[caption id="attachment_52848" align="aligncenter" width="560"] فوتو: newinform.com[/caption]
اۋعانستاندا سەنبى كۇنى لاڭكەستىك شابۋىلدان قازا تاپقانداردى ەسكە الۋ ءۇشىن 24 شىلدە ۇلتتىق ازا تۇتۋ كۇنى بولىپ جاريالاندى. «ينتەرفاكس» اقپارات اگەنتتىگىنىڭ مالىمەتى بويىنشا, ەل پرەزيدەنتى اشراف گاني جارىلىس ۇيىمداستىرعانداردىڭ كىم ەكەنىن جاقىن ارادا تاۋىپ, ءتيىستى جازالارىن بەرۋگە ۋادە ەتتى.
ال بىرىككەن ۇلتتار ۇيىمى بۇل ءىستى «اسكەري قىلمىس» دەپ اتادى.
«بالاسىنان ايرىلعان اكە-شەشەنىڭ, جاقىندارىنان قاپىدا قالعان تۋعان-تۋىستارىنىڭ جاي-كۇيى مەنىڭ جانىما قاتتى باتىپ وتىر. وسىعان بايلانىستى, ولاردى ەسكە الۋ ءۇشىن 24 شىلدە ۇلتتىق ازا تۇتۋ كۇنى دەپ جاريالايمىن. لاڭكەستەردى قولعا ءتۇسىرىپ, مىندەتتى تۇردە جازالايمىز. بىزگە جاساعان ءاربىر شابۋىلى ارقىلى ارامىزعا ىرىتكى سالعىلارى كەلەدى. بىراق كوپ ۇزاماي ولار جەڭىلەتىن بولادى», – دەدى اشراف گاني.
ايتا كەتەيىك, 23 شىلدەدە مىڭداعان تۇرعىندار دەح مازانگ الاڭىندا باميان پروۆينتسياسىن ەلەكترمەن جابدىقتاۋ جۇمىسىن كەيىنگە قالدىرعانى ءۇشىن نارازىلىقتارىن بىلدىرگەن بولاتىن. ءدال وسى كەزدە جانكەشتىلەردىڭ ءبىرى ءوزىن-ءوزى جارىپ جىبەرگەن. سالدارىنان 80 ادام قازا تاۋىپ, 231 تۇرعىن ءتۇرلى دەڭگەيدە جاراقات الدى. ولاردىڭ اراسىندا كۇشتىك قۇرىلىم وكىلدەرى دە بار.
ارتىنشا قاندى ارەكەتتى دايش لاڭكەستىك توبىنىڭ سودىرلارى ءوز موينىنا العانى بەلگىلى بولدى.
ايان ءابدۋالي