زاۋىتتان سوناۋ 1935 جىلى شىققان Mercedes-Benz 500K Special Roadster-1935 اۆتوكولىگى اۋكتسيون ارقىلى ساتىلماق. بۇل كولىكتىڭ كوللەكتسيالىق قۇندىلىعىن ايتپاعاندا, تاريحىنىڭ ءوزى جۇرتشىلىقتىڭ قىزىعۋشىلىعىن تۋدىرىپ وتىر.
«رودستەر» دەپ قىسقارتىلىپ ايتىلاتىن كولىكتى گانس پريم دەگەن نەمىس 1935 جىلى ساتىپ العان. ەكىنشى دۇنيەجۇزىلىك سوعىس كەزىندە يەسى تۇتقىنعا الىنادى. ءسويتىپ, سوعىس اياقتالار تۇستا بار بولعانى 500 دانامەن شىققان, كوزدىڭ جاۋىن الاتىن قىمبات كولىكتى امەريكالىق سولداتتار اقش-قا الىپ كەتىپتى.
2011 جىلى گوللانديالىق كوللەكتسيونەر فرانس ۆان حارە كولىكتى 3,7 ميلليون دوللارعا ساتىپ الىپ, ەۋروپاعا قايتا اكەلەدى. ۆان حارە قىمباتقا العان كولىگىن جۇرتقا كورسەتپەك بولىپ, گەرمانيادا وتەتىن كلاسسيكالىق ماشينالاردىڭ كورمەسىنە اپارىپتى. سويتسە, جەرگىلىكتى پوليتسەيلەر ونىڭ مەنشىگىنىڭ زاڭدىلىعىنا كۇمان كەلتىرىپ, كولىكتى ءتاركىلەيدى.
بۇل وقيعانىڭ سوڭى ۇلكەن داۋعا اينالىپ, اقىر سوڭىندا سوت «رودستەردى» 70 جىل بۇرىن اقش-قا زاڭسىز اكەتكەن دەگەن شەشىم شىعاردى. ءسويتىپ, ارادا تالاي جىل وتكەندە, جۇمىر جەردىڭ جارتىسىن شارلاپ شىققان كولىك كەزىندە زاۋىتتان ساتىپ العان گانس ءپريمنىڭ بۇگىنگى ۇرپاقتارىنا بەرىلدى.
ەندى قوجايىندارى 70 جىلدان كەيىن قايتارىپ العان كولىكتى اۋكتسيون ارقىلى ساتىپ, شامامەن 7 ميلليون ەۋرو پايدا كورۋدى جوسپارلاپ وتىر.
ارنۇر اسقاروۆ,
«ەگەمەن قازاقستان»