رەسپۋبليكاشىلاردىڭ ءوزى ترامپقا قارسى
اقش-تىڭ ۇلتتىق قاۋىپسىزدىگىنە قاتىسى بار, رەسپۋبليكاشىل پارتيانىڭ ەڭ بەدەلدى ءارى تانىمال 50 ازاماتى پرەزيدەنتتىككە كانديدات دونالد ترامپتىڭ پرەزيدەنت قىزمەتىنە ونىڭ مىنەزى مەن تاجىريبەسى ساي كەلمەيتىنى جونىندەگى حاتقا قول قويدى.
قول قويعانداردىڭ پىكىرىنشە, دونالد ترامپ ەلدىڭ قاۋىپسىزدىگى مەن تىنىشتىعىنا قاۋىپ توندىرەدى. حاتقا قول قويۋشىلاردىڭ اراسىندا ورتالىق بارلاۋ باسقارماسىنىڭ بۇرىنعى ديرەكتورى مايكل حايدەن, مەملەكەتتىك حاتشىنىڭ بۇرىنعى ورىنباسارلارى دجون نەگروپونتە مەن روبەرت زەلليك, ۆيتسە-پرەزيدەنتتىڭ ۇلتتىق قاۋىپسىزدىك ماسەلەلەرى جونىندەگى بۇرىنعى كەڭەسشىسى ديك چەيني سياقتى كورنەكتى تۇلعالار بار. رەسپۋبليكاشىل قايراتكەرلەردىڭ سوزىنە قاراعاندا, د.ترامپ قۇراما شتاتتاردىڭ بەدەلىنە نۇقسان كەلتىرەدى. حاتتا, سونداي-اق, «ءبىزدىڭ ەشقايسىمىز دونالد ترامپقا داۋىس بەرمەيمىز», – دەپ كورسەتىلگەن.
تايلاندتا جاڭا كونستيتۋتسيا قابىلداندى
«رەيتەر» اقپارات اگەنتتىگىنىڭ حابارلاۋىنشا, تايلاندتا اسكەريلەر ۇسىنعان ەلدىڭ جاڭا كونستيتۋتسياسى قابىلداندى. رەفەرەندۋمنىڭ قورىتىندى ناتيجەسى بۇگىن جاريا ەتىلەدى.
رەفەرەندۋمدا ەل تۇرعىندارىنىڭ 67 پايىزدان استامى داۋىس بەرگەن. اسكەريلەردىڭ پىكىرىنشە, جاڭا كونستيتۋتسيا ب ۇلىك تۋدىراتىن ارەكەتتەرگە جول بەرمەيدى. ەندى ارميا حالىقتى ەلدى دامىتۋدىڭ الداعى 20 جىلعا ارنالعان جوسپارىن جۇزەگە اسىرۋعا جۇمىلدىراتىن بولادى. بۇدان كەيىن دەموكراتيالىق ۇكىمەتتى سايلاۋعا قادام جاسالادى. ول 2017 جىلدىڭ قازانىنا جوسپارلانىپ وتىر. كەيبىر اقپاراتتارعا قاراعاندا, جاڭا كونستيتۋتسياعا قارسىلاردىڭ ۇگىت جۇمىستارىن جۇرگىزۋگە تىيىم سالىنعان كورىنەدى. تايلاندتا 1932 جىلدان بەرى كونستيتۋتسيا وسىمەن 19 مارتە اۋىسقان ەكەن.
اتوم قارۋى قۇرباندارىن ەسكە الدى
كەشە جاپونيادا وسىدان 71 جىل بۇرىن ناگاساكي قالاسىنا تاستالعان اتوم بومباسىنىڭ قۇرباندارىن ەسكە الدى.
اتوم قارۋى قۇرباندارىنا ارنالعان بەيبىتشىلىك مەموريالى الدىندا اتوم بومباسىنان ءتىرى قالعاندار مەن قۇربان بولعانداردىڭ تۋىستارى جەرگىلىكتى ۋاقىت بويىنشا ساعات 11.02 مينۋتتا قۇربانداردى ءبىر مينۋت ۇنسىزدىكپەن ەسكە الىپ, شىركەۋلەردە قوڭىراۋ سوعىلدى. 1945 جىلدىڭ 9 تامىزىندا ءدال وسى ۋاقىتتا اقش-تىڭ اسكەري ۇشاعى ناگاساكي قالاسىنا تاستاعان جويقىن قارۋ سالدارىنان 70 مىڭداي ادام قۇربان بولعان ەدى. سودان ءۇش كۇن بۇرىن حيروسيما قالاسىنىڭ تۇرعىندارى دا وسىنداي قايعىلى جاعدايعا ۇشىراعان بولاتىن.
قىسقا قايىرىپ ايتقاندا:
پاكىستاندىق ادۆوكاتتار كۆەتتا قالاسىنداعى اۋرۋحانا الدىندا بولعان جارىلىستان ونداعان ادۆوكاتتىڭ قازا تابۋىنا بايلانىستى ميتينگىگە شىقتى. قازا بولعانداردىڭ كوپشىلىگى ادۆوكاتتار ەكەن.
بانگلادەش بيلىگى ەلگە جالپى سوماسى 500 مىڭ دوللاردى قۇرايتىن ەلەكترونيكا جانە تەمەكى بۇيىمدارىن زاڭسىز اكەلگەنى ءۇشىن كحدر ەلشىلىگىنىڭ ءبىرىنشى حاتشىسى حان سون يكتى ەل اۋماعىنان شىعاردى.
مەكسيكادا جولاۋشىلار اۆتوبۋسى 30 مەترلىك جارعا قۇلادى. وقيعا سالدارىنان ءتورت ادام مەرت بولىپ, 38 جولاۋشى زارداپ شەكتى.
