ەل سەنىمىن اقتاپ, چەمپيون اتاندى
كەشە گازەتىمىزدە وليمپيادانىڭ ءبىر كۇنىن قورىتىندىلاپ بەرگەن ماقالامىزدا بوكسشىلار دانيار ەلەۋسىنوۆ پەن ادىلبەك نيازىمبەتوۆتىڭ فينالعا شىققانىنا قۋانىش بىلدىرگەنبىز. سول دانيار كەشە ەرلەدى. جالپى, ونىڭ قۇبىلىس ەكەندىگى لوندون وليمپياداسىندا ايتىلعان ەدى. بەلگىلى بوكس مامانى يۋري تسحاي: «دۇنيە جۇزىنەن جينالعان بوكس ماماندارىنىڭ اراسىندا بۇگىنگى مىقتى قولعاپ شەبەرلەرى تۋرالى كوپ اڭگىمە بولادى. سوندا ولار دانيار ەلەۋسىنوۆ تۋرالى ەرەكشە پىكىر بىلدىرەدى. قازىرگى بوكس كاسىپقويلاردىڭ توبەلەسىنە ۇقساپ بارادى. ەلەۋسىنوۆ بوكستىڭ ۇلى ونەر, ۇلكەن مادەنيەت ەكەندىگىن ءوزىنىڭ ۇرىس مانەرىمەن دالەلدەگەن دارا بوكسشى, ول ۇزاققا بارادى», دەپ ءبىزدى قۋانتقان. بىراق, سول جولى اعاسى سەرىك ساپيەۆ التىننان ولجا سالدى. ۆەل باركەر كۋبوگىن ەلگە اكەلدى. ءبىز دانياردىڭ جۇلدىزدى ءساتىن كۇتتىك. تەك قاسىنداعى بوكسشىلار عانا ەمەس, بۇكىل ەل سەندى. بۇگىن سول ءۇمىت اقتالدى. ريو وليمپياداسىنىڭ 69 كيلو سالماققا دەپ ارنايى سوققان سوم التىن مەدالى ءبىزدىڭ باتىر جىگىتتىڭ قولىندا.
بىراق التىن جۇلدە وڭاي بەرىلگەن جوق. جارتىلاي فينالدا قارسىلاسىنىڭ باسى كەزدەيسوق ءتيىپ, قاباعى جاراقاتتانىپ قالعان ەدى. كەشىرەك باس جاتتىقتىرۋشىعا حابارلاسقانىمىزدا: «ەكى جەردەن تىكتىردىك. جاراقاتى اۋىر, دارىگەرلەردەن قاۋىپتەنىپ وتىرمىز. ايتپەسە, دانيار تاس-ءتۇيىن دايىن», – دەگەن. قارسىلاسى وزبەكستاندىق شاحرام گياسوۆ – وتە مىقتى بوكسشى. سوققىسى اۋىر. فينالعا دەيىن تالاي مىقتىنىڭ كەۋدەسىن باستى, جارىس جولىنان شىعارىپ تاستادى. «التىننىڭ» شەتى كورىنىپ تۇرعاندا, جانىن نەگە اياسىن! ونىڭ ۇستىنە, ەلەۋسىنوۆتىڭ اۋىر جاراقاتى بار, ءدال سول جەردەن ۇرا بەرسە, دارىگەرلەر جارىستان الىپ تاستايدى عوي. ىشىندە تاعى باسقا قانداي قيال بولعانىن بىلمەسەك تە ويىن وسىلاي جوبالادىق.
سولاي بولىپ شىقتى. شاحرامنىڭ جاقىننان ۇرىس سالعاندا, سول جاراقاتقا قاتتى ۇرۋدى كوزدەپ جۇرگەنى بەلگىلى بولدى. ايتپەسە, وڭايلىقپەن سوققى دارىتپايتىن دانيار شەگىنە ۇرىس سالىپ شالدىرماي كەتەدى. شاحرامدى بۇل ءۇشىن جازعىرا المايسىڭ. باپكەرىنىڭ دە تاڭعان تاكتيكاسى وسى. دانيار وتە سەزىمتال, قارسىلاسىنىڭ ۇرعان سوققىسىنىڭ قاي شاماعا جەتەتىنىنە دەيىن شايقاسىپ ءجۇرىپ, ەسەپتەپ ۇلگەرەدى. شاحرامنىڭ ءدوپ تيسە, اتان وگىزدى مۇرتتاي ۇشىراتىن سوققىلارى دانياردىڭ يەگىنە ينەنىڭ جاسۋىنداي قاشىقتىقتا تيمەي جاتتى.
