[caption id="attachment_55010" align="aligncenter" width="560"] epa.eu[/caption]
جاپونيا سىرتقى ىستەر مينيسترلىگى قىتايدىڭ شىعىس-قىتاي تەڭىزىندەگى گاز كەن ورىندارىن وڭدەيتىن 16 پلاتفورماسىنىڭ بىرىندە رادار ورناتىلعانىنا نارازىلىق ءبىلدىردى.
جاپوننىڭ Nikkei گازەتى, سونىمەن قاتار تاۋەلسىز Kyodo اقپارات اگەنتتىگى وسى ماسەلەگە بايلانىستى توكيونىڭ بەيجىڭگە نارازىلىق بىلدىرگەنىن حابارلادى.
Tass.ru-دىڭ اقپارى بويىنشا, بۇل – سوڭعى ەكى تاۋلىك ىشىندە جاپونيا تاراپىنان قىتايعا جولدانعان ءتورتىنشى نارازىلىق نوتاسى. الدىڭعى ۇشەۋى قىتاي بالىق اۋلاۋ كەمەلەرى مەن كۇزەت كاتەرلەرىنىڭ سەنكاكۋ داۋلى ارالدارىنا جاقىنداۋىنا بايلانىستى جىبەرىلگەن بولاتىن. اتالعان ارالداردىڭ اكۆاتورياسىن جاپونيا ءوزىنىڭ اۋماقتىق سۋلارى دەپ ەسەپتەيتىنىن ايتا كەتكەن ءجون. سەنبى كۇنى بۇل اۋماقتا قىتايدىڭ شامامەن 230 بالىق اۋلاۋ شحۋناسى (ەكى نەمەسە ودان كوپ دىڭگەكتى جەلكەندى كەمە) مەن التى كەمەسى بايقالعان.
Kyodo اگەنتتىگىنىڭ جاپونيا ۇكىمەتىندەگى دەرەككوزى پلاتفورمادا ورناتىلعان راديولوكاتسيالىق قۇرىلعى كەمەنىڭ ءجۇزىپ ءوتۋ جولىن قاداعالاي المايتىنىن جانە اسكەري ماقساتتاردا قولدانۋعا قۋاتى جەتپەيتىنىن مالىمدەگەن. ال Nikkei گازەتى ءوز كەزەگىندە مۇنداي قۇرىلعىلاردىڭ ادەتتە كۇزەت كەمەلەرىنە ورناتىلاتىنىن جانە كەن ورىندارىن وڭدەۋدە مىندەتتى تۇردە قولدانىلاتىنىن اتاپ ءوتتى.
ايدار ورىسباەۆ