ريو-دە-جانەيرو وليمپيالىق ويىندارىنداعى ون ءبىرىنشى جارىس كۇنى قازاقستان قۇراماسى قورجىنىنا 1 التىن, 1 قولا مەدال قوسىلدى. التىن جۇلدەنى ءبىزدىڭ التىن ايدارلى ارداقتى ۇلىمىز, بوكستان قازاقستان قۇراماسىنىڭ كاپيتانى, استانالىق دانيار ەلەۋسىنوۆ وزبەك بوكسشىسى شاحرام عياسوۆپەن شايقاستا جەڭىپ الدى. وسىلايشا ول قازاق بوكسشىلارىنىڭ وليمپيادانىڭ 69 كيلوعا دەيىنگى سالماقتاعى التىن مەدالىن قاتارىنان ءتورتىنشى مارتە جەڭىپ الۋىن قامتاماسىز ەتتى. دانيار 2004 جىلى افينادا وتكەن وليمپيالىق ويىنداردا باقتيار ارتاەۆ نەگىزىن قالاعان, كەيىن 2008 جىلى بەيجىڭدە باقىت سارسەكباەۆ, 2012 جىلى لوندوندا سەرىك ساپيەۆ جالعاستىرعان ۇلگىلى ءۇردىستى ودان ءارى ۇلاستىرا ءبىلدى. بۇل – وليمپيالىق ويىنداردىڭ تاريحىندا بۇرىن-سوڭدى كەزدەسپەگەن كورسەتكىش. دانيار سونىمەن بىرگە, سەرىك ساپيەۆتەن كەيىنگى ءبىزدىڭ الەم چەمپيوندىعى اتاعىن وليمپ شىڭىنا شىعۋمەن جالعاستىرا بىلگەن ەكىنشى بوكسشىمىز.
كەشەگى كۇننىڭ تاعى ءبىر قۋانىشى – قاراعاندىلىق بالۋان ەلميرا سىزدىقوۆا قولا مەدال الدى. ءسويتىپ, قازاق قىزدارى اراسىنان وليمپيالىق ويىندار تاريحىندا ونىڭ جۇلدەلى تۇعىرىنا كوتەرىلگەن ءبىرىنشى قىز اتاندى. سونداي-اق, ەلميرانىڭ ەلىمىز قورىنا وليمپيادانىڭ 12-ءشى مەدالى بولىپ ەنگەن جۇلدەسىنىڭ تاعى ءبىر سالماقتى جاعى بار. ول قازاقستان سپورتشىلارىنىڭ بۇل جولى وليمپيالىق ويىنداردا العان جيىنتىق مەدالدارى سانىنىڭ دا اسىپ تۇسكەلى تۇرعانىن كورسەتىپ بەردى. ازىرگە ول 12-ءشى بولىپ تۇرعانىمەن, ءالى قانداي ءتۇستى بولاتىندارى اجىراتىلماعان ادىلبەكتىڭ, يۆاننىڭ جانە داريعانىڭ ناگرادالارىن قوسقاندا 15-ءىنشى بولىپ شىعا كەلەدى. ال ءبىزدىڭ بۇعان دەيىنگى ەڭ ۇزدىك كورسەتكىشتەرىمىز بەيجىڭ مەن لوندوندا العان 13 مەدال بولاتىن.
كەشە تۇندە شارشى الاڭعا بوكسشى ادىلبەك نيازىمبەتوۆ تە شىقتى. ول 81 كيلوعا دەيىنگى سالماقتىڭ التىن مەدالىن كۋبالىق حۋليو سەزار لا كرۋزبەن ساراپقا سالدى. بۇعان دەيىن بۇل قارسىلاستار ەكى رەت – 2011 جىلى باكۋدە, 2013 جىلى الماتىدا وتكەن الەم چەمپيوناتتارىنىڭ فينالىندا كەزدەسكەن ەدى. بۇل جولى تاعى دا فينالدىق كەزەڭدە قولعاپ ءتۇيىستىرىپ وتىر. الايدا جان بەرىپ, جان الىسقان جەكپە-جەك ناتيجەسى تاعى دا حۋليو سەزوردىڭ پايداسىنا شەشىلدى. ءسويتىپ, ادىلبەك كەزەكتى كۇمىسىن قاناعات تۇتتى.
سۋرەتتى تۇسىرگەن دانيار مايلىباەۆ