التىنداي جارقىراعان ءتۇسى ءۇشىن «التىن بالىق» اتالىپ كەتكەن بالىقتىڭ ەرەكشە سۇيكىمدى ءتۇرى ادامداردىڭ «ءۇش تىلەگىن ورىنداماق» تۇگىلى, قورشاعان ورتاعا قاۋىپ توندىرە باستادى. اۆستراليانىڭ بالىق شارۋاشىلىعى ورتالىعى وزەندەردەگى التىن بالىقتاردىڭ ءوسىمىن شەكتەۋگە شاماسى جەتپەي, دابىل قاعۋعا ءماجبۇر بولدى.
ۆاسسا وزەنىندە ونداي بالىقتاردىڭ پايدا بولعانىنا 10 جىلدان اسپايدى. ون جىلدىڭ ىشىندە تەز كوبەيىپ كەتكەن بالىقتار كوزىنە كورىنگەننىڭ ءبارىن جەي بەرەتىن اشقاراقتىعىن كورسەتىپ, باسقا بالىقتاردى قۇرتا باستاپتى. سىرت كوزگە سۇيكىمدى كورىنگەن التىن بالىقتار ءشوپ-شالام, ماسا سياقتى جاندىكتەردى ايتپاعاندا, بالىقتاردىڭ ۋىلدىرىعىن, وزىنەن تۇرقى شاعىن تۇقىمداستارىن قىلعىتا بەرەدى ەكەن.
– ولاردىڭ كوبەيىپ كەتۋىنە جەرگىلىكتى حالىقتىڭ ءوزى كىنالى. اكۆاريۋمدا باعىپ جۇرگەن بالىقتارىن وسى وزەنگە اكەلىپ قويا بەرەدى. قورشاعان ورتاعا زيان كەلتىرەتىنىن ەشقايسىسى ويلاماعان, – دەيدى بالىق شارۋاشىلىعى ورتالىعىنىڭ قىزمەتكەرلەرى.
ەندى ورتالىق قىزمەتكەرلەرى التىن بالىقتاردى اۋلاۋدىڭ قامىمەن الەكتەنىپ جاتىر.
ارنۇر اسقار,
«ەگەمەن قازاقستان»