پرەزيدەنت ن.نازارباەۆ «الەۋمەتتىك-ەكونوميكالىق جاڭعىرتۋ – قازاقستان دامۋىنىڭ باستى باعىتى» اتتى جولداۋىندا سىبايلاس جەمقورلىققا قارسى كەشەندى باعدارلاما ازىرلەۋدى جانە سىبايلاس جەمقورلىق قىلمىستارىنا جول بەرمەۋدى قاتاڭ تابىستاپ, باستى مىندەت ەتىپ قويعان بولاتىن. ارينە, مەملەكەت باسشىسىنىڭ الاڭدايتىنداي ءجونى بار. ويتكەنى, سىبايلاس جەمقورلىق, مەملەكەت قارجىسىن تالان-تاراجعا سالۋشىلىق ءالى دە توقتار ەمەس. ونىمەن كۇرەس جۇرگىزىلىپ-اق كەلەدى. سوعان ساي قازىرگى تاڭدا سىبايلاس جەمقورلىق سيپاتىنداعى قىلمىستارمەن كۇرەسۋگە ەرەكشە كوڭىل بولىنۋدە.
جەمقورلىق قىلمىستاردىڭ ەڭ تارالعان ءتۇرى پارا الۋ جانە پارا بەرۋ بولىپ تابىلادى. سىبايلاس جەمقورلىققا قارسى ءىس-قيمىل ۇلتتىق بيۋروسىنىڭ جامبىل وبلىسى بويىنشا دەپارتامەنتىندە اعىمداعى كەزەڭدە 422 ءىس ءوندىرىستە بولعان. وتكەن جىلى بۇل كورسەتكىش 419 بولاتىن. دەپارتامەنت ارالاسۋىمەن 287 ءىس تىركەلدى. ونىڭ 207-ءسى جەمقورلىق, 98-ءى باسقا ورگاننان كەلىپ تۇسكەن. اياقتالعان ىستەردىڭ سانى – 337. بۇل وتكەن جىلعى كورسەتكىشتەرمەن سالىستىرعاندا جوعارى. سونداي-اق, سوتقا جولدانعان ىستەردىڭ سانى – 201. بۇل جاعىنان جامبىل وبلىسى ەڭ جوعارى كورسەتكىشكە قول جەتكىزىپ وتىر. ەندى سول قىلمىستىق ىستەردىڭ كەيبىرىنە توقتالا كەتسەك.
«جامبىل وبلىسىنىڭ ءبىلىم سالاسىنداعى باقىلاۋ دەپارتامەنتى» مم-ءنىڭ ءبولىم باسشىسىنا قاتىستى سوتقا دەيىنگى تەرگەپ-تەكسەرۋ تىركەلدى. ياعني, جاسىرىن تەرگەۋ ارەكەتتەرىن جۇرگىزۋ بارىسىندا, ولار يبن-سينا اتىنداعى تاراز مەديتسينالىق كوللەدجىنىڭ بۇرىنعى ديرەكتورى ازاماتشا ق.-عا ءبىلىم سالاسىندا قىزمەت ىستەۋ ءۇشىن ليتسەنزيا بەرۋ جانە جالپى قامقورلىعى ءۇشىن پارا رەتىندە العان 30 000 اقش دوللاردىڭ 200 000 تەڭگەسىن قايتارۋ بارىسىندا اشكەرەلەندى. قازىرگى ۋاقىتتا قىلمىستىق ءىس بويىنشا تەرگەۋ جۇرگىزىلۋدە.