نەگىزىندە, دانياردىڭ شەگىنىپ ۇرىس سالۋى قارسىلاسىنان قايمىعۋ ەمەس, اۋىر سوققىلارعا شالدىرمايتىن تاكتيكالىق قارۋى. قاندايدا مىقتى قارسىلاس بولسىن, مۇنداي بوپساعا شىداي الماي, جىپتەي تارتىلىپ تۇرعان جۇيكەسى سىر بەرە باستايدى. سوققىلاردان جالتارىپ قانا قويماي, ءوزى اۋىر جۇدىرىقتارمەن كومىپ تاستايتىن دانيارعا ەسەسى كەتكەن شاحرام ورشەلەنە العا ۇمتىلدى. ەكەۋى دە بىلايعى ومىردە سىيلاس بولعانىمەن, ءوزى ءۇشىن دە, وزىنە سەنگەن حالقى ءۇشىن دە ولىسپەي بەرىسپەيتىن ۇرىس سالىپ ءجۇر. سوڭعى راۋندتا شاحرام جەڭىلىپ جاتقانىن سەزىپ, بار كۇشىن سالدى. ءبىزدىڭ جىگىت سىناپتاي سىرعىپ, جەتكىزبەي ءجۇر. جاناسقان ساتتە قولى الماس قىلىشتاي جارق ەتە قالادى. كۇمانسىز جەڭدى: ءۇش تورەشى دە دانيار جەڭدى دەپ تانىعان. ءسويتىپ, دانياردىڭ عانا ەمەس, ءبىزدىڭ دە ارمانىمىز ورىندالدى.
كوپتەن بەرى قاباعى جاۋار بۇلتتاي تۇنەرىپ جۇرگەن باس جاتتىقتىرۋشى مىرزاعالي ايتجانوۆتىڭ دا اشۋى باسىلىپتى. ءبىز بۇگىنگى جەكپە-جەكتىڭ ءتۇيىنىن تارقاتۋدىڭ ءمانىسىن سۇرادىق.
– دانيار ەلەۋسىنوۆ – كوماندا كاپيتانى بولعاندىقتان, وعان ارتىلعان جاۋاپكەرشىلىك جۇگى اۋىر, – دەدى ول. – سوندىقتان, تاڭەرتەڭگىلىك كوماندانىڭ بارلىق مۇشەسى جينالىپ, دانياردىڭ اتىنا سالماقتى سوزدەر ايتتى. ولار ەلەۋسىنوۆتىڭ قارسىلاسىنان مىقتى ەكەندىگى, گياسوۆپەن قالاي ايقاس وتكىزۋدىڭ جولدارى تارازىلانىپ, بارلىعى ءۇشىن كاپيتان جەڭىسكە جەتۋى كەرەك دەگەن جۇرەكجاردى تىلەكتەر ءبىلدىردى. ءبىزدىڭ بوكس سپورتى تاريحىندا الەم چەمپيونىنىڭ وليمپيالىق ويىندار چەمپيونى بولۋىن سەرىك ساپيەۆ باستاپ بەرىپ ەدى. ودان كەيىن, مىنە, دانيار وسى جەتىستىكتى قايتالاپ وتىر.
شاحرام دا جىگىتتىڭ تورەسى ەكەن. باسپاسوز كونفەرەنتسياسىندا دانيارعا ۇلكەن قۇرمەتپەن قارايتىندىعىن ايتتى. «بۇل وتە مىقتى جەكپە-جەك بولدى. ءۇشىنشى راۋندتا كۇشىم جەتپەي قالدى. بىراق, كىم قالاي دەسە دە ءبىز ءتۇبى ءبىر تۋىسقان حالىقپىز, سوندىقتان تۋىسقان قازاق حالقىن تاعى ءبىر التىنىمەن قۇتتىقتايمىن», دەدى.
وسىلايشا تاعى ءبىر جاقسى كۇن ارتتا قالدى. بۇل كۇنى تاماشا جەتىستىكتەرگە قول جەتكىزگەن بالۋانىمىز ەلميرا سىزدىقوۆا قولا مەدالدىڭ اۋىلىنا ات ويناتىپ كەلدى.
«ەگەمەن قازاقستاننىڭ»
ارناۋلى ءتىلشىسى
باقتيار تايجان
ريو-دە-جانەيرودان
حابارلايدى
سۋرەتتى تۇسىرگەن
دانيار مايلىباەۆ