ەلباسى نۇرسۇلتان نازارباەۆتىڭ توراعالىعىمەن ەلدىڭ الەۋمەتتىك-ەكونوميكالىق دامۋ قورىتىندىلارى جانە جەر رەفورماسى جونىندەگى كوميسسيانىڭ قىزمەتى تۋرالى كەڭەس ءوتتى, دەپ حابارلادى پرەزيدەنتتىڭ ءباسپاسوز قىزمەتى.
كەڭەسكە پرەمەر-مينيستر ك.ءماسىموۆ, پرەزيدەنت اكىمشىلىگىنىڭ باسشىسى ءا.جاقسىبەكوۆ, پرەمەر-ءمينيستردىڭ ورىنباسارى – اۋىل شارۋاشىلىعى ءمينيسترى ا.مىرزاحمەتوۆ, پرەزيدەنتتىڭ كومەكشىسى – قاۋىپسىزدىك كەڭەسىنىڭ حاتشىسى ن.ەرمەكباەۆ, ۇلتتىق ەكونوميكا ءمينيسترى ق.بيشىمباەۆ قاتىستى.
ءىس-شارا بارىسىندا جەر رەفورماسى جونىندەگى كوميسسيانىڭ جۇمىس قورىتىندىلارى تالقىلانىپ, جەر زاڭناماسىنىڭ ءوزگەرىستەرىنە ءموراتوريدى 5 جىلعا ۇزارتۋ تۋرالى شەشىم قابىلداندى.
– جەر كودەكسىنىڭ بىرقاتار نورمالارىنا موراتوري ەنگىزىلگەن كەزدەن باستاپ كوميسسيا ماڭىزدى جۇمىس جۇرگىزدى, ەلدىڭ بارلىق وڭىرىندە كەڭەس وتكىزىپ, ازاماتتاردىڭ پىكىرىن تىڭدادى. جۇمىس بارىسىندا ولار جاقسى ۇسىنىستار ايتتى, اتاپ ايتقاندا, جالعا بەرەتىن تەلىمدەردىڭ شەكتى كولەمىن, جەردى پايدالانۋ تاسىلدەرى مەن ونى ءتيىمسىز پايدالانعان جاعدايدا قابىلداناتىن شارالاردى انىقتاۋ تۋرالى ۇسىنىستار ەنگىزىلدى. وسىلايشا, ءبارى جەردى 49 جىلعا دەيىن جالعا بەرۋ ينستيتۋتىن ساقتاۋ قاجەت دەگەن ورتاق شەشىمگە كەلدى. سونىمەن بىرگە, الەمدىك تاجىريبەنى تاعى دا زەرتتەپ, قوسىمشا ۋاقىت قاجەت ەكەنى تۋرالى تۇرعىندارعا بىلىكتىلىكپەن ءتۇسىندىرۋ كەرەك. سوندىقتان كوميسسيانىڭ ءموراتوريدى تاعى 5 جىلعا ۇزارتۋ تۋرالى ۇسىنىسىن قابىلدايمىن, – دەدى نۇرسۇلتان نازارباەۆ.
سونداي-اق, قازاقستان پرەزيدەنتى ۇكىمەتتىڭ جەر زاڭناماسىنا وزگەرىستەر ەنگىزۋ تۋرالى شەشىم قابىلداعان كەزدە اگروونەركاسىپ سالاسىنا قاراجات تارتۋ ماقساتىن باسشىلىققا العانىن اتاپ ءوتتى.
– اۋىلدىق جەرلەردە حالىقتىڭ شامامەن 40 پايىزى تۇرىپ جاتىر, 20 پايىزى اۋىلدا ەڭبەك ەتەدى. اۋىل شارۋاشىلىعىن ءوركەندەتۋ كوپتەگەن سالالاردىڭ دامۋىنا سەپتىگىن تيگىزەدى. اۋىل شارۋاشىلىعىمەن اينالىساتىنداردىڭ بارلىعى بۇل سالاعا قولداۋ كورسەتۋ ءۇشىن مەملەكەتتىڭ قانداي كۇش-جىگەر جۇمساعانىن جاقسى بىلەدى. جىل سايىن اگرارلىق سەكتورعا ايتارلىقتاي قاراجات جۇمسالادى, بىراق ول ءوزىن اقتاي بەرمەيدى. نارىقتىق ەكونوميكادا ولاي بولمايدى. مۇنىڭ سەبەبى, اۋىل شارۋاشىلىعىنداعى ەڭبەك ونىمدىلىگىنىڭ تومەندىگىندە جاتىر, ال ونى ارتتىرۋ ءۇشىن قوسىمشا قاراجات سالۋ كەرەك. بۇكىل الەم اگرارلىق سەكتورعا ينۆەستيتسيا تارتۋ ىسىمەن اينالىسۋدا. ءبىزدىڭ مەملەكەتىمىز دە اۋىل شارۋاشىلىعىن دامىتۋ ءۇشىن كوبىرەك كاپيتال تارتۋدى قالادى. ەگەر بۇل جۇمىس تۇسىندىرۋدەن باستالىپ, تەك سودان سوڭ عانا زاڭدار قابىلدانسا, وندا احۋال باسقا بولار ەدى, – دەدى مەملەكەت باسشىسى.
