ەلباسىنىڭ «100 ناقتى قادامىنىڭ» 57-قادامىندا, تۋريستىك كلاستەرلەر قۇرۋدا ۇزدىك تاجىريبەسى بار ستراتەگيالىق (زاكىرلىك) ينۆەستورلار تارتۋ تۋرالى ايتىلعان.
سەمەي ماڭىنداعى «سۆياتوي كليۋچ» ساياحات سوقپاعى تابيعات اياسىندا بەلسەندى دەمالىس پەن ەكولوگيالىق ءتۋريزمدى قالايتىندار ءۇشىن تاپتىرماس دۇنيە. مۇندا تەك قازاقستاندىقتار عانا ەمەس, شەتەلدىكتەر دە كەلىپ جاتادى. تابيعاتى كورىكتى جەرلەردى قامتيتىن ۇزىندىعى 10 شاقىرىمعا سوزىلاتىن باعىتتى 6 ساعاتتا جاياۋ ءجۇرىپ وتۋگە بولادى. جىل سايىن ەكولوگيالىق سوقپاقپەن شامامەن 500-گە جۋىق ادام ءجۇرىپ وتەدى ەكەن.
– جىل وتكەن سايىن قالا تۇرعىندارى عانا ەمەس, الىس-جاقىن شەتەلدەن كەلۋشىلەر دە قىزىعۋشىلىق تانىتۋدا, – دەيدى «سەمەي ورمانى» مەملەكەتتىك تابيعي ورمان رەزەرۆاتىنىڭ ينجەنەرى مارينا بۋلاتوۆا. – ەكولوگيالىق سوقپاق قالاعا جاقىن ورنالاسقان. «كونترولنىي كەنتىنەن باستالىپ, «سۆياتوي كليۋچ» ەلدى مەكەنىندە اياقتالادى. جەرلەستەرىمىزگە ول 2010 جىلدان بەرى تانىس. ەكولوگيالىق تۋريزم مەملەكەت تاراپىنان قورعالعان تابيعي رەزەرۆات اۋماعىندا جۇزەگە اسادى. تابيعي سوقپاق ولكەتانۋشىلاردىڭ ءالى كۇنگە دەيىن قىزىعۋشىلىعىن تۋعىزاتىن جەرلەردى قامتيدى. تاريحي دەرەكتەرگە قاراعاندا, ءدال وسى ەسكى قامال اۋدانىندا جەرگىلىكتى ساتبەك باتىردىڭ قولىنان كازاك اتامانى ەرماك قازا تاپقان.
ايتا كەتۋ كەرەك, 2015 جىلى سەمەي ورمانىنىڭ موروزوۆ فيليالىنىڭ اۋماعىنداعى, جاقىن ماڭداعى مەكتەپتەردىڭ ورمان شارۋاشىلىقتارىنداعى بالالار ءۇشىن ارنايى ەكولوگيالىق سوقپاق جوباسى جۇزەگە اسىرىلا باستادى. ولار سوقپاقتى كۇتۋ جۇمىستارىن ءوز بەتتەرىمەن اتقاردى. ادام دەنساۋلىعى قورشاعان ورتانىڭ تازالىعىنا دا بايلانىستى. سوندىقتان, تانىمدىق ەكولوگيالىق باعىتتاردى قۇرىپ, ونى ناسيحاتتاۋدىڭ ەرەسەكتەرمەن قاتار, بالالاردى تابيعاتتى ايالاپ, تۋعان ءولكەنى سۇيۋگە تاربيەلەۋدە ىقپالى زور.
راۋشان نۇعمانبەكوۆا شىعىس قازاقستان وبلىسى