سونداي-اق, 2015 جىلدىڭ 27 ناۋرىزىندا سوتتالعان ق. جازا مەرزىمىن ودان ءارى وتەۋ ماقساتىندا جد-158/1 تۇزەۋ مەكەمەسىنەن جد-158/2 تۇزەۋ مەكەمەسىنە اۋىستىرىلعان. قىلمىستىق ءىستىڭ قۇجاتتارى جانە جۇرگىزىلگەن جاسىرىن تەرگەۋ ارەكەتتەرىنىڭ قورىتىندىسى بويىنشا 2015 جىلدىڭ 27 ناۋرىزىندا ازامات ر. پايدا تابۋ ماقساتىندا, لاۋازىمدىق وكىلەتتىگىن اسىرا پايدالانا وتىرىپ, جد-158/2 تۇزەۋ مەكەمەسىنىڭ قىزمەتكەرلەرىنە, ناقتى ءوزىنىڭ وكىلەتتىلىگى مەن قۇقىقتارىنا جاتپايتىن, ق.-عا قاتىستى كۇش قولدانۋ تۋرالى نۇسقاۋ بەرگەن. 2015 جىلدىڭ 29 ناۋرىزىندا جد-158/2 تۇزەۋ مەكەمەسىنىڭ باسشىسى بولماق بولعان ازامات ش. جازاسىن وتەۋشى ق.-دان, وعان ۇستاۋ رەجىمىنە قولايلى جاعداي جاساعانى ءۇشىن 10 000 اقش دوللارى كولەمىندە اقشالاي سىياقى العان جانە ونى ر.-عا بەرگەن. وسىلايشا قىلمىستىق ءىس بويىنشا جەتكىلىكتى دالەلدەردى ەسكەرە وتىرىپ, ازامات ر. قىلمىستىق قۇقىق بۇزۋشىلىق جاساعانى ءۇشىن قىلمىستىق كودەكستىڭ 362-بابى 4-بولىگىنە ساي كۇدىكتى دەپ تانىلدى.
ەل زاڭنامالارىنا سايكەس پارا الۋشىلارمەن قاتار, پارا بەرۋشىلەر دە قىلمىستىق جاۋاپكەرشىلىككە تارتىلادى. وسىنداي فاكتىلەر بويىنشا بىرقاتار قىلمىستىق ىستەر اشىلعان. 2015 جىلدىڭ 10 جەلتوقسانىندا «گازسپەتسستروي-ا» جشس-ءنىڭ مونتاجداۋ ىسكەرى م. التاميروۆ «تاراز قالاسىنىڭ گاز تاراتۋ جەلىلەرىن جاڭعىرتۋ» نىسانىن مەملەكەتتىك كوميسسيامەن قابىلداۋ جونىندەگى اكتىگە قول قويدىرۋ ماقساتىندا جامبىل وبلىسى بويىنشا ەكولوگيا دەپارتامەنتىنە بارعان. دەپارتامەنت باسشىسىنىڭ ورىنباسارى د.اتاۋوللا ۇلىمەن ونىڭ قىزمەتتىك كابينەتىندە ەكەۋارا اڭگىمە بارىسىندا نىساندى قابىلداۋ جونىندەگى اكتىگە دەپارتامەنت تاراپىنان قول قويۋ ءۇشىن 100 000 تەڭگە پارا بەرۋگە كەلىسەدى. سول كۇنى ءتۇس قايتا د.اتاۋوللا ۇلى م. التاميروۆتان 100 000 تەڭگەنى پارا الۋ بارىسىندا ۇستالدى. 2016 جىلدىڭ 21 مامىرىندا تاراز قالالىق №2 سوتىنىڭ ۇكىمىمەن ولار ايىپتى دەپ تانىلىپ, م. قونىسبەكوۆ پەن د. اتاۋوللا ۇلىنىڭ ارقايسىسىنا 5 جىل شارتتى باس بوستاندىعىنان ايىرىلۋى جانە 7 000 000 تەڭگەدەن ايىپپۇل سالىندى, ال م.التاميروۆكە مەملەكەتتىك قىزمەتپەن ءومىر بويىنا اينالىسۋ قۇقىعىنان ايىرا وتىرىپ, 3 000 000 تەڭگە مولشەرىندە ايىپپۇل سالىندى.
ماقسات قوجاباەۆ,
سىبايلاس جەمقورلىققا قارسى ءىس-قيمىل ۇلتتىق بيۋروسىنىڭ جامبىل وبلىسى بويىنشا
دەپارتامەنت باسشىسى