا سىياقىسىن سىڭلىسىنە بەردى

اۋىر اتلەت جازيرا جاپ­پارقۇل مەن دزيۋدوشى وتگون­تسەتسەگ گالبا­دراحتى قابىلداعان وڭتۇستىك قازاقستان وبلىسى­نىڭ اكىمى بەيبىت اتامقۇلوۆ وليمپيالىق ويىنداردىڭ ءجۇل­دەگەرلەرىنە لاي­ىق­تى قۇرمەت كورسەتتى. ريو وليمپياداسىنىڭ كۇمىس ءجۇل­دەگەرى جازيرا جاپ­پارقۇلعا شىمكەنت قالاسىنان ەكى بولمەلى پاتەر مەن Toyota Land Cruiser 200 ماركالى دجيپ كولىگى تارتۋ ەتىلسە, قولا مەدال يەگەرى گالبادراح ءبىر بولمەلى پاتەر مەن Toyota Prado ماشيناسىنا يە بولدى. ەستەرىڭىزدە بولسا, قازاقستان قورجىنىنا ەڭ العاشقى مەدالدى باقىتىن قازاق جەرىنەن تاپقان وتگونتسەتسەگ گالبادراح سالعان بولاتىن. – گالبادراحتىڭ جولى اقجول­تاي بولدى. ءبىزدىڭ مەملە­كەتىمىز تاۋەلسىزدىك العاننان بەرى ەڭ كوپ مەدالعا قول جەتكىزدى, – دەدى ايماق باسشىسى. – وبلىستىق سپورت جانە دەنە تاربيەسى باسقارماسىنىڭ باسشىسى الىبەك نۇرتاەۆ وسى حاباردى تەلەفون ارقىلى ماعان جەتكىزگەندە, ەرەكشە قۋاندىق. قوس سپورتشىمىزدىڭ جەڭىسى – تەك وڭتۇستىكقازاقستاندىقتار ءۇشىن عانا ەمەس, مەملەكەتىمىزدىڭ مەرەيى. ەلىمىزدىڭ بارلىق جانكۇيەرلەرى تىلەۋلەرىڭىزدى تىلەپ, جەڭىسكە جەتكەندەرىڭىزدە شەكسىز قۋاندى. سوندىقتان, بۇل سىي-سياپاتتى بارلىق قازاقستاندىقتاردىڭ تارتۋى دەپ قابىلداڭىزدار, – دەدى ول. بۇل ەكى سپورتشى دا «التىنعا» سىنىق سۇيەم عانا جەتپەي قالعان ەدى. جازيرا جاپپارقۇل قىتاي اتلەتىنەن جۇلقا جانە سەرپە كو­­تەرۋدى قوسقاندا, ەكى كيلو عانا قالىپ كەتتى. «ءالى تولىق جا­زىل­­ماعان جا­راقاتتارىم بار. ريو­دا سونىڭ زاردابىن تارتتىم. ەندى وزىمە-ءوزىم كەلىپ العان سوڭ جارا­قاتتارىمدى ەمدەپ, توكيو وليمپياداسىنىڭ «التىنى» ءۇشىن دايىندالاتىن بولامىن», – دەيدى ول. ال تاتاميدە نەبىر مىقتى­لاردىڭ اپتىعىن باسقان وت­گون­تسەتسەگ گالبادراح كەلەسى وليم­پيالىق ويىندارىندا «التىن» الۋعا جاعدايى ابدەن جەتەتىنىن سول جولى تانىتىپ كەتتى. جازيرا داڭقتى جەڭىسىنەن كەيىن جۋرناليستەردىڭ كوز الدىندا ءۇي-ىشىمەن سويلەستى. سوندا: «ءالفيا-اۋ, بۇل جەڭىستى سەن ءۇشىن الدىم عوي» دەگەنى قۇلاقتا جاتتالىپ قالىپتى. كەيىن بىلسەك, سپورتشىنىڭ ءالفيا دەگەن 11 جاسار جيەن ءسىڭلىسى تسەرەبرالدى سال اۋرۋىمەن اۋىرادى ەكەن. ونى شەتەلدە ەمدەتىپ, قاتارعا قوسۋ – جازيرانىڭ ارمانى. سوندىقتان, وزىنە بەرىلگەن سىياقىنى ءسىڭلىسىن ەمدەتۋگە جۇمسايتىنىن ايتقان. قازاقتىڭ اقكوڭىل قىزى وزىنە تيەسىلى ەكى بولمەلى پاتەردى اتا-اناسىنا سىيلادى. باقتيار تايجان, «ەگەمەن قازاقستان» وڭتۇستىك قازاقستان وبلىسى