بۇدان بولەك, كەڭەستە رەسپۋبليكانىڭ الەۋمەتتىك-ەكونوميكالىق دامۋىنىڭ نەگىزگى ماسەلەلەرى, مەملەكەتتىك باعدارلامالاردىڭ ورىندالۋ بارىسى جانە الداعى كەزەڭگە ارنالعان جوسپارلار قاراستىرىلدى.
– ەلدىڭ ەكونوميكالىق دامۋى الەمدە بولىپ جاتقان ۇدەرىستەر سالدارىنان زور قىسىم كورىپ وتىر. قازىرگى قارجىلىق-ەكونوميكالىق داعدارىس, ساندىق ەكونوميكانىڭ جاڭا پاراديگماسىنا كوشۋ بىزدەن مۇلدە جاڭا قادامدار تالاپ ەتەدى. ءبىز سونى تابا ءبىلۋىمىز كەرەك, بۇل ءۇشىن ەلدە رەسۋرستار جەتكىلىكتى, – دەدى نۇرسۇلتان نازارباەۆ.
ءوز بايانداماسىندا ا.مىرزاحمەتوۆ مەملەكەت باسشىسىنىڭ تاپسىرماسىمەن قۇرىلعان كوميسسيا استانادا, سونداي-اق بىرقاتار وڭىردە جۇرتشىلىقتىڭ قاتىسۋىمەن كوشپەلى وتىرىس وتكىزگەنىن ايتتى.
– ازاماتتاردىڭ ارىز-شاعىمدارى ءۇشىن ارناۋلى سايت اشىلىپ, call-ورتالىقتار قۇرىلدى, بۇگىندە ولارعا 13 مىڭنان استام تەلەفون قوڭىراۋى تۇسكەن. ءتۇسىندىرۋ جۇمىستارى بارىسىندا جۇرتشىلىقتى بارىنشا كەڭىرەك قامتۋ ءۇشىن اكىمدىكتەر جانىنداعى قوعامدىق كەڭەستەر ىسكە تارتىلدى, حالىقتىڭ 67 مىڭ وكىلىمەن كەزدەسۋ ءوتتى, – دەدى پرەمەر-ءمينيستردىڭ ورىنباسارى – اۋىل شارۋاشىلىعى ءمينيسترى.
ا.مىرزاحمەتوۆ كوميسسيانىڭ نەگىزگى ۇسىنىستارى, سونىڭ ىشىندە اۋىل شارۋاشىلىعى جەرىن جالعا بەرۋ ينستيتۋتىن ساقتاپ, ودان ءارى دامىتۋ, جالعا بەرىلەتىن جەر تەلىمدەرىنىڭ شەكتى كولەمىن بەلگىلەۋ قاجەتتىگى جونىندە دە ايتتى. سونداي-اق, حالىقتىڭ جايىلىمدار مەن شابىندىق جەرلەرگە قاتىستى مۇددەسى مەن تالاپتارىن ەسكەرۋ كەرەكتىگى, جەكە تۇرعىن ءۇي سالۋ ءۇشىن جەر بەرۋدىڭ ناقتى ەرەجەلەرى مەن تەتىكتەرىن انىقتاۋ قاجەتتىگى اتالىپ ءوتتى.
مەملەكەت باسشىسى كەڭەس قورىتىندىسى بويىنشا بىرقاتار تاپسىرما بەردى.
سۋرەت پرەزيدەنتتىڭ ءباسپاسوز قىزمەتىنەن الىندى