[caption id="attachment_55074" align="aligncenter" width="560"] فوتو: bnews.kz[/caption]
«اردوس-جۇرەك» مۇگەدەكتەر بىرلەستىگىنىڭ باستاماسىمەن وڭىردە «ينكليۋزيۆتى ءبىلىم – بولاشاققا باستار جول» جوباسىنىڭ تۇساۋى كەسىلدى.
سولتۇستىك قازاقستان وبلىتىق ءبىلىم باسقارماسىنىڭ حابارلاۋىنشا, قالالىق دەمالىس ورىندارىنىڭ بىرىندە ورنالاسقان وقۋ-دامىتۋ لاگەرىندە 50-گە جۋىق ءجۇرىپ-تۇرۋى قيىن بالالار ءتۇرلى پايدالى ىستەرمەن شۇعىلدانادى.
قازاقستاننىڭ ءبىرىنشى پرەزيدەنتى قورىنىڭ قولداۋىنا يە بولعان جوبانى جۇزەگە اسىرۋشىلاردىڭ ءبىرى – «اردوس-جۇرەك» مۇگەدەكتەر ۇيىمى.
ۇيىم جەتەكشىسى اقجان كارىمنىڭ ايتۋىنشا, باعدارلامانى قارجىلاندىرۋعا 2 ميلليون تەڭگە گرانت جۇمسالىپ, ونىڭ اياسىندا ينتەراكتيۆتى سەمينارلار, ترەنينگتەر, مۋزىكالىق, ارت-جاتتىعۋلار, ويىن تەراپيالارى جۇمىس ىستەۋدە.
«اياق-قولى ءبۇتىن, دەنساۋلىعى جاقسى قاتارلاستارىنا قاراعاندا مۇمكىندىگى شەكتەۋلى بالالار وزدەرىن كەم سەزىنىپ, جاسقانشاقتاپ تۇراتىنى جاسىرىن ەمەس. وسىنداي الەۋمەتتىك تەڭسىزدىكتەرگە جول بەرمەس ءۇشىن ينكليۋزيۆتى ءبىلىم بەرۋدىڭ ارتىقشىلىقتارىن پايدالانا وتىرىپ, ولاردىڭ اينالاسىنا دەگەن قىزىعۋشىلىعىن وياتىپ, قورشاعان ورتاعا بەيىمدەۋ, قابىلەت-قارىمدارىن اشۋ ءبىزدىڭ باستى ماقساتىمىز», – دەيدى پسيحولوگ مامان عاليا بايازيتوۆا.
قىزىلجار وڭىرىندە قولعا الىنعان قاناتقاقتى باعدارلامانى ۇيىمداستىرۋشىلار كەلەشەكتە مەكتەپ باعدارلاماسى شەڭبەرىندە ۇيدە ءبىلىم الاتىن مۇمكىندىگى شەكتەۋلى بالالاردى ونلاين وقىتۋ جۇيەسىمەن قامتۋدى كوزدەپ وتىر. مۇنداي ساناتتاعى بالدىرعانداردىڭ سانى ايماقتا 150-گە جۋىق.
ءومىر ەسقالي