قىتاي بيلىگى جالعان ايىپ تاعىلىپ, تۇرمەدە 13 جىل ءومىرىن وتكىزگەن تسيان جەنفەن ەسىمدى ايەلگە 1,72 ميلليون يۋان (258 مىڭ دوللار) تولەدى.
رەسەي كاسپيدەگى جوبالاردى تالقىلاۋعا ءازىر
رەسەي پرەزيدەنتى ۆلاديمير پۋتين ازەربايجان مەن يران پرەزيدەنتتەرىنىڭ ۇشجاقتى كەزدەسۋىندە كاسپي تەڭىزى ايماعىندا جاڭا ەنەرگەتيكالىق جانە كولىكتىك جوبالاردى تالقىلاۋعا ءازىر ەكەنىن مالىمدەدى.
پرەزيدەنتتەردىڭ ۇشجاقتى كەلىسسوزدەرىندە كوتەرىلگەن ماسەلە – ازەربايجان جانە يران ارقىلى وتەتىن جاڭا كولىك وتكەلىن سالۋعا جاڭاشا سەرپىن بەرەدى دەپ كۇتىلىپ وتىر. بۇل باعىت كولىك شىعىنىن ايتارلىقتاي ازايتىپ, ساۋدا-ساتتىقتىڭ دامۋىنا, ونىڭ ىشىندە رەسەيدەن ۇندىستانعا تاسىمالداناتىن جۇك كولەمىنىڭ ارتۋىنا ىقپال ەتپەك. رەسەي كوپ جىلدان بەرى يراننىڭ ەكونوميكالىق ارىپتەسى سانالادى. سونىمەن قاتار, رەسەي باتىس ەلدەرىنىڭ تەھەراننىڭ يادرولىق باعدارلاماسىنا قاتىستى الاڭداۋشىلىعىنا قاراماستان, وسى ەلگە يادرولىق تەحنولوگيا مەن وتىن جەتكىزەتىن نەگىزگى مەملەكەتتەردىڭ ءبىرى بولىپ وتىر.
ءتىل بىلمەسەڭ, كورگەن كۇنىڭ وسى
قىتايلىق تۋريست گەرمانيانىڭ دورتمۋند قالاسىنداعى ميگرانتتار ورتالىعىندا ەكى اپتا ءومىر ءسۇرىپتى. اقشاسى بار ءاميانىن ۇرلاتىپ العان ول پوليتسيا بولىمىنە بارۋدىڭ ورنىنا اداسىپ, ميگراتسيالىق قىزمەتكە بارعان.
نە اعىلشىن, نە نەمىس ءتىلىن بىلمەيتىن 31 جاستاعى قىتاي ازاماتى بۇل جەردى پوليتسيا ءبولىمى دەپ ويلاپ, ساۋالناما تولتىرعان, مەديتسينالىق تەكسەرۋدەن ءوتىپ, ساۋساق تاڭباسىن دا وتكىزىپتى. ونداعىلار ونىڭ شەنگەن ۆيزاسى بار پاسپورتىن الىپ, ميگرانتتاردىڭ ۋاقىتشا باسپاناسىنا ورنالاستىرعان. ورتالىق وعان كۇن سايىن تاماق تا, جۇمسايتىن اقشا دا بەرىپ تۇرىپتى. جەرگىلىكتى قىزىل كرەست مەكەمەسىنىڭ قىزمەتكەرلەرى شەتەلدىكتىڭ بوسقىنعا ۇقسامايتىنىن بايقاپ, قىتاي ءتىلىنىڭ اۋدارماشىسىن شاقىرىپ, سويلەسىپ كورگەندە, ونداعىلار بۇل ادامنىڭ ەۋروپا ەلدەرىن ارالاپ جۇرگەن تۋريست ەكەنىن, گەرمانيادان سوڭ فرانتسيا مەن يتالياعا بارۋدى جوسپارلاعانىنا كوز جەتكىزگەن. ءتىل بىلمەگەندىكتەن, ول وسىنداي جاعدايعا ۇشىراعان ەكەن.
حيللاري كلينتوندى سوتقا بەردى
2012 جىلى قىركۇيەكتە بەنگازيدە قازا تاپقان ەكى امەريكالىقتىڭ تۋىستارى دەموكراتيالىق پارتيادان اقش پرەزيدەنتتىگىنە كانديدات حيللاري كلينتوندى كولۋمبيا وكرۋگىنىڭ سوتىنا بەردى.
قازا بولعان امەريكالىقتاردىڭ تۋىستارى ساياساتكەر ح.كلينتون ديپلومات شونا سميت پەن ارنايى قىزمەت ورگانىنىڭ قىزمەتكەرى تايرون ءۆۋدستىڭ ولىمىنە كىنالى دەپ ەسەپتەيدى. تالاپ ارىزدا ولار كلينتون ءوزىنىڭ ءيميدجىن جاقسارتۋ ءۇشىن قازا تاپقانداردىڭ تۋىستارىنان بەنگازيدەگى شابۋىل جونىندە جاق اشپاۋدى تالاپ ەتكەنى كورسەتىلگەن. سول كەزدە مەملەكەتتىك حاتشى قىزمەتىن اتقارعان ح.كلينتون ليۆيا كامپانياسى بارىسىندا اقش «بىردە-ءبىر ادامىن جوعالتپادى» دەپ مالىمدەگەن بولاتىن. ال 2012 جىلدىڭ 11 قىركۇيەگىندە بەنگازيدەگى اقش كونسۋلدىعىنا جاسالعان شابۋىلدان ءتورت قىزمەتكەر قازا تاپقان ەدى.
ينتەرنەت ماتەريالدارى نەگىزىندە ازىرلەندى