[caption id="attachment_54922" align="aligncenter" width="560"] inform.kz[/caption]
پرەمەر-مينيستر كارىم ءماسىموۆ جۇمىس ساپارىمەن پاۆلودار وبلىسىندا بولىپ, ايماقتاعى اگروونەركاسىپ كەشەنى ينفراقۇرىلىمىنىڭ دامۋ بارىسىمەن تانىستى.
Pm.kz-ءتىڭ مالىمەتى بويىنشا, ۇكىمەت باسشىسى وڭىرگە جۇمىس ساپارى بارىسىندا «پاحار» شارۋا قوجالىعى جشس اگروقالاشىعىندا بولعان. قوجالىق جەتەكشىسى رۋسلان اۋشەۆ پرەمەر-مينيسترگە «سۋارۋ جانە مال شارۋاشىلىعى كەشەنىنە قىزمەت كورسەتۋ ماقساتىندا اگروقالاشىق پەن ونەركاسىپتىك تۇرعىن ءۇي كەشەنىن سالۋ» ينۆەستيتسيالىق جوباسىنىڭ ىسكە اسىرىلۋ بارىسى تۋرالى باياندادى.
جوبا بارىسىندا 1200 باس ءىرى قاراعا شاقتالعان ءسۇت-تاۋار فەرماسى, 5000 باس ءىرى قارا مالعا ارنالعان بورداقىلاۋ الاڭى سالىنادى. مۇندا سۋارمالى ەگىن شارۋاشىلىعى القابى ءۇشىن جالپى كولەمى 9200 گەكتاردى قۇرايتىن تاناپ بەرىلگەن.
جۇزەگە اسىرىلىپ جاتقان جوبا وبلىستاعى عانا ەمەس, رەسپۋبليكا اۋماعىنداعى شارۋاشىلىقتاردى ساپالى تۇقىمدىق ماتەريالمەن, ەت باعىتىنداعى «انگۋس» اسىل تۇقىمدى ءىرى قارا مالىمەن جانە «گولشتين-فريز» اتتى ءسۇتتى باعىتتاعى سيىر تۇقىمىمەن قامتاماسىز ەتەدى.
سونىمەن قاتار, بورداقىلاۋ الاڭدارىن اشۋ «پرەميۋم كلاستى» ءىرى قارا ەتىن قازاقستان مەن كەدەن وداعى ەلدەرى نارىعىندا قولايلى باعامەن مول كولەمدە ۇسىنۋعا مۇمكىندىك بەرەدى.
سونداي-اق اگروقالاشىق بازاسىندا جوعارى وقۋ ورىندارىنىڭ تۇلەكتەرى مەن ستۋدەنتتەرىنىڭ تاجىريبەدەن ءوتىپ تۇرۋلارى ءۇشىن اۋىل شارۋاشىلىعى عىلىمي-زەرتتەۋ ينستيتۋتىنىڭ وسىنداعى بولىمىندە عىلىمي الاڭ اشۋ قاراستىرىلىپ جاتىر.
ايدار ورىسباەۆ