ريو-دە-جانەيرودا وتكەن وليمپيالىق ويىنداردا ءتورتىنشى ورىن العان قازاقستاندىق اۋىر اتلەت دەنيس ۋلانوۆ ەندى ويىنداردىڭ قولا مەدالىن الىپ قالۋى دا ابدەن مۇمكىن.
رۋمىنيا بۇقارالىق اقپارات قۇرالدارى جازىپ جاتقانداي, ريودا 85 كيلوعا دەيىنگى سالماقتا ءۇشىنشى ورىن العان رۋمىن زىلتەمىرشىسى گابريەل سينكراياننىڭ ويىننان كەيىنگى تەكسەرىستە دوپينگ پايدالانعانى انىقتالعان. ونىڭ ىلە-اشالا تەكسەرۋدەن وتكىزىلگەن دوپينگ-سىناماسى وڭ ناتيجە بەرگەن.
حالىقارالىق اۋىر اتلەتيكا فەدەراتسياسى ازىرگە بۇل جايىندا حابارلاعان جوق.
الايدا, قازىر سينكراياننىڭ وليمپيادادا كورسەتكەن كورسەتكىشتەرى جويىلىپ جىبەرىلەتىنى كۇتىلىپ وتىر. بۇلاي بولعان جاعدايدا ءۇشىنشى ورىنعا ۋلانوۆ كوتەرىلىپ, قولا مەدال الادى. ءسويتىپ, قازاقستان قورجىنىنداعى مەدالدەر سانى 18-گە جەتەدى. ءسويتىپ, ءبىزدىڭ سپورتشىلار 3 التىن, 5 كۇمىس جانە 10 قولا مەدالدىڭ يەگەرلەرى بولىپ شىعا كەلەدى.
ايتا كەتۋىمىز كەرەك, وليمپيالىق ويىنداردا ۋلانوۆ پەن سينكراياننىڭ ەكەۋى بىردەي قوسسايىس قورىتىندىسىندا 390 كگ سالماقتان كوتەردى. الايدا, رۋمىن اتلەتىنىڭ جەكە سالماعى جەڭىلدەۋ بولعاندىقتان, قولا مەدال سوعان بەرىلدى.
دامير قوجامقۇل