پارلامەنت سەناتىنىڭ دەپۋتاتتارى مۇرات باقتيار ۇلى مەن بەكمىرزا ەلامانوۆ جالاعاش اۋدانىنا قاراستى بىرقاتار اۋىلداردى ارالادى. الدىمەن تاڭ اۋىلىندا بولعان سەناتورلار كاسىپكەر يمامزادا شاعىرتاەۆتىڭ شارۋا قوجالىعىنىڭ جۇمىسىمەن تانىسىپ, ەگىن دالاسىنداعى ەڭبەگىنە جوعارى باعا بەردى.
«تاڭ» لتد» جشس باس ديرەكتورى ي.شاعىرتاەۆ 2003 جىلدان بەرى شارۋاشىلىقپەن اينالىسىپ, اۋىل الەۋەتىنىڭ جاقسارۋىنا ولشەۋسىز ۇلەس قوسىپ كەلەدى. مىسالى, ول بيىل اۋىلداعى مەشىت پەن بالاباقشانىڭ كۇردەلى جوندەۋ جۇمىسىنا قولعابىس ەتىپ وتىر. كەڭەس داۋىرىندە سالىنعان بالاباقشا عيماراتىنىڭ كۇردەلى جوندەۋ جۇمىستارىن كەلەر جىلى اياقتاۋ جوسپارلانسا, مەشىتتى بيىل پايدالانۋعا بەرۋدى جوسپارلاعان. قوس سەناتور ساۋاپتى ءىستى قولعا العان اۋىل كاسىپكەرىنىڭ بۇل باستاماسىنا العىسىن ءبىلدىردى. ال اۋدان اكىمى تالعات دۇيسەباەۆ جالپى وڭىردە اتقارىلىپ جاتقان جۇمىستارمەن تانىستىردى.
مۇنان سوڭ م.باقتيار ۇلى مەن ب.ەلامانوۆ اققۇم اۋىلىنداعى «شۇعىلا» بالاباقشاسىنىڭ كۇردەلى جوندەۋ جۇمىستارىمەن تانىستى. 1975 جىلى بوي كوتەرگەن عيماراتتىڭ قۇرىلىس جۇمىستارىنا رەسپۋبليكالىق بيۋدجەتتەن جانە جەرگىلىكتى بيۋدجەتتەن قاجەتتى قارجى بولىنگەن. بۇگىندە كۇردەلى جوندەۋ جۇمىستارىنىڭ 50 پايىزى اياقتالدى. «سوفت قىزىلوردا» جشس جوندەۋ جۇمىستارىن وسى ايدىڭ سوڭىنا دەيىن اياقتاپ, 31 تامىز كۇنى پايدالانۋعا بەرۋدى كوزدەپ وتىر. سەناتورلار بالاباقشانىڭ كۇردەلى جوندەۋ جۇمىستارىن جوعارى باعالادى.
سونىمەن قاتار, سەناتورلار وبلىس ورتالىعىندا قىزىلوردا قالالىق ءماسليحاتىنىڭ دەپۋتاتتارى, قوعامدىق كەڭەس مۇشەلەرى, قۇقىق قورعاۋ ورگاندارىنىڭ قىزمەتكەرلەرى, ۇستازدار قاۋىمىمەن كەزدەسۋ وتكىزدى. جۇزدەسۋ بارىسىندا ەلىمىزدە قابىلدانىپ جاتقان جاڭا زاڭدار, تۇيتكىلدى ماسەلەلەر تۋراسىندا كەڭىنەن اڭگىمەلەندى.
ەرجان بايتىلەس,
«ەگەمەن قازاقستان»
قىزىلوردا وبلىسى