شۆەيتساريانىڭ لوزاننا قالاسىندا بۇگىن, 24 شىلدە كۇنى وتكەن حالىقارالىق وليمپيالىق كوميتەتتىڭ تەلەكونفەرەنتسياسى بارىسىندا رەسەي قۇراما كومانداسىن ريو-دە-جانەيروداعى وليمپيالىق ويىنداردان تولىعىمەن الىپ تاستاماۋ جونىندە شەشىم قابىلداندى. حوك-تىڭ سايتىندا وسى تۋرالى جازىلدى.
سونىمەن بىرگە, كوميتەت جەكەلەگەن سپورت تۇرلەرى بويىنشا ناقتىلى سپورتشىلار مەن كوماندالاردى جارىسقا جىبەرۋ جونىندەگى وكىلدىكتى ءتيىستى حالىقارالىق فەدەراتسيالارعا تاپسىردى.
بۇعان دەيىن, 24 شىلدە كۇنى رەسەي باق-تارى, بريتانيا ءباسپاسوزى باسقاشا حابارلاعانىنا قاراماستان, حوك-تىڭ رەسەي قۇراماسىن وليمپياداعا جىبەرەتىنىن جازعان ەدى.
ال 21 شىلدە كۇنى حالىقارالىق اربيتراجدىق سوت (CAS) رەسەي وليمپيالىق كوميتەتى مەن جەڭىل اتلەتتەرىنىڭ حالىقارالىق جەڭىل اتلەتيكا اسسوتسياتسياسىنىڭ ۇستىنەن بەرگەن شاعىمىن قاراماي تاستاعان بولاتىن. وندا 68 شاعىمنىڭ ىشىنەن تەك سوڭعى ءۇش جىلدا اقش-تا جاتتىعىپ جۇرگەن ۇزىندىققا سەكىرۋشى داريا كليشينانىڭ عانا شاعىمى قاناعاتتاندىرىلدى.
18 شىلدە كۇنى بۇكىلالەمدىك انتيدوپينگىلىك اگەنتتىكتىڭ (WADA) كانادالىق زاڭگەر ريچارد ماكلارەن باسقاراتىن تاۋەلسىز كوميسسياسى 2014 جىلى سوچيدە وتكەن قىسقى وليمپيالىق ويىندارداعى دوپينگىلىك قيتۇرقىلىقتاردى ايىپتاۋدى تەكسەرۋدىڭ قورىتىندىلارى تۋرالى بايانداماسىن ۇسىندى. ونىڭ قورىتىندىسى بويىنشا WADA رەسەيدىڭ بارلىق سپورتشىلارىن 2016 جىلعى ويىنداردان الاستاۋعا, سونداي-اق ەلدىڭ سپورت ءمينيسترى ۆيتالي مۋتكونى وتستاۆكاعا جىبەرۋگە شاقىردى.
دامير قوجامقۇل