فرانتسۋز قالاسىن شاراپ تاسقىنى باسىپ قالدى
فرانتسيانىڭ تۇستىگىندەگى ەرو دەپارتامەنتى جەرىندە ورنالاسقان سەتا قالاسىنىڭ كوشەلەرىن ءبىر مەزگىلدە لەكىلدەي اققان شاراپ تاسقىنى باستى دا قالدى.
تامىزدىڭ 3-ءى كۇنى ورىن العان بۇل وقيعانى پوليتسەيلەر جەرگىلىكتى شاراپ ءوندىرۋشىنىڭ نارازىلىقپەن جاساعان ب ۇلىگى دەپ باعالاپ وتىر. سەبەبى, سودان بىرنەشە كۇن بۇرىن شاراپ ءىسى جونىندەگى ايماقتىق كوميتەت بىرنەشە شاراپ وندىرۋشىگە يسپان شارابىن اكەلىپ, باعا دەمپينگىن جاسادى دەگەن ايىپ تاققان ەكەن. وسىدان كەيىن شاراپشىلاردىڭ كوشەنى بىرنەشە مىڭ ليترلىك شاراپ توپانىنا تولتىرىپ جىبەرۋ وقيعاسى بىرنەشە رەت ورىن الىپتى.
كولىك تىزگىنىندە يتتەر وتىر. ابايلاڭىز!
اقش-تىڭ ۋەين قالاسىنداعى ەكى توبەتتىڭ ارەكەتى زاماتىندا كۇللى الەمگە ايگىلى بولىپ كەتتى. ولار كوشەدە تۇرعان ءاۆتوموبيلدى جانىنداعى سۋپەرماركەتتىڭ ىشىنە كىرگىزىپ جىبەرگەن.
بۇل يتتەردى ءبىر ايەل ءوزىنىڭ جول بويىنا قويعان ءاۆتوموبيلىنىڭ ىشىندە قالدىرىپ كەتەدى. الايدا, يەسى كەتكەن سوڭ ءوزدى-ءوزى قالعان توبەتتەر ماشينانىڭ الدىڭعى ورىندىعىنا وتىرماق بولىپ تالاسىپ جاتىپ, ونىڭ قول تەجەگىشىنە ءتيىپ كەتەدى. سول-اق ەكەن بيىك جەردە تۇرعان كولىك توقتاماستان قاتتى كەلىپ, ماگازيننىڭ سىرتقى تەرەزەسىنەن ۇرىپ, ىشكە قويىپ كەتەدى. ءبىر جاقسى جەرى, ونداعى ادامدار دا, يتتەر دە ەشقانداي زارداپ شەكپەپتى.
باراك وبامانىڭ كىشى قىزى ءوز بەتىنشە تابىس تاپپاقشى
اقش پرەزيدەنتى باراك وبامانىڭ كىشى قىزى – 15 جاسار ساشا جازعى كانيكۋل كۇندەرى ءوز بەتىنشە تابىس تاپپاقشى بولىپ جۇمىسقا ورنالاستى.
ول قازىر بالىق ساتاتىن دۇكەننىڭ كاسسا اپپاراتىندا جۇمىس جاساپ, ەكسپرەسس-تەرەزەدەن تاعامداردى بەرىپ تۇرادى. بىراق, پرەزيدەنتتىڭ فاستفۋد ساتىپ جۇرگەن قىزىن وسىندا ءبىر مەزگىلدە التى بىردەي وققاعار جان-جاقتان قورعاپ جۇرەدى.
ايدى ەندى جەكە ادامدار دا زەرتتەي باستايدى
اقش ۇكىمەتى جەكە ادامداردىڭ ايدى ءوز بەتتەرىنشە زەرتتەۋلەرىنە رۇقسات بەردى. ەندى مۇنداي العاشقى ساپاردىڭ 2017 جىلى جۇزەگە اسىرىلاتىن ءتۇرى بار.
