تامىزدىڭ 7-ءسى كۇنى تۇندە ريو-دە-جانەيرودا ءوتىپ جاتقان وليمپيالىق ويىنداردا قازاقستاندىق اۋىر اتلەت ارلي چونتەي 56 كيلوعا دەيىنگى سالماق دارەجەسىندە سىنعا ءتۇسىپ, ءتورتىنشى ورىن الدى.
ءبىزدىڭ سپورتشى ءبىرىنشى جاتتىعۋ – جۇلقا كوتەرۋدە 130 كگ سالماقپەن بەسىنشى ورىنعا تۇراقتادى. ول سەرپە كوتەرۋدە دە سالماق ۇزدىكتەرىمەن باسەكەگە تۇسە المادى. ءبىرىنشى تالپىنىستا 148 كگ سالماقتى باعىندىرعان ارلي سونىمەن تۇرىپ قالدى.
وسىلايشا قوسسايىس بويىنشا 278 كگ سالماق جيناعان قازاقستاندىق اتلەت جالپى ەسەپتە ءتورتىنشى تۇعىردان تابىلدى. ال وليمپيادا چەمپيوندىعى اتاعىن قوسسايىستاعى 307 كگ جيىنتىعىمەن قىتايلىق لون تسينگۋان جەڭىپ الدى. ەكىنشى ورىنعا 303 كگ كوتەرگەن كحدر سپورتشىسى يۋن چول وم ورنالاستى. ءۇشىنشى ساتىعا 289 كگ سالماقپەن تايلاندتىق سينفەت كرۋايتونگ جايعاستى.
ايتا كەتۋىمىز كەرەك, لون تسينگۋان وسى كورسەتكىشى ارقىلى الەم رەكوردىن جاڭارتتى. ال سەرپە كوتەرۋدەگى 170 كگ سالماعى وليمپيادانىڭ جاڭا رەكوردى بولىپ تابىلادى. ول تۇرىك حاليل مۋتلۋدىڭ 2000 جىلى سيدنەيدە جاساعان الەمدىك رەكوردىنا (305 كگ) وزگەرىس ەنگىزدى.
دامير قوجامقۇل
تەحنيكالىق ناتيجەلەر
XXXI جازعى وليمپيادا. ريو-دە-جانەيرو (برازيليا), 7 تامىز
اۋىر اتلەتيكا. ەرلەر. 56 كگ. 1. لون تسينگۋان (قىتاي) – 307, الەم رەكوردى (137+170). 2. يۋن چول وم (حندر) – 303 (134+169). 3. سينفەت كرۋايتونگ (تايلاند) – 289 (132+157). 4. ارلي چونتەي – 278 (130+148).