وسىنىڭ ناتيجەسىندە Moon Express كومپانياسى توعىز كيلولىق عىلىمي اپپاراتۋرا مەن جىلجىمالى ءمودۋلدى جانە تەلەسكوپتى اتتاندىرعالى وتىر. مەملەكەتتىك ەمەس سيپاتتاعى بۇل ۆوياجدىڭ باسى 2007 جىلى Google كومپانياسى جاريالاعان كونكۋرستان باستالعان ەدى. ونىڭ باس جۇلدەسىن 2010 جىلى Moon Express ۇتىپ الىپ, 20 ملن. دوللار سىيلىققا يە بولعان. وسىعان بايلانىستى كومپانيا الداعى جىلى ايعا لۋناحود اتتاندىرعالى وتىر.
شەكاراشىلار ۇشەمدەردى ءبىر-بىرىنەن اجىراتا المادى
تايلاندقا دەمالىپ قايتۋعا بارۋ ءۇشىن ۇشاققا وتىرۋعا كەلگەن اتا-انالار الدىنان كۇتپەگەن كەدەرگى كەزدەستى.
شەكاراشىلار ولاردىڭ بىرگە تۋعان ۇشەم ۇلدارىنىڭ سۋرەتتەرىن ءبىر-بىرلەرىنەن اجىراتا الماي, اقىرى بىرەۋىن عانا شەكارا شەگىنەن وتكىزۋگە شەشىم قابىلدادى. ءسويتىپ, ماسكەۋلىك ەرلى-زايىپتى پانچەنكولار ۇشەمنىڭ بىرەۋىن عانا الىپ, بانگكوكقا اتتانىپ كەتتى. ال قالعان ەكى بالانى اپارۋ ءۇشىن ەلدەگى اتا-اجەلەرى شۇعىل قۇجات دايىنداۋعا كىرىسىپ كەتىپتى.
تۇرمەدە جاتىپ تاپقانىن بالالار ۇيىنە بەرگەن
موڭعوليادا №429 تۇزەتۋ مەكەمەسىندە جازاسىن وتەپ جاتقان ارتاگ ءتوموربااتار ەسىمدى سوتتالۋشى ءوزىنىڭ ايلىق جالاقىلارىن بالالارعا بەرۋگە شەشىم قابىلدادى.
ول مەملەكەتكە كەلتىرگەن شىعىنىن وتەۋ ءۇشىن تۇزەتۋ كولونياسىندا سىپىرۋشى بولىپ جۇمىس ىستەيدى ەكەن. بىراق ول بۇدان الاتىن اقشاسىنىڭ ازدىعىنا قاراماستان, تولەمنەن قالعاندارىن تۇگەل بالالار ۇيىنە اۋدارىپ تۇراتىن بولدى. «مەن 2013 جىلدىڭ 24 قاراشاسىنان بەرى جازامدى وتەپ جاتىرمىن. وسى ۋاقىتتا 110 مىڭ تۋگريك اقشا جينادىم. ەندى سونى نارەستەلەردى ەمدەۋ ءۇشىن بالالار ۇيىنە اۋدارۋدى سۇرايمىن», دەپ جازدى ول وسىعان وراي.
اۆستراليالىق ايەل 63 جاسىندا ءسابيلى بولدى
اۆستراليانىڭ تاسمانيا ارالىندا تۇراتىن, اتى-ءجونىن اتاماۋدى وتىنگەن ءبىر ايەل 63 جاسىندا ءوزىنىڭ ءبىرىنشى پەرزەنتىن دۇنيەگە كەلتىردى.
وسىنشاما جاسقا كەلىپ «جاس انا» اتانىپ وتىرعان ايەلدىڭ شاراناسى 34 اپتالىعىندا ءىشتى جارۋ جولىمەن الىنىپتى. ول وسى كەزگە دەيىن بالا كوتەرە الماي كەلىپتى. اقىرىندا دونورلىق ەمبريون تاسىلىمەن ەكىقابات بولعان. ايەل جونىندە اسا كوپ دەرەك ايتىلمايدى. تەك ونىڭ كۇيەۋى 78 جاستا ەكەنى عانا بەلگىلى.
اقپارات اگەنتتىكتەرىنىڭ ماتەريالدارى بويىنشا دايىندالدى